ព័ត៌មានអន្ដរជាតិ
ហេតុផលទាំងនេះនាំថៃក្លាយជាគោលដៅសម្រាប់អ្នកទេសចរចូលនិវត្តពីលោកខាងលិច
និវត្តជន ឬជនដល់អាយុឈប់សម្រាកតាមច្បាប់ការងារ ជាច្រើនមកពីបណ្តាប្រទេសលោកខាងលិចកំពុងជ្រើសយកតំបន់អាស៊ីត្រូពិច (ប្រទេសតំបន់ក្តៅ) ជាទីកន្លែងចំណាយពេលវេលាចុងក្រោយរបស់ពួកគេ ហើយមានមូលហេតុមួយចំនួនដែលធ្វើឲ្យបណ្តាប្រទេសអាស៊ីក្លាយជាជម្រើសទី ១ ក្នុងពេលវេលាចូលនិវត្តនោះ ។
សារព័ត៌មានអាមេរិក Business Insider បានលើកករណីលោក Jeffrey Ogden ជនជាតិអង់គ្លេស ជាអតីតបុគ្គលិកក្រុមហ៊ុនផ្នែកប្រឹក្សាយោបល់លើជំនាញរកប្រេង និងឧស្ម័នធម្មជាតិ បានជ្រើសយកប្រទេសថៃ ជាជម្រើសចុងក្រោយ បន្ទាប់ពីចំណាយពេល ២ ឆ្នាំស៊ើបរកកន្លែងសមគួរសម្រាប់ចំណាយពេលចូលនិវត្តនេះ ។
លោក Jeffrey Ogden មានវ័យ ៧៥ ឆ្នាំបានរៀបរាប់ប្រាប់សារព័ត៌មានថា កាលពីអាយុ ៧៣ ឆ្នាំ លោកក៏ដូចជាជនចូលនិវត្តពីប្រទេសផ្សេងៗទៀតដែរ ដូចជាអាមេរិក អាល្លឺម៉ង់ ស្វីស បារាំង តែងចំណាយពេលដើរកម្សាន្តទៅប្រទេសនានា ។ ក្នុងនោះប្រទេសអេស្ប៉ាញជាកន្លែងដែលលោកចំណាយពេលច្រើននៅទីនោះ និងចាប់ផ្តើមគិតគូរពីការចំណាយពេលចូលនិវត្តចុងក្រោយនៃជីវិត ។ ទោះបីជាលោកមានកន្លែងសម្រាប់ស្នាក់នៅនៅអេស្ប៉ាញ មានបរិក្ខារសម្រាប់ប្រើប្រាស់គ្រប់គ្រាន់ ប៉ុន្តែចំណាយថ្លៃ គឺជាអ្វីដែលធ្វើឲ្យលោក មិនសម្រេចចិត្តចាយពេលចូលនិវត្តនៅទីនោះ ។
និវត្តជន ជនជាតិអង់គ្លេសរូបនេះ ក៏បានបន្ថែមថា លោកក៏ធ្លាប់ស៊ើបមើលពីការចំណាយផ្សេងៗនៅអាមេរិក អូស្រ្តាលី និងនូវែលហ្សេឡង់ ជាក់ស្តែងលោកទទួលបានសេវាល្អ ប៉ុន្តែការចំណាយនៅតែថ្លៃខ្ពស់សម្រាប់និវត្តជនទេសចរដូចជារូបលោក ។ បន្ថែមពីនោះនៅតំបន់អាស៊ី លោកបានធ្វើដំណើរទៅវៀតណាម ឥណ្ឌូណេស៊ី ម៉ាឡាស៊ី ចុងក្រោយលោកសម្រេចចិត្តជ្រើសយកប្រទេសថៃ ជាកន្លែងស័ក្តិសមបំផុតសម្រាប់លោកផ្ទាល់។
អ្វីដែលទាក់ទាញចិត្តលោកឲ្យផ្លាស់ពីអឺរ៉ុបមកទឹកដីថៃនោះ គឺប្រជាជននៅទីនោះមានការគោរព ពិសេសគឺចំពោះមនុស្សចាស់ ដែលស្ថានភាពនេះពុំសូវមានឡើយនៅទឹកដីប៉ែកអឺរ៉ុបមួយចំនួនឡើយ ។ លោកបានលើកឧទាហរណ៍ ពីការសម្តែងសុជីវធម៌គួរឲ្យគោរព នៅពេលដែលលោកឡើងជិះឡានក្រុងពេញ ក្មេងៗអនុញ្ញាតឲ្យលោកអង្គុយកន្លែង ឯពួកគេនៅឈរជាដើម។ បើនិយាយពីអាហារហូបចុក សម្រាប់លោកផ្ទាល់គឺមានលទ្ធភាពចំណាយលើអាហារបានយ៉ាងសំបូរបែប ។
មិនតែប៉ុណ្ណោះ នៅប្រទេសថៃ គេមានវីសាប្រភេទផ្សេងៗផ្តល់ជាច្រើនជម្រើស សម្រាប់អ្នកដែលចង់ផ្លាស់មកថៃ ជាក់ស្តែងលោក Jeffrey Ogden មានជាប្រភេទវីសាសម្រាប់ចូលនិវត្ត។ បើនិយាយពីសេវាថែទាំសុខភាពវិញ លោកបញ្ជាក់ថា នៅថៃពិតជាផ្តល់ភាពងាយស្រួលដល់លោក សម្រាប់សេវានេះ។ បើទោះបីមន្ទីរពេទ្យច្រើនសហការជាមួយធានារ៉ាប់រងឯកជន ប៉ុន្តែពួកគេយកចិត្តទុកដាក់ថែទាំ ផ្តល់ភាពងាយស្រួល ជួយជ្រោមជ្រែងសម្រួលបញ្ហា មិនថាអតិថិជន ឬមនុស្សចាស់បានយ៉ាងល្អ ហើយការចំណាយទៀតនោះគឺសមរម្យសម្រាប់លទ្ធភាពរបស់លោក។
លោកបានលើកពី មន្ទីរពេទ្យមួយនៅ Hua Hin ដែលលោកសម្រាកព្យាបាលបានផ្តល់នូវសេវាជាកញ្ចប់ រួមមានទាំងបន្ទប់សម្រាក VIP ការសម្រួលមធ្យោបាយធ្វើដំណើរទៅមក អាងហែលទឹក កន្លែងញ៉ាំ សម្រួលកន្លែងស្នាក់នៅជាដើមខណៈសេវាទាំងនេះ លោកមិនអាចចំណាយបានឡើយ បើធៀបនឹងប្រទេសកំណើតនៅលោកខាងលិច ។
ត្រឡប់ទៅនិយាយពីប្រទេសកំណើតរបស់លោកវិញ ការចូលនិវត្តនៅអង់គ្លេស អាចមានរឿងល្អ និងអាក្រក់ទន្ទឹមគ្នា ពោលគឺវាជាផ្ទះប្រទេសមាតុភូមិកំណើតរបស់លោក នៅជិតសាច់ញាតិគ្រួសារបំផុត ប៉ុន្តែអ្វីៗសុទ្ធតែថ្លៃខ្ពស់ សម្រាប់និវត្តជនដូចជារូបលោក។ ពិសេសទៅទៀតនោះ លោកបារម្ភពីនិន្នាការថ្មីនៅអង់គ្លេសគឺ ក្មេងៗមិនសូវគោរព និងយកចិត្តទុកដាក់លើមនុស្សចាស់ឡើយ ហើយករណីនេះ មានដូចគ្នាក្នុងសេវាថែទាំសុខភាព ដែលមិនសូវមានការយកចិត្តទុកដាក់ឡើយ ៕
ដោយ៖ មាន រតនា
-
ព័ត៌មានជាតិ១ សប្តាហ៍ ago
ព្យុះ ប៊ីប៊ីនកា បានវិវត្តន៍ទៅជាព្យុះសង្ឃរា បន្តជះឥទ្ធិពលលើកម្ពុជា
-
ព័ត៌មានជាតិ៤ ថ្ងៃ ago
ព្យុះ ពូលឡាសាន ជាមួយវិសម្ពាធទាប នឹងវិវត្តន៍ទៅជាព្យុះទី១៥ បង្កើនឥទ្ធិពលខ្លាំងដល់កម្ពុជា
-
ព័ត៌មានអន្ដរជាតិ៤ ថ្ងៃ ago
ឡាវ បើកទំនប់ទឹកនៅខេត្ត Savannakhet
-
ព័ត៌មានអន្ដរជាតិ១ សប្តាហ៍ ago
អឺរ៉ុបកណ្តាលនិងខាងកើត ក៏កំពុងរងគ្រោះធ្ងន់ធ្ងរ ដោយទឹកជំនន់ដែរ
-
ព័ត៌មានអន្ដរជាតិ១ សប្តាហ៍ ago
វៀតណាម ប្រាប់ឲ្យពលរដ្ឋត្រៀមខ្លួន ព្រោះព្យុះថែមទៀត នឹងវាយប្រហារ ចុងខែនេះ
-
ព័ត៌មានជាតិ៣ ថ្ងៃ ago
Breaking News! កម្ពុជា សម្រេចដកខ្លួនចេញពីគម្រោងCLV-DTA
-
ព័ត៌មានអន្ដរជាតិ៥ ថ្ងៃ ago
ព្យុះកំបុងត្បូង នឹងវាយប្រហារប្រទេសថៃ នៅថ្ងៃសុក្រនេះ
-
ព័ត៌មានជាតិ៦ ថ្ងៃ ago
ព្យុះចំនួន២ នឹងវាយប្រហារក្នុងពេលតែមួយដែលមានឥទ្ធិពលខ្លាំងជាងមុន ជះឥទ្ធិពលលើកម្ពុជា