អាល្លឺម៉ង់ ថា ទ័ពលោក ពូទីន នឹងវាយលុកអង្គការណាតូ ៥ ទៅ ៨ ឆ្នាំទៀត

រដ្ឋមន្ត្រីការពារជាតិអាល្លឺម៉ង់លោក Boris Pistorius កាលពីថ្ងៃសុក្របានចេញការព្រមានថា ក្នុងរយៈពេលប្រមាណជា ៥ ទៅ ៨ ឆ្នាំខាងមុខ កម្លាំងទ័ពរបស់លោកប្រធានាធិបតីរុស្ស៊ី វ្ល៉ាឌីមៀរ ពូទីន នឹងអាចបើកការវាយប្រហារទៅលើបណ្ដាប្រទេសអង្គការណាតូ ។ នេះបើយោងតាមការចុះផ្សាយរបស់សារព័ត៌មានអាមេរិក Politico កាលពីថ្ងៃទី១៩ ខែមករា ។

ថ្លែងនៅក្នុងបទសម្ភាសន៍ជាមួយកាសែតអាល្លឺម៉ង់ Der Tagesspiegel, លោក Pistorius បានលើកឡើងថា “យើងបានឮការគំរាមកំហែងពីវិមានក្រឹមឡាំងស្ទើរតែរៀងរាល់ថ្ងៃ ដូច្នេះយើងចាត់ទុកវោហារស័ព្ទរបស់លោក វ្ល៉ាឌីមៀរ ពូទីន អាចនឹងផ្ទុះភ្លើងសង្គ្រាមលើប្រទេសណាតូនៅថ្ងៃណាមួយជាក់ជាមិនខាន ប៉ុន្តែវាមិនមែនឆេះឆួលនៅពេលនេះនោះទេ អាចពី ៥ ទៅ ៨ ឆ្នាំខាងមុខ” ។

ការកត់សម្គាល់របស់លោករដ្ឋមន្ត្រីការពារជាតិអាល្លឺម៉ង់រូបនេះ គឺស្របគ្នាទៅនឹងការព្រមានរបស់លោករដ្ឋមន្ត្រីការពារជនស៊ីវិលរបស់ប្រទេសស៊ុយអែត Carl-Oskar Bohlin ដែលលើកឡើងថា “សង្រ្គាមអាចនឹងទៅលេងស៊ុយអែតគ្រប់វិនាទីទាំងអស់” ។

លោក Pistorius បានប្រាប់កាសែត Der Tagesspiegel ទៀតថា “ការព្រមានរបស់ស៊ុយអែតគឺអាចយល់ច្បាស់បានពីទស្សនវិស័យរបស់បណ្ដាប្រទេស Scandinavian ប៉ុន្តែស៊ុយអែតក៏ត្រូវត្រៀមចិត្តត្រៀមកាយប្រឈមមុខនឹងស្ថានភាពកាន់តែធ្ងន់ធ្ងរពីការវាយលុករបស់រុស្ស៊ីផងដែរ ព្រោះថា ស៊ុយអែត​មិន​ទាន់ក្លាយខ្លួន​ជា​សមាជិកអង្គការ​ណាតូ​នៅឡើយទេ ពោលត្រូវ​រង់ចាំការបន្ទន់ចិត្តពីតួកគី និង​ហុងគ្រី” ។

ស្របពេលជាមួយគ្នានេះកាសែតអាល្លឺម៉ង BILD ក៏បានរាយការណ៍ដែរថា រដ្ឋាភិបាលអាល្លឺម៉ង់កំពុងរៀបចំផែនការសម្ងាត់សម្រាប់ការលុកលុយណាមួយរបស់រុស្ស៊ីទៅលើអង្គការណាតូ ខណៈក្រសួងការពារជាតិក៏កំពុងរៀបជើងព្រួលសម្រាប់សង្គ្រាមនៅអឺរ៉ុបដូចគ្នា ខណៈដើម្បីជាការឆ្លើយតបទៅនឹងការគំរាមកំហែងដែលកំពុងឆាបឆួលនេះ ផែនការរបស់អង្គការណាតូគឺនឹងដាក់ពង្រាយកម្លាំទ័ពរបស់ខ្លួនទៅកាន់អឺរ៉ុបខាងកើត ការពារកុំឲ្យភ្លើងសង្គ្រាមឆេះបន្ថែមនៅក្នុងតំបន់ ៕

ដោយ ៖ សុខ ជីវ័ន្ត

ចុចអាន ៖ កូនប្រុសប្រធានាធិបតី ឥណ្ឌូណេស៊ី រងពាក្យនិន្ទាឲ្យលាលែងពីតំណែង​ជាអភិបាលក្រុង ដោយសារឈប់ញឹកពេក