រញ្ជួយដីនៅជប៉ុន អ្នករបួសកើនដល់១៤៦នាក់ខណៈអគ្គិសនីត្រូវបានកាត់ផ្តាច់

កិច្ចខិតខំប្រឹងប្រែងស្តារឡើងវិញកំពុងធ្វើឡើងនៅភាគខាងជើងប្រទេសជប៉ុន បន្ទាប់ពីការរញ្ជួយដីកម្រិត៧.៣រ៉ិចទ័រវាយប្រហារនៅទីក្រុង Fukushima ដែលបណ្តាលឲ្យមនុស្សជាងមួយរយនាក់រងរបួសនិងនាំឲ្យមានការដាច់ចរន្តអគ្គិសនីនៅទូទាំងតំបន់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើយោងតាមទូរទស្សន៍ NHK បានឲ្យដឹងថា មនុស្សយ៉ាងតិច១៤៦នាក់បានរងរបួសប៉ុន្តែមិនមានរបាយការណ៍អំពីការស្លាប់ទេ។ ក្រុមហ៊ុនថាមពលនានា មិនបានរាយការណ៍អំពីការខូចខាតដល់រោងចក្រថាមពលនុយក្លេអ៊ែរនៅក្នុងតំបន់ទេ។ រោងចក្រថាមពលកម្តៅប្រហែល១៣នៅ Fukushima និង Miyagi ត្រូវដាច់អ៊ីនធើណិតបន្ទាប់ពីការរញ្ជួយដី។

ទីភ្នាក់ងារឧតុនិយមជប៉ុនបាននិយាយថា ការរញ្ជួយដីកាលពីថ្ងៃអាទិត្យ បានវាយប្រហារតំបន់ Tohoku ដែលមានចម្ងាយ២២០គីឡូម៉ែត្រពីភាគខាងជើងទីក្រុងតូក្យូ។

ការរញ្ជួយដីនេះបានកើតឡើងមិនដល់មួយខែ មុនខួប១០ឆ្នាំនៃគ្រោះរញ្ជួយដីនិងរលកយក្សស៊ូណាមិដែលនាំឲ្យមានការផ្ទុះនៅចង្ក្រាននុយក្លេអ៊ែរចំនួន៣នៃរោងចក្រ Fukushima Dai-ichi និងបណ្តាលឲ្យមនុស្សស្លាប់ឬបាត់ខ្លួនប្រមាណ១៩,០០០នាក់។

មនុស្សជាង៨៣០,០០០គ្រួសារនៅតំបន់ Tohoku និង Kanto គ្មានអគ្គិសនីប្រើប្រាស់ប៉ុន្តែតំបន់ខ្លះត្រូវបានតភ្ជាប់ឡើងវិញកាលពីអាទិត្យ។ តំបន់មួយចំនួននៅ Fukushima នៅតែគ្មានទឹកប្រើប្រាស់។

ក្រុមហ៊ុន East Japan Railway Co បាននិយាយថា រថភ្លើងល្បឿនលឿននិងសេវាកម្មរថភ្លើងក្នុងស្រុករបស់ខ្លួនមួយចំនួននៅតែត្រូវបានផ្អាករហូតដល់ថ្ងៃចន្ទដោយសារតែការខូចខាតដល់ខ្សែអគ្គិសនី។ ខ្សែរថភ្លើងល្បឿនលឿន Tohoku Shinkansen ត្រូវការពេលវេលា១០ថ្ងៃដើម្បីដំណើរការសេវាកម្មរបស់ខ្លួនឡើងវិញ៕

ប្រែសម្រួលដោយ៖ Vann Vann

ប្រភព៖ Bangkok Post