Breaking News! ខណៈនេះបក្សកាន់អំណាច តៃវ៉ាន់ កំពុងនាំមុខសំឡេង​ឆ្នោតលើគូប្រជែង

គិតត្រឹមម៉ោង ៥ ល្ងាចនេះ បេក្ខភាពមកពីគណបក្សវឌ្ឍនភាពប្រជាធិបតេយ្យ (DPP) ដែលកំពុងកាន់អំណាចគឺលោក Lai Ching-te កំពុងនាំមុខសំឡេងឆ្នោតលើគូប្រជែងដ៏ស្វិតស្វាញមកពីគណបក្ស Kuomintang (KMT) លោក Hou Yu-ih ប្រមាណជា ៨ ភាគរយ ខណៈលោក Ko Wen-je មកពីគណបក្សប្រជាជនតៃវ៉ាន់ (TPP) ស្ថិតនៅលំដាប់ទី ៣ ។ នេះបើយោងតាមលទ្ធផលបឋម និងចុះផ្សាយដោយសារព័ត៌មាន Taiwan News នៅថ្ងៃសៅរ៍ ទី១៣ ខែមករានេះ ។

ស្របពេលជាមួយគ្នានេះ ទូរទស្សន៍ជាតិតៃវ៉ាន់ TTV ក៏បានរាយការណ៍ដែរថា លោក Lai ទទួលបានសំឡេងឆ្នោត ៣៤៩,២១៣ សំឡេង ឬ ៤២.៩ ភាគរយ ខណៈលោក Hou មានសំឡេង ២៦៨,៩២១ សំឡេង ឬ ៣៣ ភាគរយ ហើយលោក Ko ទទួលបានសំឡេង ១៩៦,៤៨៣ សំឡេង ឬ ២៤.១ ភាគរយ ។

គួរបញ្ជាក់ថា ប្រជាជនតៃវ៉ាន់មានសិទ្ធបោះឆ្នោតប្រមាណ ១៩.៥ លាននាក់បាននាំគ្នាទៅការិយាល័យបោះឆ្នោត ដែលបើកទ្វារនៅម៉ោង ៨ ព្រឹក និងបិទនៅម៉ោង ៤ រសៀល ខណៈលទ្ធផលផ្លូវការអាចនឹងប្រកាសនៅប៉ុន្មានម៉ោងខាងមុខនេះ ៕

ដោយ ៖ សុខ ជីវ័ន្ត

ចុចអាន ៖ ការបោះឆ្នោតតៃវ៉ាន់ ត្រូវបញ្ចប់ ពេលនេះកំពុងរាប់សន្លឹកឆ្នោត