រដ្ឋមន្ត្រីការបរទេស អាមេរិក នឹងជួបអង្គុយពិភាក្សាជាមួយមន្ត្រីជាន់ខ្ពស់ ចិន មុនការបោះឆ្នោត តៃវ៉ាន់ មួយថ្ងៃ

ទីភ្នាក់ងារព័ត៌មាន Reuters បានចុះផ្សាយថា រដ្ឋមន្ត្រីការបរទេសសហរដ្ឋអាមេរិកលោក Antony Blinken នឹងជួបចរចាជាមួយមន្ត្រីជាន់ខ្ពស់ចិនលោក Liu Jianchao ក្នុងទីក្រុងវ៉ាស៊ីនតោននៅថ្ងៃសុក្រនេះ ខណៈជំនួបនេះកើតមានឡើងតែមួយថ្ងៃប៉ុណ្ណោះ មុនការបោះឆ្នោតសកលនៅកោះតៃវ៉ាន់ ។

ការបោះឆ្នោតជ្រើសរើសមេដឹកនាំថ្មីរបស់តៃវ៉ាន់ដែលនឹងរៀបចំឡើងនៅថ្ងៃសៅរ៍ ទី១៣ ខែមករានេះ គឺជាការសាកល្បងមួយទៀតសម្រាប់ទំព័រឆ្នាំថ្មីលើទំនាក់ទំនងរវាងសហរដ្ឋអាមេរិក និងចិនដែលទើបតែមានភាពធូរស្បើយ ក្រោយជំនួបលោក Joe Biden និងលោក Xi Jinping កាលពីខែវិច្ឆិកា ឆ្នាំ២០២៣ កន្លងទៅនៅទីក្រុង San Francisco ។

ទន្ទឹមនោះ សារព័ត៌មានអាមេរិកក៏បានចុះផ្សាយដែរថា ការបោះឆ្នោតជ្រើសរើសមេដឹកនាំថ្មីរបស់តៃវ៉ាន់ដែលចិនអះអាងថាជាទឹកដីរបស់ខ្លួន និងដើម្បីជំនួសកៅអីលោកស្រី Tsia Ing-wen ក៏កំពុងកំណត់ជោគវាសនានៃគោលនយោបាយរបស់រដ្ឋបាលលោក Biden ថាតើទំនាក់ទំនងជាមួយចិនពេញមួយឆ្នាំ ២០២៤ នេះកាន់តែធូរស្រាល ឬក៏ល្អក់កករឡើងវិញឬយ៉ាងណា បន្ទាប់ពីបានដាំក្បាលចុះក្រោមដល់កម្រិតទាបបំផុតជាប្រវត្តិសាស្ត្រកាលពីឆ្នាំមុន ។

ស្របពេលជាមួយគ្នានេះ មុនជួបអង្គុយចរចាជាមួយលោក Blinken, លោក Liu Jianchao ដែលជាប្រធាននាយកដ្ឋានអន្តរជាតិរបស់បក្សកុម្មុយនិស្តចិន កាន់ការផ្នែកទំនាក់ទំនងជាមួយគណបក្សនយោបាយបរទេស ក៏បានជួបពិភាក្សាការងារជាមួយទីប្រឹក្សារងសន្តិសុខជាតិរបស់សេតវិមានលោក Jon Finer ផងដែរ ជាពិសេសគឺផ្ដោតលើបញ្ហាជ្រៀតជ្រែកកិច្ចការផ្ទៃក្នុង ក៏ដូចជាការបោះឆ្នោតនៅតៃវ៉ាន់តែម្ដង ។

គួរបញ្ជាក់ថា ទីក្រុងវ៉ាស៊ីនតោនបានព្រមានចិនម្ដងហើយម្ដងទៀតកុំឲ្យហ៊ានលូកលាន់ការបោះឆ្នោតនៅកោះតៃវ៉ាន់ឲ្យសោះ ហើយព្រមទាំងផ្លែផ្កាឲ្យទីក្រុងប៉េកាំងទៀតថា នឹងក្លាយជាអ្នកបង្កហេតុ ប្រសិនបើចិនសម្រេចជ្រើសរើសផ្លូវប្រើកម្លាំងយោធាមកលើកោះដែលគ្រប់គ្រងតាមបែបប្រជាធិបតេយ្យមួយនេះ ៕

ដោយ ៖ សុខ ជីវ័ន្ត

ចុចអាន ៖ អ៊ីស្រាអែល សម្រុកធ្វើសង្គ្រាមលើក្រុមហាម៉ាស និងហេសបូឡាក្នុងពេលតែ មួយ ដោយគ្មានយល់មុខលោក Blinken