ព័ត៌មានអន្ដរជាតិ

ប៉ូលិស វៀតណាម តាមចាប់មេអណ្ដើកជួញដូរមនុស្ស ៥ នាក់ចូលទឹកដី ឡាវ

បានផុស

១១ ខែ មុន

នៅ

ថ្ងៃអង្គារ ២៣ មករា ២០២៤

ដោយ

អាជ្ញាធរប៉ូលិសខេត្ត Gia Lai ភាគកណ្តាលនៃប្រទេសវៀតណាម បានប្រកាសតាមចាប់ស្ត្រីវ័យ ២៥ ឆ្នាំម្នាក់ឈ្មោះ Vu Thi Khanh Huyen ដោយចោទប្រកាន់ពីបទឆបោក និងជួញដូរមនុស្ស ៥ នាក់ លក់ឲ្យអាជីវកម្មល្បែងអនឡាញនៅក្នុងទឹកដីឡាវ ។ នេះបើយោងតាមសារព័ត៌មាន VN Express ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរបាយការណ៍ពីប៉ូលិសបានឲ្យដឹងថា កាលពីកំឡុងខែវិច្ឆិកា ឆ្នាំ២០២២ ដល់ខែមិថុនា ឆ្នាំ២០២៣ ស្រ្តីឈ្មោះ Huyen បានបញ្ចុះបញ្ចូលជនរងគ្រោះខាងលើដែលមានអាយុខ្ទង់ ២៣ ទៅ ២៦ ឆ្នាំដោយសន្យាឲ្យពួកគេបានធ្វើការនៅក្នុងក្រុមហ៊ុនកែសម្ផស្សមួយកន្លែងក្នុងទឹកដីប្រទេសមីយ៉ាន់ម៉ា ដែលឈ្មោះ Huyen អះអាងថាជាក្រុមហ៊ុនរបស់ខ្លួន។

ជនរងគ្រោះទាំង ៥ នាក់បានជឿជាក់លើនាង Huyen ហើយយល់ព្រមទៅធ្វើការ ដោយមានមេក្លោងរូបនេះជាអ្នករៀបចំឯកសារប៉ាស្ព័រ និងសំបុត្រយន្តហោះទៅទីក្រុង Yangon ក្នុងឆ្នាំ ២០២៣ កន្លងទៅ ។ ក្រោយពេលចូលដល់ទឹកដីមីយ៉ាន់ម៉ា ឈ្មោះ Huyen បានរឹបអូសយកប៉ាស្ព័រជនរងគ្រោះ ហើយដាក់បញ្ជូនពួកគេក្នុងឡាន រួចជួញដូរលក់ទៅក្នុងទឹកដីប្រទេសឡាវ ។

នៅក្នុងទឹកដីឡាវ Huyen បានលក់ជនរងគ្រោះឲ្យក្រុមហ៊ុនល្បែងអនឡាញខុសច្បាប់ ដែលពួកគេត្រូវបានចាក់សោរបង្ខាំង និងបង្ខំឲ្យប្រព្រឹត្តសកម្មភាពបោកបញ្ឆោតតាមអនឡាញ តាមរយៈល្បែងស៊ីសង និងគេងបន្លំលុយអ្នកលេងល្បែងភ្នាល់ ខណៈអ្នកណាដែលមិនព្រមធ្វើតាមនឹងត្រូវរងទារុណកម្មផ្សេងៗ ។

របាយការណ៍ប៉ូលិសបន្ថែមថា ករណីជនរងគ្រោះដែលចង់ឲ្យគេដោះលែងត្រឡប់ទៅផ្ទះវិញ គឺត្រូវបង់លុយប្រមាណ ២១០ លានដុង (ប្រហែល ៨,៥៥០ ដុល្លារ) ។

ក្រោយពេលត្រូវប៉ូលិសចោទពាក់ព័ន្ធនឹងករណីខាងលើនេះ ជនជាប់ចោទ Huyen បានរត់គេចខ្លួន និងភៀសខ្លួនចេញពីប្រទេស ។ យ៉ាងណាក្តី ប៉ូលិសខេត្ត Gia Lai របស់វៀតណាម បានចេញដីកាអនុញ្ញាត ក្នុងករណីនរណាបានឃើញ Huyen គឺអាចឃាត់ខ្លួននាង និងទាក់ទងមកខាងប៉ូលិសតែម្តង ។

គួររំឭកថា ការជួញដូរមនុស្សក្រោមរូបភាពផ្សេងៗក្នុងតំបន់អាស៊ីអាគ្នេយ៍ បានក្លាយជាការគំរាមកំហែងសន្តិសុខសុវត្ថិភាពក្នុងតំបន់ ដែលមានបណ្តាញឧក្រិដ្ឋជន រកស៊ីបញ្ឆោតមនុស្សធ្វើការខុសច្បាប់ក្នុងសកម្មភាពផ្សេងៗ ជាក់ស្តែងមនុស្សរាប់រយ រាប់ពាន់នាក់បានធ្លាក់ខ្លួនជាជនរងគ្រោះ ដោយសារការបោកបញ្ឆោតជាប្រព័ន្ធរបស់ក្រុមរកស៊ីទុច្ចរិត៕

ដោយ៖ មាន រតនា