តើទីក្រុងណា ស្ទះចរាចរណ៍ខ្លាំងជាងគេ នៅអាស៊ីអាគ្នេយ៍? 

ការកកស្ទះចរាចរណ៍ គឺជាបញ្ហាធំមួយដែលប្រទេសជាច្រើននៅលើពិភពលោក កំពុងជួបប្រទះ ហើយបើតាមរបាយការណ៍របស់ Tomtom Traffic Index បានបង្ហាញថា រដ្ឋធានីម៉ានីលរបស់ប្រទេសហ្វីលីពីន គឺជាទីក្រុង មានការកកស្ទះចរាចរណ៍ខ្លាំងបំផុតប្រចាំតំបន់អាស៊ីអាគ្នេយ៍ ក្នុងឆ្នាំ២០២៣។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរបាយការណ៍ដែលផ្សាយបន្តដោយ​ Facebook Page ឈ្មោះ SEASIA, ទីក្រុងម៉ានីល ឈរនៅលេខ១ក្នុងតំបន់អាស៊ីអាគ្នេយ៍ ហើយឈរលេខ៩ បើគិតជាសកល ជាទីក្រុងមានការកកស្ទះចរាចរណ៍ណែនតាន់តាប់បំផុត ដោយគិតជាមធ្យម ការធ្វើដំណើរចម្ងាយផ្លូវ១០គីឡូម៉ែត្រ ត្រូវចំណាយពេលដល់ទៅ២៧នាទីនិង២០វិនាទីឯណោះ។

រីឯចំណាត់ថ្នាក់លេខ២ បានទៅលើទីក្រុង ហ្សាការតា របស់ប្រទេសឥណ្ឌូណេស៊ី ដោយគិតជាមធ្យម ការធ្វើដំណើរចម្ងាយផ្លូវ១០គីឡូម៉ែត្រ ត្រូវចំណាយពេល២៣នាទីនិង២០វិនាទី ចំណែកលេខ៣បានទៅលើទីក្រុងបាងកកប្រទេសថៃ ដែលចាយពេល២១នាទីនិង៤០វិនាទី សម្រាប់ការធ្វើដំណើរចម្ងាយផ្លូវ១០គីឡូម៉ែត្រ។

ទោះបីជាយ៉ាងណាក៏ដោយ មិនមានរាជធានីភ្នំពេញនៃព្រះរាជាណាចក្រកម្ពុជាឡើយ ក្នុងចំណោមទីក្រុងកកស្ទះចរាចរណ៍ខ្លាំងបំផុតទាំង៥ ប្រចាំតំបន់អាស៊ីអាគ្នេយ៍។

ទីក្រុងទាំង៥នៅអាស៊ីអាគ្នេយ៍ដែលកកស្ទះចរាចរណ៍ខ្លាំងបំផុតមាន៖

1. ម៉ានីល ប្រទេសហ្វីលីពីន
2. ហ្សាការតា ប្រទេសឥណ្ឌូណេស៊ី
3. បាងកក​ ប្រទេសថៃ
4. គូឡាឡាំពួ ប្រទេសម៉ាឡេស៊ី
5. សិង្ហបុរី

សូមបញ្ជាក់ថា មួយឆ្នាំៗពិភពលោក ត្រូវខាតបង់ប្រាក់រយពាន់លានដុល្លារដោយសារបញ្ហាកកស្ទះចរាចរណ៍ ហើយបើនិយាយពីសហរដ្ឋអាមេរិកវិញ ក្នុងឆ្នាំ២០១៩ ប្រទេសនេះ ខាតបង់ប្រាក់អស់៨៨ពាន់លានដុល្លារ ដោយសារបញ្ហាចរាចរណ៍៕

អត្ថបទ៖ សុខ សុវណ្ណ

ចុចអាន៖ ទស្សនៈប្រជាពលរដ្ឋនៅភ្នំពេញ ចំពោះករណីស្ទះចរាចរណ៍បច្ចុប្បន្ន