មនុស្សជិត ១៤០ នាក់ធ្លាក់ខ្លួនឈឺក្រពះពោះវៀន ក្រោយជិះកម្សាន្តលើ​កប៉ាល់ទេសចរណ៍ អង់គ្លេស ២០ យប់

បើយោងតាមរបាយការណ៍ពីមជ្ឈមណ្ឌលគ្រប់គ្រង និងបង្ការជំងឺ (CDC) របស់សហរដ្ឋអាមេរិកបានឲ្យដឹងថា អ្នកដំណើរ និងក្រុមការងារជិត ១៤០ នាក់បានធ្លាក់ខ្លួនឈឺ ក្រោយចំណាយពេល ៣ សប្ដាហ៍លើដំណើរកម្សាន្ត ១០៧ យប់នៅលើកប៉ាល់ទេសចរណ៍ Queen Victoria របស់ក្រុមហ៊ុនអង់គ្លេស Cunard Cruise Line ។ នេះបើតាមសារពត៌មាន CNN បានចេញផ្សាយនៅថ្ងៃទី០២ ខែកុម្ភៈនេះ ។

យោងតាមរបាយការណ៍ មនុស្ស ១៣៩ នាក់ ក្នុងនោះមានអ្នកដំណើរ ១២៣ នាក់ និងសមាជិកនាវិក ១៦  នាក់បានរាយការណ៍ពីរោគសញ្ញាជំងឺក្រពះពោះវៀនដែលរួមមាន រាគ និងក្អួត ខណៈនៅលើកប៉ាល់នោះមានអ្នកដំណើរសរុប ១,៨២៤  នាក់ និងក្រុមការងារ ៩៦៧ នាក់ ។

ពាក់ព័ន្ធនឹងបញ្ហានេះដែរខាងក្រុមហ៊ុន Cunard Cruise Line បាននិយាយថា មានភ្ញៀវមួយចំនួនតូចបានរាយការណ៍ពីរោគសញ្ញានៃជំងឺក្រពះពោះវៀននៅលើកប៉ាល់ Queen Victoria ប៉ុន្តែពេលនេះពួកគេបានបង្កើនការរក្សាអនាម័យ សម្លាប់មេរោគ ដំណើរការពិធីសារសុខភាព និងសុវត្ថិភាពឲ្យបានកាន់តែប្រសើរឡើងភ្លាមៗផងដែរ ដើម្បីធានាបាននូវសុខុមាលភាពរបស់ភ្ញៀវ និងក្រុមការងារទាំងអស់នៅលើកប៉ាល់ ។

ចំណែកអ្នកដំណើរ និងក្រុមការងារលើកប៉ាល់ដែលមានរោគសញ្ញាត្រូវបានដាក់នៅដាច់ដោយឡែកពីគេផងដែរ ខណៈដែលមូលហេតុ​នៃ​ជំងឺ​នេះ ​CDC មិនទាន់​អាចបញ្ជាក់ឲ្យដឹងនៅ​ឡើយទេ ​។

គួរបញ្ជាក់ថា កប៉ាល់ទេសចរណ៍ Queen Victoria ដែលបានចាប់ផ្តើមចេញដំណើរនៅទីក្រុង Southampton ប្រទេសអង់គ្លេសកាលពីថ្ងៃទី១១ ខែមករា បានទៅដល់ទីក្រុង Fort Lauderdale រដ្ឋ Florida កាលពីថ្ងៃទី ២២ ខែមករា និងបន្តដំណើរជាហូរហែទៅកាន់ទីក្រុង Aruba, Guatemala, Cabo San Lucas, San Francisco និង Hawaii និងត្រលប់ចូលចតនៅកំពង់ផែវិញនៅថ្ងៃទី១២ ខែកុម្ភៈ ៕

អត្ថបទ ៖ ប៊ុន សុភាព