ព័ត៌មានអន្ដរជាតិ

Breaking News! សមាជិកសភាបក្សកាន់អំណាច កូរ៉េខាងត្បូង ត្រូវជនដៃ ដល់អាយុ ១៥ ឆ្នាំយកដុំថ្មវាយបែកក្បាល

បានផុស

១ year មុន

នៅ

ថ្ងៃព្រហស្បតិ៍ ២៥ មករា ២០២៤

ដោយ

លោកស្រី Bae Hyun-jin សមាជិកសភាមកពីគណបក្សអំណាចប្រជាជន (PPP) ដែលជាបក្សកាន់អំណាចរបស់កូរ៉េខាងត្បូងត្រូវបានជនមិនស្គាល់អត្តសញ្ញាណម្នាក់វាយឲ្យរងរបួសក្បាល ។ នេះបើយោងតាមការចុះផ្សាយដោយទីភ្នាក់ងារព័ត៌មាន Yonhap នៅថ្ងៃទី២៥ ខែមករានេះ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះបានកើតឡើងនៅវេលាម៉ោង ៥ ល្ងាចថ្ងៃទី២៥ ខែមករានេះនៅសង្កាត់ Gangnam ភាគខាងត្បូងទីក្រុងសេអ៊ូល ខណៈយោងតាមជំនួយការរបស់លោកស្រី Bae បានឲ្យដឹងថា អ្នកថ្មើរជើងម្នាក់ភេទប្រុសបានដើរសំដៅមករកលោកស្រី Bae ហើយសួរថា “តើអ្នកជាតំណាងរាស្រ្តឈ្មោះ Bae Hyun-jin មែនទេ?” ហើយបន្ទាប់មកបានយកដុំថ្មទំហំប៉ុនកណ្ដាប់ដៃវាយទៅលើលោកស្រីតែម្ដង ខណៈមូលហេតុមិនទាន់ត្រូវបានគេដឹងនៅឡើយទេ ។

ភ្លាមៗនោះ លោកស្រី Bae បានយកដៃខ្ទប់ឈាម និងត្រូវបានបញ្ជូនទៅកាន់មន្ទីរពេទ្យសាកលវិទ្យាល័យ Soonchunhyang ប៉ុន្តែស្ថានភាពរបស់លោកស្រីគឺមិនគំរាមកំហែងដល់អាយុជីវិតនោះឡើយ ខណៈជនសង្ស័យត្រូវបានប៉ូលិសក្រុង Gangnam ចាប់ខ្លួនភ្លាមៗ ហើយបានអះអាងប្រាប់សមត្ថកិច្ចថា រូបគេមានអាយុ ១៥ ឆ្នាំ ។

គួរបញ្ជាក់ថា ការវាយប្រហារលើលោកស្រី Bae កើតមានឡើងប្រហែល ៣ សប្តាហ៍ប៉ុណ្ណោះ បន្ទាប់ពីលោក Lee Jae-myung មេដឹកនាំគណបក្សប្រជាធិបតេយ្យ (DP) ដែលជាបក្សប្រឆាំងត្រូវជនដៃដល់នាមត្រកូល Kim ហក់ចាក់កញ្ចឹង ក អំឡុងពេលចុះទៅទីក្រុងកំពង់ផែ Busan ភាគអាគ្នេយ៍កាលពីថ្ងៃទី២ មករា កន្លងទៅ ៕

ដោយ ៖ សុខ ជីវ័ន្ត

ចុចអាន ៖ មីយ៉ាន់ម៉ា ប្រហារជីវិតឧត្តមសេនីយ៍ផ្កាយមួយ ៣ រូប ក្រោយលើកទង់ ស ចុះចាញ់ក្រុមឧទ្ទាមទ័ពព្រៃ