អាមេរិក-អង់គ្លេស រួមកម្លាំងគ្នាជាថ្មី បើកការវាយប្រហារលើក្រុម ហ៊ូធី នៅ យេម៉ែន

សេចក្តីប្រកាសរបស់មន្ទីរបញ្ចកោណកាលពីថ្ងៃចន្ទទី២២ខែមករា បានឲ្យដឹងថា សហរដ្ឋអាមេរិកនិងចក្រភពអង់គ្លេស បានរួមកម្លាំងគ្នាជាថ្មី បើកការវាយប្រហារអាកាសមិនបន្ធូរដៃ លើទីតាំងក្រុមហ៊ូធី ៨កន្លែងនៅក្នុងប្រទេសយេម៉ែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសេចក្តីប្រកាសដែលផ្សាយដោយ BBC, ការវាយប្រហារនោះ បានកំណត់គោលដៅលើឃ្លាំងក្រោមដី ទីតាំងមីស៊ីល និងមជ្ឈមណ្ឌលឈ្លបយកការណ៍របស់ចលនាសកម្មប្រយុទ្ធនេះ។

នេះគឺជាប្រតិបត្តិការរួមគ្នាជាលើកទីពីររវាងអាមេរិកនិងអង់គ្លេស ដើម្បីប្រឆាំងឧទ្ទាមហ៊ូធី បន្ទាប់ពីក្រុមនេះ បាញ់ប្រហារលើកប៉ាល់ដឹកទំនិញក្នុងសមុទ្រក្រហមមិនស្រាកស្រាន្ត ហើយឥឡូវ មន្ទីរបញ្ជកោណព្រមានខ្លាំងៗថា មីស៊ីលនឹងហោះទៅយេម៉ែនឥតឈប់ បើពួកគេនៅតែបន្តសកម្មភាពដ៏គឃ្លើននេះ។

ត្បិតការវាយប្រហាររវាងអាមេរិកនិងអង់គ្លេស ទើបតែជាលើកទីពីរក៏ដោយ ប៉ុន្តែក្រោយប្រតិបត្តិការរួមគ្នាលើកទីមួយកាលពី១០ថ្ងៃមុន ទីក្រុងវ៉ាស៊ីនតោន ក៏បន្តបាញ់សន្ធាប់តែម្នាក់ឯង លើក្រុមហ៊ូធី នៅប្រទេសយេម៉ែនដែរ ពោលគឺអាមេរិកតែឯង បានបាញ់ចំនួន៨លើកហើយ។

ពាក់ព័ន្ធការវាយប្រហារចុងក្រោយនេះ មន្ទីរបញ្ចកោណនិយាយថា “យើងនៅតែមានគោលបំណងដដែល នោះគឺត្រូវបន្ថយភាពតានតឹង និងស្ដារស្ថិរភាពក្នុងសមុទ្រក្រហមឡើងវិញ ប៉ុន្តែយើងសូមព្រមានថ្នាក់ដឹកនាំក្រុមហ៊ូធីជាថ្មី៖ យើងនឹងមិនស្ទាក់ស្ទើរក្នុងការការពារជីវិត និងលំហូរសេរីនៃពាណិជ្ជកម្មនៅក្នុងដែនទឹកដ៏សំខាន់បំផុតមួយរបស់ពិភពលោក ដែលកំពុងប្រឈមមុខនឹងការគំរាមកំហែងជាបន្តបន្ទាប់ នោះទេ”។

សូមជម្រាបជាថ្មី ក្រុមហ៊ូធី បានចាប់ផ្តើមបាញ់លើកប៉ាល់ពាណិជ្ជករក្នុងខែវិច្ឆិកាឆ្នាំ២០២៣ ដោយនិយាយថា ពួកគេឆ្លើយតបទៅនឹងប្រតិបត្តិការជើងគោករបស់យោធាអ៊ីស្រាអែលនៅតំបន់ហ្គាហ្សា។

ចាប់តាំងពីពេលនោះមក ក្រុមនេះបានបើកការវាយប្រហាររាប់សិបលើក លើកប៉ាល់ដឹកប្រេងពាណិជ្ជកម្មឆ្លងកាត់សមុទ្រក្រហម ដែលជាផ្លូវដឹកជញ្ជូនដ៏មមាញឹកបំផុតមួយរបស់ពិភពលោក៕

អត្ថបទ៖ សុខ សុវណ្ណ

ចុចអាន៖ អាមេរិក មិនអាចបញ្ឈប់ក្រុមហ៊ូធី ពីការវាយប្រហារកប៉ាល់ដឹកទំនិញ នៅសមុទ្រក្រហម បានទេ