លម្អិតហេតុការណ៍ ផ្ទុះរោងចក្រកាំជ្រួចនៅថៃ ស្លាប់មនុស្ស ២៣នាក់

យោងតាមព័ត៌មានចុងក្រោយដែលផ្សាយដោយ The Nation បានឲ្យដឹងថា គ្មាននរណាម្នាក់នៅរស់ឡើយ ក្នុងហេតុការណ៍ផ្ទុះរោងចក្រកាំជ្រួចនៅប្រទេសថៃ កាលពីរសៀលថ្ងៃពុធទី១៧ខែមករា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះកើតឡើងនាម៉ោង ៣:៣០នាទី ក្នុងភូមិ Ban Khoi Ngam នៃទីប្រជុំជន Tambon Sala Khao របស់ស្រុក Muang ក្នុងខេត្ត Suphanburi។

តាមធម្មតា រោងចក្រកាំជ្រួចនេះមានកម្មករធ្វើការប្រមាណ៣០នាក់ ប៉ុន្តែនៅថ្ងៃកើតហេតុ មានកម្មករតែ២៣នាក់ប៉ុណ្ណោះ ដែលស្ថិតនៅក្នុងរោងចក្រព្រោះអ្នកខ្លះជាប់រវល់នៅខាងក្រៅ។

អ្នកភូមិបានប្រាប់ទៅកាន់សារព័ត៌មាន Khaosod ថា ក្នុងចំណោមអ្នកស្លាប់ទាំង ២៣នាក់នោះ ក៏មានប្រពន្ធ និងកូនម្នាក់ របស់ថៅកែរោងចក្រផងដែរ។

រោងចក្រនេះមានលិខិតអនុញ្ញាតឲ្យបើកដំណើរការត្រឹមត្រូវ ហើយត្បិតតែវាត្រូវបានសាងសង់ឡើងនៅឆ្ងាយពីផ្ទះប្រជាពលរដ្ឋក៏ពិតមែន ប៉ុន្តែសំឡេងផ្ទុះដ៏ខ្លាំង បណ្តាលឲ្យអ្នកភូមិភ័យរន្ធត់គ្រប់ៗគ្នា។

អាជ្ញាធរមូលដ្ឋានអះអាងថា សាកសពមនុស្សមួយចំនួនមើលលែងស្គាល់ហើយ ព្រោះថាសាកសពត្រូវបែកជាបំណែក ហើយខ្លះខ្ទាត៥០ម៉ែត្រចូលវាលស្រែឯណោះ។

ទោះបីជាយ៉ាងណាក៏ដោយ មូលហេតុពិតនៃការផ្ទុះ មិនទាន់មាននរណាដឹងនៅឡើយទេ ខណៈភ្នាក់ងារនានា កំពុងចាប់ផ្តើមការស៊ើបអង្កេត។

ដំណឹងដ៏ក្រៀមក្រំនេះ បានដឹងទៅដល់លោកនាយករដ្ឋមន្ត្រី សេដ្ឋា ថាវីស៊ីន ខណៈលោក កំពុងស្ថិតនៅប្រទេសស្វីសចូលរួម វេទិកាសេដ្ឋកិច្ចពិភពលោក ហើយលោកបានចេញសេចក្ដីថ្លែងការភ្លាមៗ​ សម្ដែងការសោកស្ដាយចំពោះគ្រួសារអ្នកស្លាប់ តាមរយៈបណ្ដាញសង្គម។

សូមបញ្ជាក់ថា ករណីផ្ទុះក្នុងរោងចក្រផលិតផាវនិងកាំជ្រួច មិនមែនជារឿងចម្លែកទេនៅប្រទេសថៃ។ គេចាំបានថា មនុស្សចំនួន ១០ នាក់ត្រូវបាត់បង់ជីវិត បន្ទាប់ពីការផ្ទុះក្នុងឃ្លាំងកាំជ្រួចមួយកន្លែងនៅទីក្រុង Sungai Kolok នៃខេត្ត Narathiwat ភាគខាងត្បូងប្រទេសថៃ កាលពីឆ្នាំមុន៕

អត្ថបទ៖ សុខ សុវណ្ណ

ចុចអាន៖ ផ្ទុះរោងចក្រផលិតកាំជ្រួចមួយកន្លែងនៅប្រទេសថៃ សម្លាប់មនុស្សជាង ២០នាក់