ព័ត៌មានអន្ដរជាតិ

ប្រទេសណាខ្លះក្នុងតំបន់ អាស៊ាន នៅអនុវត្តទោសប្រហារជីវិត?

បានផុស

១ year មុន

នៅ

ថ្ងៃអង្គារ ៣០ មករា ២០២៤

ដោយ

ការកាត់ទោសប្រហារជីវិត ឬទោសប្រហារជីវិត គឺជាទោសបញ្ញត្តិមួយដែលស្ថិតក្នុងប្រធានបទក្តៅក្នុងការជជែកវែកញែកក្នុងទស្សនៈផ្សេងៗគ្នានៅលើពិភពលោក ។ ទោសទណ្ឌដល់ថ្នាក់ត្រូវសម្លាប់យកជីវិតមនុស្សនេះ ដែលមានទាំងនីតិវិធីបាញ់សម្លាប់ ចាក់ថ្នាំសម្លាប់ ឬព្យួរក គឺគេច្រើនអនុវត្តទៅលើបទល្មើសធ្ងន់ធ្ងរ ដូចជាករណី ឃាតកម្ម ឧក្រិដ្ឋកម្មប្រឆាំងមនុស្សជាតិ រំលោភសម្លាប់ ការជួញដូរគ្រឿនញៀន ទោសក្បត់ជាតិជាដើម ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើក្រឡេកទៅមើលតំបន់អាស៊ានវិញ គេសង្កេតឃើញប្រទេសមួយចំនួនរួមទាំងកម្ពុជាផងដែរ បានលុបចោលការអនុវត្តទោសទណ្ឌនេះ ប៉ុន្តែក៏មានប្រទេសមួយចំនួនទៀតនៅតែអនុវត្តទោសប្រហារជីវិត ដោយផ្អែកទៅលើករណីជាក់ស្តែងដែលបង្កឡើងទៅតាមបរិបទរបស់ប្រទេស ។ ទិន្នន័យពីស្ថាប័នអង្គការលើកលែងទោសអន្តរជាតិ Amnesty International គិតត្រឹមឆ្នាំ ២០២២ បានបង្ហាញដូចខាងក្រោមនេះថា៖

ប្រទេសព្រុយណេ ៖ នៅមានទោសប្រហារជីវិតចែងនៅក្នុងច្បាប់ ប៉ុន្តែមិនមានការអនុវត្តគិតក្នុងរយៈពេល ១០ ឆ្នាំកន្លងមកនេះ ។

ប្រទេសមីយ៉ាន់ម៉ា ៖ មានច្បាប់ និងអនុវត្តទោសប្រហារជីវិត ។

ប្រទេសឥណ្ឌូណេស៊ី ៖ នៅមាន និងអនុវត្តទោសប្រហារជីវិត ។

ប្រទេសសិង្ហបុរី ៖ មានច្បាប់ និងអនុវត្តទោសប្រហារជីវិត ។

ប្រទេសថៃ ៖ មានច្បាប់ចែង និងអនុវត្តទោសប្រហារជីវិត ។

ប្រទេសវៀតណាម ៖ មានច្បាប់ចែង និងអនុវត្តទោសប្រហារជីវិត។

ប្រទេសឡាវ ៖ នៅមានច្បាប់ចែងពីទោសប្រហារជីវិត ប៉ុន្តែមិនត្រូវបានយកមកអនុវត្តឡើយក្នុងរយៈពេល ១០ ឆ្នាំចុងក្រោយ។

ប្រទេសម៉ាឡេស៊ី ៖ មានច្បាប់ និងអនុវត្តទោសប្រហារជីវិត ប៉ុន្តែថ្មីៗនេះ ម៉ាឡេស៊ីបានលើកលែងទៅលើករណីមួយចំនួន តួយ៉ាងបទឧក្រិដ្ឋជួញដូរគ្រឿងញៀន ដោយបន្ថយមកត្រឹមជាប់ពន្ធនាគាររយៈពេល ៤០ ឆ្នាំ។

ប្រទេសហ្វីលីពីន៖ មិនមានទោសប្រហារជីវិតឡើយ ។ នៅខែមិថុនា ឆ្នាំ២០០៦ ហ្វីលីពីនក្នុងអាណត្តិលោកប្រធានាធិបតី Arroyo បានសម្រេចចុះហត្ថលេខាអនុម័តច្បាប់លើកលែងទោសប្រហារជីវិត ។

ប្រទេសកម្ពុជា ៖ មិនមានទោសប្រហារជីវិតនោះទេ ។ ប្រទេសកម្ពុជាបានសម្រេចលុបទោសប្រហារជីវិតតាំងពីឆ្នាំ១៩៨៩ ក្នុងសម័យកាលគ្រប់គ្រង និងដឹកនាំដោយរបបសាធារណរដ្ឋប្រជាមានិតកម្ពុជា ហើយព្រះរាជាណាចក្រកម្ពុជាបច្ចុប្បន្ន យោងតាមមាត្រា ៣២ នៃច្បាប់រដ្ឋធម្មនុញ្ញឆ្នាំ ១៩៩៣ ចែងថា៖ “ទោសប្រហារជីវិតមិនត្រូវឲ្យមានឡើយ” ។

យោងតាមទិន្នន័យពីអង្គការដដែលបានឲ្យដឹងថា គិតត្រឹមឆ្នាំ ២០២២ ទោសប្រហារជីវិតក្នុងកម្រិតជាអន្តរជាតិបានកើនឡើង ៥៣ ភាគរយ ស្របពេលដែលប្រទេសចំនួន ៤ បានសម្រេចលុបចោលទោសបញ្ញត្តិមួយនេះចេញពីការអនុវត្ត៕