កូនលោក Duterte ថា ប្រធានាធិបតីហ្វីលីពីន ជា មនុស្សខ្ជិល គួរលាលែងតំណែង

នៅក្នុងជម្លោះកាន់តែរីកធំរវាងគ្រួសារមានអំណាចនយោបាយទាំងពីរ, លោក Sebastian Duterte ដែលត្រូវជាកូនប្រុសរបស់អតីតមេដឹកនាំហ្វីលីពីន Rodrigo Duterte បានជំរុញឲ្យប្រធានាធិបតី Ferdinand Marcos Jr លាលែងពីតំណែង ដោយហៅគាត់ថាជាមនុស្សខ្ជិល។ នេះបើតាមសេចក្តីរាយការណ៍របស់ Reuters កាលពីថ្ងៃអាទិត្យទី២៨ខែមករា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Marcos បានសហការជាមួយកូនស្រីលោក Duterte ឈ្មោះ Sara ដោយយកនាងធ្វើជាអនុប្រធានាធិបតីក្នុងការបោះឆ្នោតឆ្នាំ២០២២ ប៉ុន្តែក្រោយមក សម្ព័ន្ធភាពគ្រួសារទាំងពីរហាក់បែកបាក់ ពេលប្រធានាធិបតីថ្មី ងាកចេញពីគោលនយោបាយប្រឆាំងគ្រឿងញៀន និងគោលនយោបាយបរទេសរបស់អ្នកកាន់តំណែងមុន។

លោក Sebastian ដែលជាអភិបាលក្រុង Davao បាននិយាយក្នុងវេទិកាថ្នាក់ដឹកនាំមួយថា ពេលដែលយុទ្ធនាការឪពុករបស់ខ្លួនថមថយ ស្រាប់តែករណីឧក្រិដ្ឋកម្ម បានរើបឡើងសាជាថ្មី។

ពាក់ព័ន្ធការបើកដៃឲ្យសហរដ្ឋអាមេរិកដាក់មូលដ្ឋានយោធា រួមទាំងនៅជិតកោះតៃវ៉ាន់ផងដែរនោះ លោកក៏បានចោទប្រកាន់លោក Marcos ពីបទបង្កគ្រោះថ្នាក់ដល់ប្រជាជនហ្វីលីពីនស្លូតត្រង់ ដោយអនុញ្ញាតឲ្យអាមេរិកចូលប្រទេសផងដែរ។

មិនត្រឹមប៉ុណ្ណឹង លោក Sebastian ថែមទាំងជំទាស់ចំពោះសេចក្តីសម្រេចរបស់លោក Marcos ក្នុងការចាប់ផ្តើមកិច្ចចរចាសន្តិភាពឡើងវិញជាមួយពួកឧទ្ទាមកុម្មុយនិស្តផងដែរ ដោយនិយាយថា លោក Marcos មិនបានដឹងអ្វីទាំងអស់អំពីទុក្ខលំបាករបស់ប្រជាជនដែលរស់នៅក្នុងតំបន់ធ្លាប់ជាមូលដ្ឋានរបស់ពួកឧទ្ទាម។ អ្នកខ្ជិលណាស់! នេះជាមូលហេតុដែលយើងមិនសប្បាយចិត្ត”។

ទោះបីជាយ៉ាងណាក៏ដោយ មិនមានការឆ្លើយតបភ្លាមៗទេ ពីការិយាល័យរបស់ប្រធានាធិបតី Marcos ហើយរឿងនេះ កើតឡើងមុនពេលលោក Marcos ចូលរួមការជួបជុំ ដែលដឹកនាំដោយរដ្ឋាភិបាលក្នុងរដ្ឋធានីម៉ានីល ដើម្បីប្រមែប្រមូលការគាំទ្រសម្រាប់យុទ្ធនាការ “New Philippines” ឈានទៅរកការបោះឆ្នោតពាក់កណ្តាលអាណត្តិ។ 

សម្ព័ន្ធភាពរបស់លោក Marcos ជាមួយគ្រួសារ Duterte ពិតជាមានសារៈសំខាន់ចំពោះជ័យជម្នះជាប្រធានាធិបតីរបស់គាត់ ដូច្នេះទំនាក់ទំនងរបស់ពួកគេអាចមានឥទ្ធិពលទៀត ក្នុងការទាញសំឡេងគាំទ្រមុនការបោះឆ្នោតពាក់កណ្តាលអាណត្តិ និងការបោះឆ្នោតសភាឆ្នាំ២០២៥៕

អត្ថបទ៖ សុខ សុវណ្ណ

ចុចអាន៖ ប្រធានាធិបតី ហ្វីលីពីន នឹងបើកទំព័រថ្មីក្នុងកិច្ចសហប្រតិបត្តិការជាមួយ ចិន