ព័ត៌មានអន្ដរជាតិ

រដ្ឋមន្ត្រីការបរទេស រុស្ស៊ី ជិះយន្តហោះជិត ១៣ ម៉ោងទៅ អាមេរិក ប្រជុំរឿងភ្លើងសង្គ្រាមនៅអ៊ុយក្រែន

បានផុស

៥ ខែ មុន

នៅ

ថ្ងៃចន្ទ ២២ មករា ២០២៤

ដោយ

រដ្ឋមន្ត្រីការបរទេសរុស្ស៊ីលោក Sergey Lavrov បានអញ្ជើញទៅដល់ទីក្រុងញូវយ៉ក ជាទីដែលលោកនឹងចូលរួមក្នុងកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិស្តីពីភ្លើងសង្គ្រាមនៅមជ្ឈិមបូព៌ា និងអ៊ុយក្រែន បន្ទាប់ពីចាយពេលហោះហើរ ១២ ម៉ោង និង ៤៥ នាទី ។ នេះបើយោងតាមការចុះផ្សាយដោយសារព័ត៌មាន TASS នៅថ្ងៃទី២២ ខែមករានេះ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដំណើរទស្សនកិច្ចរបស់លោករដ្ឋមន្ត្រីទៅកាន់អង្គការសហប្រជាជាតិនឹងមានរយៈពេលពីថ្ងៃទី២២ ដល់ថ្ងៃទី ២៤ ខែមករា ហើយលោកនឹងអញ្ជើញចូលរួមដោយផ្ទាល់នៅក្នុងកិច្ចពិភាក្សារបស់ក្រុមប្រឹក្សាសន្តិសុខអង្គការសហប្រជាជាតិស្តីពីស្ថានភាពនៅមជ្ឈិមបូព៌ា និងកិច្ចប្រជុំស្តីពីភ្លើងសង្គ្រាមនៅអ៊ុយក្រែនផងដែរ ។

ស្របពេលជាមួយគ្នានេះ សារព័ត៌មាន Sputnik ក៏បានចុះផ្សាយដែរថា លោករដ្ឋមន្ត្រីការបរទេសរុស្ស៊ី Sergey Lavrov មិនមានគម្រោង ឬកិច្ចប្រជុំទ្វេភាគីជាមួយនឹងរដ្ឋមន្ត្រីការបរទេសសហរដ្ឋអាមេរិកលោក Antony Blinken នោះទេ ដោយសារតែគោលនយោបាយអរិភាពរបស់អាមេរិកនៅតែបន្តដាក់គំនាបមកលើរុស្ស៊ី ។

ទោះយ៉ាងណា យោងតាមការសារព័ត៌មាន CNN បានចុះផ្សាយកាលពីខែមីនា ឆ្នាំ២០២៣ ថា រដ្ឋមន្ត្រីការបរទេសទាំងពីរក៏ធ្លាប់ជួបពិភាក្សាការងារមួយចំនួនផងដែរនៅខាងក្រៅកិច្ចប្រជុំក្រុមប្រទេស G20 ដែលរៀបចំឡើងក្នុងទីក្រុងញូវដេលីប្រទេសឥណ្ឌា ខណៈការជួបតទល់មុខគ្នានៅពេលនោះគឺកើតឡើង ចំពេលភ្លើងសង្គ្រាមនៅអ៊ុយក្រែនអូសបន្លាយពេល ១ ឆ្នាំ ក៏ដូចជាផ្ទុះភាពតានតឹងខ្លាំងបំផុតមិនធ្លាប់មានរវាងទីក្រុងវ៉ាស៊ីនតោន និងទីក្រុងមូស្គូក្នុងរយៈពេលជាច្រើនទសវត្សរ៍ ។

គួរបញ្ជាក់ថា លោក Sergey Lavrov បានធ្វើដំណើរទស្សនកិច្ចលើកចុងក្រោយបំផុតទៅកាន់ទឹកដីនៃទីក្រុងញូវយ៉ករបស់សហរដ្ឋអាមេរិកកាលពីខែកញ្ញា ឆ្នាំ ២០២៣ ដើម្បីចូលរួមសម័យប្រជុំលើកទី ៧៨ នៃមហាសន្និបាតអង្គការសហប្រជាជាតិ ៕