ប៉ាគីស្ថាន ចាត់វិធានការក្តៅលើអ៊ីរ៉ង់ ក្រោយមីស៊ីល សម្លាប់កុមារក្នុងដីរបស់ខ្លួន

តាមការចុះផ្សាយរបស់ AFP, ពេលនេះ ភាគីប៉ាគីស្ថាន បានចាត់វិធានការក្តៅ ដោយកោះហៅឯកអគ្គរដ្ឋទូតរបស់ខ្លួនពីប្រទេសអ៊ីរ៉ង់ ហើយហាមឃាត់ប្រេសិតទីក្រុងតេហេរ៉ង់ មិនឲ្យវិលត្រលប់មកទីក្រុងអ៊ីស្លាម៉ាបាដវិញ បន្ទាប់ពីអ៊ីរ៉ង់ បាញ់មីស៊ីលសម្លាប់កុមារ២នាក់នៅភាគខាងលិចប្រទេស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យ៉ាងណា ភ្នាក់ងារព័ត៌មានអ៊ីរ៉ង់ Mehrnews អះអាងថា មីស៊ីលនិងដ្រូន កំណត់គោលដៅត្រឹមទីបញ្ជាការរបស់ក្រុម Jaish al-Adl ក្នុងប្រទេសប៉ាគីស្ថានប៉ុណ្ណោះ ដើម្បីឆ្លើយតបទៅនឹងទង្វើដ៏គឃ្លើនប្រឆាំងសន្តិសុខរបស់អ៊ីរ៉ង់។

ទោះមានការបញ្ជាក់បែបនេះ តែអ្នកនាំពាក្យក្រសួងការបរទេសប៉ាគីស្ថាន លោកស្រី Mumtaz Zahra Baloch បានប្រកាសក្តែងៗថា “ទង្វើបង្ករឿង និងការរំលោភដែនអធិបតេយ្យប៉ាគីស្ថានដោយឥតញញើតនិងកោតក្រែង គឺជាការបំពានលើច្បាប់អន្តរជាតិនិងគោលបំណង ក៏ដូចជាគោលការណ៍នៃធម្មនុញ្ញអង្គការសហប្រជាជាតិ សុទ្ធសាធ។ ក្រសួងបានកោះហៅឯកអគ្គរដ្ឋទូតរបស់ខ្លួនមកពីទីក្រុងតេហេរ៉ង់វិញ ហើយប្រេសិតអ៊ីរ៉ង់ដែលកំពុងទៅលេងនៅស្រុកកំណើត ក៏នឹងមិនទទួលបានការអនុញ្ញាតឲ្យវិលចូលទីក្រុង អ៊ីស្លាម៉ាបាដ វិញដែរ”។

ដោយបង្កើតឡើងក្នុងឆ្នាំ២០១២ ក្រុម Jaish al-Adl ត្រូវបានអ៊ីរ៉ង់ ដាក់បញ្ចូលក្នុងបញ្ជីខ្មៅ ជាក្រុមភេរវករ ខណៈពួកគេបើកការវាយប្រហារជាច្រើនលើកច្រើនសា លើទឹកដីអ៊ីរ៉ង់ ក្នុងរយៈពេលប៉ុន្មានឆ្នាំចុងក្រោយនេះ។

ស្របពេលជាមួយគ្នានោះដែរ រដ្ឋមន្ត្រីក្រសួងការបរទេសអ៊ីរ៉ង់លោក Hossein Amir-Abdollahian និយាយថា Jaish al-Adl គឺជាក្រុមភេរវករ ដែលធ្វើសកម្មភាពប្រឆាំងនឹងសន្តិសុខរួមនៃប្រទេសទាំងពីរ ហើយមានភាពចាំបាច់ដើម្បីទប់ទល់ជាមួយក្រុមនេះ។

សូមបញ្ជាក់ថា ជម្លោះនេះបានក្លាយជាបញ្ហាប្រឈមថ្មីមួយទៀត ដែលកំពុងញាំញីតំបន់មជ្ឈិមបូព៌ា ខណៈសង្គ្រាមអ៊ីស្រាអែល-ហាម៉ាស នៅមិនទាន់មើលឃើញសញ្ញាធូរស្រាល រីឯសហរដ្ឋអាមេរិក ក៏កំពុងបាញ់សន្ធាប់ឥតដកដៃផងដែរ លើក្រុមឧទ្ទាមហ៊ូធី នៅប្រទេសយេម៉ែន៕

អត្ថបទ៖ សុខ សុវណ្ណ

ចុចអាន៖ ប៉ាគីស្ថាន គំរាម អ៊ីរ៉ង់ អាចឈានដល់ស្ថានការណ៍ធ្ងន់ ក្រោយបាញ់មីស៊ីល​ចូលទឹកដីខ្លួន