លោក ពូទីន ប្រកាសថា សម្ព័ន្ធមិត្តរបស់ខ្លួនក្លាយជា មហាអំណាចនុយក្លេអ៊ែរ ហើយ

សារព័ត៌មាន RT បានដកស្រង់សម្តីរបស់លោក វ្ល៉ាឌីមៀរ ពូទីន ដែលនិយាយកាលពីថ្ងៃចន្ទទី២៩ខែមករាថា ពេលនេះសម្ព័ន្ធមិត្តចាក់ទឹកមិនលិចរបស់ខ្លួនគឺប្រទេសបេឡារុស បានចូលរួមជាមួយក្រុមមហាអំណាចនុយក្លេអ៊ែរហើយ បន្ទាប់ពីក្រុមហ៊ុនថាមពលបរមាណូរដ្ឋរុស្ស៊ី Rosatom ជួយទីក្រុង មីនស្កិ៍ បើករោងចក្រថាមពលនុយក្លេអ៊ែរទីមួយរបស់ខ្លួន ប្រកបដោយជោគជ័យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមពិតទៅ ក្រសួងថាមពលបេឡារុស បានបើកភ្លើងខៀវឲ្យប្រតិបត្តិការស្ថានីយនេះ តាំងតែពីខែវិច្ឆិកាមកម្ល៉េះ ខណៈប្រព័ន្ធផ្សព្វផ្សាយបានរាយការណ៍នៅពេលនោះថា ជាមួយនឹងសមត្ថភាពផលិតថាមពលសរុប២៤០០មេហ្គាវ៉ាត់, រោងចក្រនេះត្រូវគេរំពឹងថានឹង ជួយបានរហូតដល់៤០% នៃតម្រូវការថាមពលរបស់ប្រទេសឯណោះ។

ទើបមកដល់ថ្ងៃចន្ទ លោកពូទីន ក៏ប្រកាសថា “នេះគឺជាជំហានដ៏សំខាន់មួយ ឈានឆ្ពោះទៅមុខ។ ការសាងសង់រោងចក្រថាមពលនេះ បាននាំមកនូវឧស្សាហកម្មថ្មីទាំងស្រុងសម្រាប់ប្រទេសជិតខាង។ ​ក្នុង​ន័យ​នេះ បេឡារុស​ពិត​ជា​បាន​ក្លាយ​ជា​មហាអំណាច​នុយក្លេអ៊ែរហើយ”។

មានទីតាំងនៅមិនឆ្ងាយប៉ុន្មានពីទីក្រុង Ostrovets ភាគពាយ័ព្យប្រទេសបេឡារុស, រោងចក្រថាមពលនេះ ត្រូវបានសាងសង់ឡើងនៅចន្លោះឆ្នាំ២០១៣ដល់ឆ្នាំ២០២៣ ដោយក្រុមហ៊ុន Atomstroyexport ដែលជាបុត្រសម្ព័ន្ធរបស់ Rosatom។

យោងតាមសារព័ត៌មាន RIA Novosti, វាគឺជាស្ថានីយថាមពលនុយក្លេអ៊ែរដំបូងគេនៅក្រៅប្រទេសរុស្ស៊ី ដែលប្រើប្រាស់ម៉ាស៊ីនរ៉េអាក់ទ័រនុយក្លេអ៊ែរទំនើបបំផុតជំនាន់ 3+ របស់ Rosatom។

កាលពីឆ្នាំ២០២៣ ទីក្រុងមូស្គូ ក៏បានដាក់អាវុធនុយក្លេអ៊ែរនៅក្នុងប្រទេសបេឡារុសផងដែរ បន្ទាប់ពីទីក្រុងមីនស្កិ៍ ស្នើសុំម្តងហើយម្តងទៀត ព្រោះពេលនោះ ថ្នាក់ដឹកនាំបេឡារុសបានលើកឡើងពីគោលនយោបាយដ៏គឃ្លើនរបស់លោកខាងលិច និងការគំរាមកំហែងដែលបង្កឡើងដោយអាវុធនុយក្លេអ៊ែររបស់សហរដ្ឋអាមេរិក លើទឹកដីសម្ព័ន្ធមិត្តទីក្រុងវ៉ាស៊ីនតោននៅអឺរ៉ុប ខណៈរុស្សីក៏បានបង្ហាញពីការត្រៀមខ្លួនបាញ់មីស៊ីលតបតផងដែរ ដើម្បីការពារបេឡារុស ករណីរងការវាយប្រហារ៕

អត្ថបទ៖ សុខ សុវណ្ណ

ចុចអាន៖ ណាតូ ថា រុស្ស៊ី អាចវាយប្រហារគ្រប់គោលដៅនៅអឺរ៉ុប បើផ្ទុះសង្គ្រាម ជាមួយលោកខាងលិច