ព័ត៌មានអន្ដរជាតិ

UN អំពាវនាវម្ចាស់ជំនួយកុំដាក់ពិន័យលើកិច្ចការមនុស្សធម៌នៅប៉ាឡេស្ទីន

បានផុស

១២ ខែ មុន

នៅ

ថ្ងៃពុធ ៣១ មករា ២០២៤

ដោយ

អគ្គលេខាធិការអង្គការសហប្រជាជាតិ (UN) លោក Antonio Guterres បានអំពាវនាវដល់បណ្តាប្រទេសជំនួយលោកខាងលិចកុំឲ្យដាក់ទណ្ឌកម្មលើកិច្ចការមនុស្សធម៌ ពោលគឺបុគ្គលិកទីភ្នាក់ងារជំនួយប៉ាឡេស្ទីន (UNRWA) ។ នេះបើយោងតាមការចុះផ្សាយដោយសារព័ត៌មាន BBC នៅថ្ងៃទី៣១ ខែមករានេះ ។

អគ្គលេខាធិការអង្គការសហប្រជាជាតិ លោក Antonio Guterres

ការអំពាវនាវនេះ បានធ្វើឡើងក្រោយពេលសហរដ្ឋអាមេរិក អង់គ្លេស និងប្រទេសជំនួយសំខាន់ៗផ្សេងៗទៀតបានផ្អាកមូលនិធិសប្បុរសធម៌របស់ខ្លួន បន្ទាប់ពីមានរឿងចោទបុគ្គលិក UN ១៩០ នាក់ពាក់ព័ន្ធនឹងការចូលដៃជើងជាមួយក្រុមឧទ្ទាម បង្កឲ្យកកើតសង្គ្រាមនៅតំបន់ហ្គាហ្សា ។

ទោះជាយ៉ាងណា ចំណាត់ការស៊ើបអង្កេតដោយឯករាជ្យទាក់ទិននឹងរឿងបុគ្គលិក UNRWA ខាងលើនោះកំពុងស្ថិតក្នុងដំណើរការ ។ យ៉ាងណាមិញ ងាកមកមើលជំនួយទៅដល់កិច្ចការងារមនុស្សធម៌នៅតំបន់ហ្គាហ្សាឯណោះវិញ គឺកំពុងរងបញ្ហារង្គោះរង្គើគ្មានស្ថេរភាព ។ ប្រភពព័ត៌មាន BBC បានឲ្យដឹងពីអ្នកនាំពាក្យ UNRWA ថា ប្រសិនបើជំនួយមិនបានទទួលបន្តនោះទេ នោះទីភ្នាក់ងារកិច្ចការមនុស្សធម៌មួយនេះ ក៏មិនអាចមានដំណើរការទៅមុខផុតពីខែកុម្ភៈខាងមុខនេះដែរ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

“ដូចដែលអគ្គលេខាធិការបានប្រកាសរួចហើយ បុគ្គលិក UN ដែលពាក់ព័ន្ធនឹងសកម្មភាពភេរវកម្ម នឺងត្រូវប្រឈមនឹងការទទួលខុសត្រូវ តែទោះបីជាយ៉ាងណា ពួកយើងមិនគួរបញ្ឈប់ដំណើរការអង្គការដើម្បីបម្រើដល់ប្រជាជនដែលកំពុងរងគ្រោះ និងត្រូវការជំនួយនេះទេ” ។ នេះបើតាមក្រុមអ្នកនាំពាក្យគណៈកម្មការអន្តរ-ទីភ្នាក់ងារ UN បានលើកឡើង ។

ការដកជំនួយពី UNRWA គឺនឹងបណ្តាលឲ្យប្រព័ន្ធមនុស្សធម៌អន្តរជាតិបម្រើនៅតំបន់ហ្គាហ្សាដួលរលំ ហើយបញ្ហាសិទ្ធិមនុស្សជាមូលដ្ឋាន និងកើតមានជាបន្តបន្ទាប់នៅលើទឹកដីដែលប្រជាជនប៉ាឡេស្ទីនកំពុងរស់នៅបណ្តោះអាសន្ន និងក្នុងតំបន់មជ្ឈឹមបូព៌ា។

គួររំឭកថា ម្ចាស់ជំនួយសំខាន់ៗដែលទ្រទ្រង់ដល់កិច្ចការមនុស្សធម៌អន្តរជាតិនៅហ្គាហ្សា មានដូចជាសហរដ្ឋអាមេរិក អាល្លឺម៉ង់ អង់គ្លេស សហភាពអឺរ៉ុប ស្វីស និងបណ្តាប្រទេសមួយចំនួននៅអាស៊ី ខណៈក្រោយមានរឿងចោទប្រកាន់បុគ្គលិក UN ថាចូលដៃជើងនឹងក្រុមហាម៉ាស ប្រទេសម្ចាស់ជំនួយទាំងនោះបានព្យួរជំនួយរបស់គេជាបន្តបន្ទាប់ ៕