ស្ថានភាពកាន់តែវឹកវរ លេចមុខក្រុមទ័ពព្រៃមួយទៀតចេញធ្វើសង្គ្រាមបះ បោរជាមួយរដ្ឋាភិបាលយោធា មីយ៉ាន់ម៉ា

ស្ថានភាពវឹកវរនៅក្នុងប្រទេសមីយ៉ាន់ម៉ាកាន់តែយ៉ាប់យ៉ឺនទៅហើយ បន្ទាប់ពីលេចមុខក្រុមឧទ្ទាមទ័ពព្រៃថ្មីមួយទៀតចេញមកប្រយុទ្ធបះបោរប្រឆាំងនឹងកងកម្លាំងរដ្ឋាភិបាលយោធាមីយ៉ាន់ម៉ាដែលកំពុងបាត់បង់ការគ្រប់គ្រងផ្នែកជាច្រើនរបស់ប្រទេស ។ នេះបើយោងតាមចេញផ្សាយដោយសារព័ត៌មានមីយ៉ាន់ម៉ា The Irrawaddy កាលពីថ្ងៃទី២៦ ខែមករាកន្លងទៅ ។

កម្លាំងទ័ពរបស់រដ្ឋាភិបាលយោធាមីយ៉ាន់ម៉ាកាលពីថ្ងៃសុក្របានបើកការបាញ់បោះគ្រាប់ផ្លោង និងការវាយប្រហារតាមអាកាសលើទីប្រជុំជន Hsihseng ក្នុងតំបន់ស្វយ័ត Pa-O បន្ទាប់ពីកម្លាំងមកពីកងទ័ពរំដោះជាតិ Pa-O (PNLA) និងសម្ព័ន្ធបងប្អូន ៣ នាក់ ឬ “Three Brotherhood Alliance” ចិញ្ចឹមចិត្តដណ្តើមយកទីក្រុងនៅភាគខាងត្បូងរដ្ឋ Shan ពីរដ្ឋាភិបាលយោធា ។

អ្នកស្រុកបាននិយាយថា កងកម្លាំងរបស់រដ្ឋាភិបាលយោធាមីយ៉ាន់ម៉ាបានផ្ទុះការវាយប្រហារតាមផ្លូវអាកាសលើទីប្រជុំជនក្នុងតំបន់ស្វយ័ត Pa-O កាលពីថ្ងៃពុធ ទី២៤ ខែមករា បន្ទាប់ពីសម្ព័ន្ធកងកម្លាំងប្រដាប់អាវុធជនជាតិភាគតិច និងកងទ័ព PNLA រុលចូលទៅក្នុងទីក្រុងនៅពេលព្រឹក ហើយបានដុតប៉ុស្តិ៍ត្រួតពិនិត្យដែលគ្រប់គ្រងដោយទាហានយោធា ។

យន្តហោះ​ចម្បាំង​របស់​​យោធា​មួយ​គ្រឿង​បានចេញប្រតិបត្តិការ​ទម្លាក់​គ្រាប់បែកមកលើទី​ក្រុងមួយ​នេះ​នៅពេល​រសៀល ខណៈការ​ប្រយុទ្ធ​គ្នា​កាន់តែ​ខ្លាំងឡើង​រវាង​កម្លាំង​តស៊ូ​​​យោធាមីយ៉ាន់ម៉ា និង​កងទ័ព PNLA ក៏ផ្ទុះឡើង ​នៅ​ពេល​ល្ងាច ហើយ​បាន​អូស​បន្លាយ​ពេលរហូត​ដល់​ម៉ោង ២ ទៀប​ភ្លឺ ។

កងទ័ព PNLA បាននិយាយថា យន្តហោះយោធាបើកការវាយប្រហារតាមអាកាសមកលើទីប្រជុំជន និងភូមិក្បែរនោះប្រមាណ ២០ លើកកាលពីល្ងាចថ្ងៃព្រហស្បតិ៍ បណ្ដាលឲ្យភ្លើងឆេះផ្ទះប្រជាពលរដ្ឋ ខណៈអ្នកស្រុកបានរត់គេចពីការវាយប្រហារនេះផងដែរ ។ ចំណែកក្រុមអ្នកជួយសង្គ្រោះបាននិយាយថា គិតត្រឹមថ្ងៃសុក្រ អ្នកស្រុកជាង ៩៥ ភាគរយបានភៀសខ្លួន ហើយនៅ​មានជាង ១០០ នាក់ទៀតកំពុង​​រង់ចាំរត់​ចេញពីក្រុង ប៉ុន្តែយោធាបានបិទផ្លូវចេញចូលអស់ទៅហើយ ។

គួរបញ្ជាក់ថា នេះវាជាលើកទីមួយហើយដែលកងកម្លាំងតស៊ូទាំងនេះព្រួតដៃគ្នាវាយប្រហារទីក្រុងដែលគ្រប់គ្រងដោយរដ្ឋាភិបាលនៅភាគខាងត្បូងរដ្ឋ Shan ស្របពេលដែលទីក្រុងជាច្រើននៅភាគខាងជើងនៃរដ្ឋមួយនេះ ត្រូវបានធ្លាក់ក្នុងកណ្ដាប់ដៃសម្ព័ន្ធបងប្អូន ៣ នាក់រួចទៅហើយ ចាប់តាំងពីផ្ទុះប្រតិបត្តិការ Operation 1027 កាលពីថ្ងៃទី២៧ ខែតុលា ឆ្នាំ ២០២៣ ៕

ដោយ ៖ សុខ ជីវ័ន្ត

ចុចអាន ៖ លោក ពូទីន សួរ អ៊ុយក្រែន ថា បាញ់ទម្លាក់យន្តហោះឈ្លើយសឹកថ្ងៃមុនជា​ចេតនា ឬច្រឡំដៃ