មកដឹង ថ្លៃផាកពិន័យអ្នកបើកបរក្នុងស្ថានភាពស្រវឹង លើសកម្រិតជាតិ​អាល់កុលនៅ វៀតណាម

ខណៈពិធីបុណ្យចូលឆ្នាំថ្មីប្រពៃណី ចិន-វៀតណាម ឆ្នាំ២០២៤ ខិតជិតមកដល់ លោកនាយករដ្ឋមន្ត្រីវៀតណាម Pham Minh Chinh ក៏បានចេញសារអំពាវនាវឲ្យមានការរឹតបន្តឹងកាន់តែខ្លាំងឡើងបន្ថែមទៀតទៅលើការត្រួតពិនិត្យកម្រិតជាតិអាល់កុល និងចាប់ផាកពិន័យដល់អ្នកបើកបរណាដែលល្មើសច្បាប់ និងស្ថិតក្នុងស្ថានភាពស្រវឹង ។

យោងតាមការចុះផ្សាយដោយសារព័ត៌មាន VN Express បានឲ្យដឹងថា ក្រោមច្បាប់បច្ចុប្បន្ន អ្នកបើកបរស្ថិតក្នុងស្ថានភាពស្រវឹង និងផ្ទុកជាតិអាកុលក្នុងកម្រិត ០.៤០ មិល្លីក្រាមក្នុងមួយលីត្រខ្យល់ នឹងចាប់ផាកពិន័យពី ១,២៩៣ ដុល្លារទៅ ១,៧២៤ ដុល្លារ និងព្យួរអាជ្ញាប័ណ្ណបើកបររយៈពេល ២ ឆ្នាំ ខណៈដែលអ្នកដែលបង្កគ្រោះថ្នាក់ក្នុងពេលស្រវឹងអាចប្រឈមនឹងការចោទប្រកាន់ព្រហ្មទណ្ឌផងដែរ ។

ពាក់ព័ន្ធនឹងបញ្ហានេះដែរ ប៉ូលិសចរាចរណ៍វៀតណាមក៏បានដាក់ចេញការរឹតបន្តឹង ក៏ដូចជាបង្កើតគោលដៅត្រួតពិនិត្យចល័តបន្ថែមទៀតនៅតាមដងផ្លូវ ជាពិសេសទីតាំងនៅជិតកន្លែងផឹកស៊ី ដើម្បីមើលថាតើមានអ្នកបញ្ជាយានយន្តរូបណាខ្លះបើកបរក្រោមស្ថានភាពស្រវឹង និងលើសកម្រិតជាតិអាល់កុលដែលនឹងត្រូវចាប់ផាកពិន័យ ។

ប៉ូលិសចរាចរណ៍វៀតណាមបានចាប់ផាកពិន័យមនុស្សចំនួន ៧,៧០០ នាក់ពីបទបើកបរក្នុងស្ថានភាពស្រវឹង ពោលកើនឡើង ៦០០ ភាគរយ បើប្រៀបធៀបនឹងរយៈពេលដូចគ្នាកាលពីឆ្នាំមុន ខណៈក្នុងរយៈពេល ៨ ខែចុងក្រោយក្នុងឆ្នាំ ២០២៣ គ្រោះថ្នាក់ចរាចរណ៍នៅទូទាំងប្រទេសកើតឡើងចំនួន ២២២ ករណី ហើយភាគច្រើនបង្កឡើងដោយអ្នកបើកបរក្នុងស្ថានភាពស្រវឹង ដែលបណ្តាលឲ្យមនុស្ស ៩៩ នាក់ស្លាប់បាត់បង់ជីវិត និង ១៦៨ នាក់របួស ។

គួរបញ្ជាក់ថា ប្រទេសវៀតណាមនឹងប្រារព្ធពិធីបុណ្យចូលឆ្នាំថ្មីរយៈពេល ៧ ថ្ងៃ ចាប់ពីថ្ងៃទី៨ ដល់ថ្ងៃទី១៤ ខែកុម្ភៈ ឆ្នាំ ២០២៤ ខណៈបងប្អូនប្រជាពលរដ្ឋដែលរស់នៅក្រៅប្រទេស ក៏កំពុងសម្រុកហោះហើរមកទឹកដីស្រុកកំណើតដើម្បីប្រារព្ធពិធីបុណ្យ និងជួបជុំក្រុមគ្រួសារផងដែរ ៕

ដោយ ៖ សុខ ជីវ័ន្ត

ចុចអាន ៖ ទេសចរ ចិន នឹងហោះទៅលេង ថៃ ខណៈពលរដ្ឋ កូរ៉េខាងត្បូង ចុះចាយលុយ នៅ វៀតណាម ថ្ងៃចូលឆ្នាំចិន