អាជ្ញាធរវៀតណាម និងហ្វីលីពីន ព្រមព្រៀងគ្នាបង្កើនកិច្ចសហប្រតិបត្តិការឆ្មាំឆ្នេរសមុទ្រ

អាជ្ញាធរវៀតណាម និងហ្វីលីពីន បានព្រមព្រៀងគ្នាបង្កើនកិច្ចសហប្រតិបត្តិការឆ្មាំឆ្នេរសមុទ្រដើម្បីការពារឧប្បត្តិហេតុដែលអាចនឹងកើតឡើងនឹកស្មានដលនៅក្នុងដែនទឹកជម្លោះនៃសមុទ្រចិនខាងត្បូង។ នេះបើយោងតាមសេចក្ដីរាយការណ៍ពីទីភ្នាក់ងារសារព័ត៌មាន រ៉យទ័រ នៅថ្ងៃទី ៣០ ខែមករា ។

ប្រភពបានឱ្យដឹងថា កិច្ចសហប្រតិបត្តិការនេះ បានធ្វើឡើងបន្ទាប់ពីប្រធានាធិបតីហ្វីលីពីនលោក Ferdinand Marcos Jr. ធ្វើដំណើរទស្សនកិច្ចផ្លូវការណ៍ ទៅកាន់ទីក្រុងហាណូយ ប្រទេសវៀតណាម ដោយភាគីទាំងពីរបានចុះហត្ថលេខាលើអនុស្សរណៈយោគយល់គ្នា ។ ហើយទង្វើ​នេះត្រូវបានគេចាត់ទុកថា ជាការ​ប្រថុយ​នឹង​​ភាព​មិន​ពេញ​ចិត្តពីសំណាក់អាជ្ញាធរ​ចិន។

របាយការណ៍​បញ្ជាក់​ថា កិច្ចសហប្រតិបត្តិការខាងលើរវាងវៀតណាម និងហ្វីលីពីននឹងអនុញ្ញាតឱ្យឆ្មាំឆ្នេរសមុទ្រនៃប្រទេសទាំងពីរធ្វើការបណ្តុះបណ្តាល និងផ្លាស់ប្តូរបទពិសោធន៍គ្នាទៅវិញទៅមក ដើម្បីពង្រឹងការអនុវត្តបេសកកម្មរួមប្រកបដោយប្រសិទ្ធភាព ។

ប្រធានាធិបតី Marcos Jr. បាននិយាយថា ប្រសិនសមុទ្រចិនខាងត្បូងនៅតែជាតំបន់ជម្លោះនោះ ហ្វីលីពីន​ប្ដេជ្ញា​យ៉ាង​មុតមាំ​ក្នុង​ការ​ការពារ​អធិបតេយ្យភាព​ជាតិ​របស់​ខ្លួន និង​ទប់ទល់​នឹង​ការ​ញុះញង់។ រួមជាមួយនឹងការស្វែងរកដំណោះស្រាយជាមួយប្រទេសចិនតាមរយៈការចរចាដោយសន្តិវិធីក្នុងនាមប្រទេសដែលមានសេចក្តីថ្លៃថ្នូរស្មើគ្នា។

សូមបញ្ជាក់​ថា​ វៀតណាម និងហ្វីលីពីន គឺជាអ្នកបះបោរនៅសមុទ្រចិនខាងត្បូង ដែលតែងតែប្រឈមមុខជាមួយឆ្មាំឆ្នេរសមុទ្ររបស់ចិន ហើយប្រការ​នេះ​បាន​នាំ​ឱ្យ​មាន​ជម្លោះ​និង​បន្ត​ធ្លាក់​ចុះ​ទំនាក់ទំនង​ជាមួយ​ចិន ៕

ប្រែសម្រួលដោយ៖ ប៉ោ កុសល
ប្រភព៖ Khaosod