លោកខាងលិច ព្រមានផ្ទុះសង្គ្រាមជាមួយ ៤ប្រទេស អំឡុង៥ឆ្នាំនេះ

រដ្ឋមន្ត្រីការពារជាតិចក្រភពអង់គ្លេស លោក Grant Shapps បានប្រកាសដោយចំហថា ពិភពលោកគួរត្រៀមលក្ខណៈព្រោះអំឡុង៥ឆ្នាំនេះ សង្គ្រាមជាសកលនឹងផ្ទុះឡើងរវាងប្រទេសលោកខាងលិច ជាមួយរុស្ស៊ី ចិន អ៊ីរ៉ង់ និងកូរ៉េខាងជើង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្របពេលជាមួយគ្នានោះ តាមការចុះផ្សាយរបស់ BBC, លោក Shapps បានអំពាវនាវដល់បណ្តាសម្ព័ន្ធមិត្តរបស់អង់គ្លេស ឲ្យបង្កើនកញ្ចប់ចំណាយយោធារបស់ខ្លួនដើម្បីឆ្លើយតបទៅនឹងការគំរាមកំហែង ដែលកំពុងកើតឡើង ហើយក៏ប្តេជ្ញាបង្កើនការចំណាយផ្នែកយោធារបស់ចក្រភពអង់គ្លេសបន្ថែមទៀត ក៏ដូចជាប្រើប្រាស់ឥទ្ធិពលរបស់ខ្លួនដើម្បីធានាសុវត្ថិភាពជូនសម្ព័ន្ធមិត្តនិងមិត្តភ័ក្តិផ្សេងទៀតផងដែរ។

លោកលើកឡើងថា “អំឡុងពេល៥ឆ្នាំនេះ យើងអាចឃើញឈុតឆាកសង្គ្រាមជាមួយរុស្ស៊ី ចិន អ៊ីរ៉ង់ កូរ៉េខាងជើង។ សួរខ្លួនឯងមើល ហើយសូមក្រឡេកមើលជម្លោះទូទាំងពិភពលោកនាពេលសព្វថ្ងៃនេះទៅ តើវាទំនងជាកើនជម្លោះទៀតឬក៏ថមចុះ? យើងទាំងអស់គ្នាប្រហែលជាដឹងហើយថា វានឹងកើនឡើងជាបន្ត។ ២០២៤នេះហើយ ជាឆ្នាំបញ្ឆេះសង្គ្រាម”។

ទោះបីជាយ៉ាងណាក៏ដោយ លោក Shapps មិនបញ្ជាក់ច្បាស់ទេថាតើជម្លោះជាមួយរុស្ស៊ី ចិន អ៊ីរ៉ង់ និងកូរ៉េខាងជើងអាចបង្កឲ្យមានផលប៉ះពាល់និងជះឥទ្ធិពលអ្វីខ្លះ។

សូមជម្រាប លោក Shapps មិនមែនជាឥស្សរជនជាន់ខ្ពស់របស់ចក្រភពអង់គ្លេសទី១ទេ ដែលព្យាករអំពីសង្គ្រាមទ្រង់ទ្រាយធំក្នុងពេលឆាប់ៗនេះ។ គេចាំបានថា កាលពីឆ្នាំ២០២២ ឧត្តមសេនីយ៍ Patrick Sanders ប្រធានអគ្គសេនាធិការរបស់ចក្រភពអង់គ្លេសក៏ប្រកាសដែរថា “អង់គ្លេសចាំបាច់ត្រូវសាងទ័ពដែលមានសមត្ថភាពប្រយុទ្ធជាមួយសម្ព័ន្ធមិត្ត និងបំបាក់រុស្ស៊ីក្នុងសមរភូមិ ហើយត្រូវត្រៀមលក្ខណៈឲ្យមែនទែនចំពោះការផ្ទុះជម្លោះជាថ្មីនៅក្នុងទ្វីបអឺរ៉ុប”។

បច្ចុប្បន្នេះ ពិភពលោកកំពុងធ្លាក់ចូលទៅក្នុងភ្លើងសង្គ្រាមរាប់ចាប់ពីជម្លោះនៅអឺរ៉ុបរវាងរុស្ស៊ីនិងអ៊ុយក្រែន ទៅដល់តំបន់មជ្ឈិមបូព៌ាដូចជាសង្គ្រាមអ៊ីស្រាអែល-ហ្គាហ្សាជាដើម។

លើសពីនេះ ជម្លោះក៏ផ្ទុះឡើងនៅយេម៉ែនផងដែរ ដែលជាការបាញ់គ្នារវាងសហរដ្ឋអាមេរិក ជាមួយក្រុមហ៊ូធី ហើយស្ថានការណ៍នៅលីបង់ អ៊ីរ៉ង់ ប៉ាគីស្ថាន ចិន តៃវ៉ាន់ និងឧបទ្វីបកូរ៉េ ក៏ត្រូវបានគេតាមដានថា កំពុងមិនស្រួលដែរ៕

អត្ថបទ៖ សុខ សុវណ្ណ

ចុចអាន៖ អ៊ុយក្រែន បើកចិត្តយកដំណោះស្រាយសន្តិភាព ១២ ចំណុចរបស់ ចិន ដើម្បីបញ្ចប់ភ្លើងសង្គ្រាមជាមួយ រុស្ស៊ី