ម៉ិកស៊ិក ប្ដឹងក្រុមហ៊ុនផលិតកាំភ្លើង អាមេរិក ក្រោយជួញដូរឲ្យក្រុមគ្រឿងញៀន

តុលាការឧទ្ធរណ៍អាមេរិកបានសម្រេចឲ្យប្រទេសម៉ិកស៊ិកអាចប្តឹងក្រុមហ៊ុនផលិតកាំភ្លើងអាមេរិក និងអ្នកចែកចាយ បន្ទាប់ពីរកឃើញថា ករណីរបស់ម៉ិកស៊ិកដែលដាក់បណ្ដឹងមកកាន់តុលាការគឺជា “ច្បាប់លើកលែង” ដែលជាធម្មតាច្បាប់នេះគឺការពារក្រុមហ៊ុនមិនឲ្យទទួលខុសត្រូវ ។ នេះបើយោងតាម​ការចេញផ្សាយរបស់សារពត៌មាន CNN​ កាលពីថ្ងៃទី​ ២៥ ខែមករាកន្លងទៅ ។

ម៉ិកស៊ិកបានដាក់ពាក្យបណ្តឹងនៅខែសីហា ឆ្នាំ២០២១ ដោយចោទប្រកាន់ក្រុមហ៊ុនផលិតកាំភ្លើងអាមេរិកដែលរួមមានម៉ាក Smith & Wesson, Colt និង Glock ។

ទីផ្សារចែកចាយ និងលក់កាំភ្លើងទាំងនេះបានលក់អាវុធឲ្យក្រុមជួញដូរគ្រឿងញៀនម៉ិកស៊ិក ដែលរួមចំណែកយ៉ាងសំខាន់ដល់ការកើនឡើងនៃអំពើហិង្សាដោយកាំភ្លើងនៅក្នុងប្រទេស បើទោះបីជាមានច្បាប់តឹងរឹងក៏ដោយ ប៉ុន្តែពាក្យបណ្តឹងនេះត្រូវបានច្រានចោលដោយតុលាការអាមេរិកក្នុងខែកញ្ញា ឆ្នាំ ២០២២ ដោយសារច្បាប់ការពារពាណិជ្ជកម្មអាវុធស្របច្បាប់ ។

បណ្តឹងរបស់ម៉ិកស៊ិក គឺជាបណ្តឹងដំបូងដែលប្រឆាំងនឹងឧស្សាហកម្មកាំភ្លើងរបស់សហរដ្ឋអាមេរិក ដោយក្នុងបណ្ដឹងនោះអះអាងថា អាមេរិកបានដឹងអំពីការជួយដូររបស់ឧស្សាហកម្មកាំភ្លើងជាមួយក្រុមជួញដូរអាវុធខុសច្បាប់ ប៉ុន្តែមិនបានធ្វើអ្វីដើម្បីបញ្ឈប់វានោះទេ ។ ផ្ទុយទៅវិញ អាវុធនេះត្រូវបានផលិតឡើង និងដាក់លក់តាមមធ្យោបាយដែលទាក់ទាញដល់ក្រុមជួញដូរខុសច្បាប់បន្ថែមទៀត ។

ពាក្យបណ្តឹងនេះក៏បានអះអាងថា អំពើមនុស្សឃាតនៅម៉ិកស៊ិកបានធ្លាក់ចុះនៅចន្លោះឆ្នាំ ១៩៩៩ និង ២០០៤ ប៉ុន្តែ​បានកើនឡើង​ជា​បន្តបន្ទាប់​ ដោយសារតែ​ការផលិត និង​ការចែកចាយ​អាវុធរបស់អាមេរិក រួមជាមួយនឹងការហាមឃាត់អាវុធដោយសហរដ្ឋអាមេរិកផុតកំណត់ ។

គួរបញ្ជាក់ថា ប្រទេសម៉ិកស៊ិករឹបអូសបានអាវុធដែលផលិត និងជួញដូរចូលដោយអាមេរិក ចន្លោះពី ៣៤២,០០០​ ទៅ​ ៥៩៧,០០០ ដើមជារៀងរាល់ឆ្នាំ ។ ប្រទេសនេះបានអះអាងថា ស្ទើរតែទាំងអស់នៃអាវុធដែលបានរកឃើញពីកន្លែងកើតហេតុឧក្រិដ្ឋកម្ម ៧០ ភាគរយទៅ ៩០ ភាគរយត្រូវបានជួញដូរពីសហរដ្ឋអាមេរិក ៕

អត្ថបទ ៖ ប៊ុន សុភាព