ព័ត៌មានអន្ដរជាតិ

គ្រូបង្រៀននៅថៃ ពិន័យសិស្ស៣៦នាក់ ដោយប្រើម្ចុលចាក់មាត់ ខណៈក្មេងមានវ័យត្រឹម៧ឆ្នាំ

បានផុស

១២ ខែ មុន

នៅ

ថ្ងៃអាទិត្យ ២៨ មករា ២០២៤

ដោយ

ឪពុកម្តាយរបស់សិស្សថ្នាក់ទី២ អាយុ៧ឆ្នាំ នៅសាលាមួយក្នុងខេត្តសាមុតប្រាកាន បានដាក់ពាក្យបណ្តឹងទៅប៉ូលិស ក្រោយកូនរួមទាំងមិត្តក្នុងថ្នាក់សរុបមាន៣៦នាក់ ត្រូវគ្រូបង្រៀនស្រីម្នាក់ប្រើម្ចុលចាក់មាត់គំរាម នេះបើយោងតាមការចុះផ្សាយពី Sanook កាលពីថ្ងៃ២៦ ខែមករា ឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមប្រភពដដែលបានរាយការណ៍ថា នាយកសាលាបានណាត់ជួបជាមួយឪពុកម្តាយរបស់សិស្សទាំង៣៦នាក់ នៅក្នុងបន្ទប់ដែលហេតុការណ៍បានកើតឡើង និងថ្លែងថា គាត់ពិតតជាមានអារម្មណ៍សោកស្តាយចំពោះអ្វីដែលបានកើតឡើង ហើយហេតុការណ៍បែបនេះមិនគួរកើតឡើងចំពោះកុមារនៅសាលាឡើយ។ ក្រោយពេលកើតហេតុ លោកបានសាកសួរគ្រូស្រីនោះដំបូង នាងសារភាពថា ពិតជាបានប្រព្រឹត្តមែន។

អាណាព្យាបាលសិស្សមួយរូបត្រូវជាម្តាយមីងរបស់សិស្សបាននិយាយថា ក្មួយរបស់គាត់ត្រឡប់មកពីរៀនវិញនៅពេលល្ងាច។ ពេលនោះក្មួយប្រុសបានប្រាប់គាត់ថារូបគេគ្រូត្រូវពិន័យដោយប្រើម្ជុលចាក់មាត់។ ពេលគាត់ឮដូច្នេះ គាត់ហាក់ភ្ញាក់ផ្អើលយ៉ាងខ្លាំង និងបានចោទសួរទៅក្មួយ តើត្រូវដាក់ទោសបែបណា ទើបក្មួយប្រុសនិយាយថា មិត្តរួមថ្នាក់ហូបស្ករកៅស៊ូក្នុងបន្ទប់ រួចស្ដោះទឹកមាត់។ គ្រូឃើញដូចនេះ ក៏សួរសិស្សក្នុងថ្នាក់ថាអ្នកណាខ្លះញ៉ាំស្ករកៅស៊ូ? ប៉ុន្តែគ្មាននរណាម្នាក់ទទួលយកកំហុសនោះទេ។ បន្ទាប់មក គ្រូបានឲ្យសិស្សអង្គុយជាជួររួចអុជធូប ហើយធ្វើឲ្យសិស្សស្បថ មុននឹងចាក់ម្ជុលចូលមាត់កុមារគ្រប់រូបរហូតដល់មានរបួស ។

ក្រោយមកសាលាបានយកកុមារទាំងអស់ដែលត្រូវបានគ្រូដាក់ទោស ទៅធ្វើតេស្តរកមេរោគនៅមន្ទីរពេទ្យ ហើយនឹងតាមដានស្ថានភាពរបស់កុមារជាបន្តបន្ទាប់ ខណៈពេលដែលការិយាល័យអភិវឌ្ឍន៍សង្គម និងសន្តិសុខមនុស្សផ្តល់ជម្រកដល់កុមារ និងគ្រួសារ ហើយកំពុងព្យាបាលផ្លូវចិត្តរបស់កុមារដែលរងការភិតភ័យពីហេតុការមិនល្អនេះ។

ទោះយ៉ាងណាក៏ដោយ លោកវរសេនីយ៍ឯក Prapas Mangkhang ស្នងការរងនគរបាលខេត្ត Samut Prakan បាននិយាយថា ប៉ូលិសក៏កំពុងស្ថិតក្រោមដំណើរការតាមដាន និងតាមការសាកសួរដំបូងបង្ហាញថាគ្រូបង្រៀន គ្មានចេតនាធ្វើបាបកុមារដល់កម្រិតនោះទេ ហើយគាត់មិនបានគិតថា ការដាក់ទណ្ឌកម្មបែបនេះនឹងធ្វើឲ្យកុមាររងរបួសនោះទេ ។ ការដាក់ទណ្ឌកម្មប្រភេទនេះត្រូវបានធ្វើឡើងជាលើកដំបូង វាគ្រាន់តែជាការបំភិតបំភ័យកុមារឲ្យទទួលយកការពិតប៉ុណ្ណោះ។ ប៉ុន្តែទោះបីជាមានចេតនាឬអត់ គ្រូបង្រៀនស្រីដដែលនោះត្រូវបានសាលាព្យួរការងារ និងត្រូវទទួលទោសតាមច្បាប់ដែលនាងប្រព្រឹត្ត៕