Breaking News! ធ្លាក់យន្តហោះ រុស្ស៊ី ដឹកអ្នកទោសសង្គ្រាម អ៊ុយក្រែន ៦៥ នាក់

ក្រសួងការពារជាតិរុស្ស៊ីបានរាយការណ៍ថា យន្តហោះសម័យសូវៀតប្រភេទ Il-76 ដែលដឹកអ្នកទោសសង្គ្រាមអ៊ុយក្រែនប្រមាណ ៦៥ នាក់ ព្រមទាំងអាកាសយានិក ៦ នាក់ និងអ្នកអមដំណើរ ៣ នាក់ទៀតបានធ្លាក់នៅតំបន់ Belgorod របស់ប្រទេសរុស្ស៊ី ។ នេះបើយោងតាមការចុះផ្សាយដោយសារព័ត៌មាន Sputnik នៅថ្ងៃទី២៤ ខែមករានេះ ។

ក្រសួងការពារជាតិបាននិយាយទៀតថា យន្តហោះ IL-76 របស់កងកម្លាំងដែនអាកាសរុស្ស៊ីដែលដឹកអ្នកទោសសង្គ្រាមអ៊ុយក្រែនដើម្បីយកទៅដោះដូរជាមួយអ្នកទោសរុស្ស៊ី ត្រូវបានបាញ់ទម្លាក់ដោយមីស៊ីលផលិតដោយសហរដ្ឋអាមេរិក Patriot ចំនួន ៣ គ្រាប់ ខណៈគណៈកម្មាការកងទ័ពអាកាសរុស្ស៊ីក៏បានហោះហើរទៅកាន់ទីតាំងកើតហេតុផងដែរ ។

គួរបញ្ជាក់ថា យន្តហោះ IL-76 គឺជាយន្តហោះយោធារុស្ស៊ីដែលត្រូវបានរចនាឡើងដើម្បីដឹកជញ្ជូនទំនិញធំៗ និងធ្ងន់ៗក្នុងរយៈចម្ងាយឆ្ងាយ ហើយវាអាចផ្ទុកទំនិញបានច្រើនជាង ៤០ តោនក្នុងរយៈចម្ងាយ ៣,៦០០ ទៅ ៤,២០០ គីឡូម៉ែត្រ និងមានល្បឿនហោះពី ៧៧០ ទៅ ៨០០ គីឡូម៉ែត្រក្នុងមួយម៉ោង ខណៈលក្ខណៈពិសេសរបស់យន្តហោះនេះ គឺការដឹកជញ្ជូនយោធា ការចាក់ប្រេងនៅលើអាកាស ក៏ដូចជាប្រតិបត្តិការរុករក និងជួយសង្គ្រោះជាដើម ៕

ដោយ ៖ សុខ ជីវ័ន្ត

ចុចអាន ៖ អាមេរិក និងរុស្ស៊ី ផ្ទុះសង្គ្រាមពាក្យសម្ដីដាក់គ្នានៅក្រុមប្រឹក្សាសន្តិសុខ UN ជុំវិញភ្លើងសង្គ្រាម អ៊ុយក្រែន