ខេត្តផ្ទុះកូវីដខ្លាំងនៅវៀតណាមបញ្ជាឲ្យប្រជាជនស្នាក់នៅផ្ទះជាដាច់ខាត

ប្រជាជន ២ លាននាក់នៅប្រទេសវៀតណាមនឹងត្រូវដាក់ឲ្យស្ថិតនៅក្រោមការរឹតបន្តឹងដែលចាប់ផ្តើមពីថ្ងៃអង្គារ ទី ១៦ ខែកុម្ភៈ នេះតទៅ បន្ទាប់ពីខេត្តភាគខាងជើងមួយនេះបានក្លាយជាចំណុចផ្ទុះខ្លាំងនៃជំងឺកូវីដ ១៩ ។

ប្រព័ន្ធផ្សព្វផ្សាយរដ្ឋបានរាយការណ៍ថា ប្រជាជននៅខេត្ត Hai Duong ត្រូវបានបញ្ជាឲ្យស្នាក់នៅក្នុងផ្ទះរយៈពេល ១៥ ថ្ងៃ ខណៈប្រជាជាតិមួយនេះត្រូវបានគេកោតសរសើរយ៉ាងខ្លាំងចំពោះការដោះស្រាយយ៉ាងជោគជ័យនៃជំងឺកូវីដ ១៩ ។

លោក Suc Khoe Doi Song អ្នកនាំពាក្យក្រសួងសុខាភិបាលប្រទេសវៀតណាមបាននិយាយថា ប្រជាជននៅខេត្ត Hai Duong ត្រូវបានគេស្នើសុំឲ្យស្នាក់នៅក្នុងផ្ទះ ហើយត្រូវចេញទៅក្រៅនៅពេលចាំបាច់ប៉ុណ្ណោះដូចជាទិញអាហារ ឬថ្នាំ ឬទៅធ្វើការនៅតាមរោងចក្រ ឬក្រុមហ៊ុនដែលមិនត្រូវបានស្នើសុំឲ្យបិទ ។

ទន្ទឹមនោះការប្រមូលផ្តុំមនុស្សលើសពី ២ នាក់នឹងត្រូវហាមឃាត់ ខណៈសាលារៀន បារ ភោជនីយដ្ឋាន និងហាងខារ៉ាអូខេដែលត្រូវបានបិទនៅមុនថ្ងៃឈប់សម្រាកបុណ្យចូលឆ្នាំចិនក៏នឹងនៅតែបិទទ្វារ ។ នៅពេលពួកគេត្រូវចេញពីផ្ទះ ពួកគេត្រូវបានណែនាំឲ្យរក្សាគម្លាត ២ ម៉ែត្រពីអ្នកដទៃ ។

បន្ថែមពីលើការណែនាំអំពីគម្លាតសង្គម អាជ្ញាធរខេត្ត Hai Duong បានស្នើឲ្យប្រជាជនដែលកំពុងធ្វើចត្តាឡីស័កនៅឯមណ្ឌលចំនួន ៣ ក្នុងខេត្តត្រូវផ្លាស់ប្តូរទីតាំងធ្វើចត្តាឡីស័ក បន្ទាប់ពីការឆ្លងថ្មីៗនេះបានរាលដាលនៅតាមទីតាំងទាំងនោះ ។

ស្របពេលជាមួយគ្នានេះរដ្ឋធានីហាណូយ និងមជ្ឈមណ្ឌលពាណិជ្ជកម្មភាគខាងត្បូងគឺទីក្រុងហូជីមិញថ្មីៗនេះក៏បានបញ្ជាឲ្យសាលារៀនបិទទ្វាររហូតដល់ចុងខែកុម្ភៈ ផងដែរ ។

ចាប់តាំងពីចុងខែមករា ប្រទេសវៀតណាមបានកត់ត្រាករណីឆ្លងថ្មីនៃជំងឺកូវីដ ១៩ ក្នុងសហគមន៍ចំនួន ៦៣៧ ករណី ខណៈគ្រាន់តែខេត្ត Hai Duong មានចំនួនដល់ទៅ ៤៦១ ករណី ។

គួរបញ្ជាក់ថា គិតត្រឹមពេលនេះប្រទេសវៀតណាមមានករណីឆ្លងជំងឺកូវីដ ១៩ សរុបចំនួន ២,២៦៩ ករណី និងមានអ្នកស្លាប់ចំនួន ៣៥ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ ខេត្តផ្ទុះកូវីដខ្លាំងនៅវៀតណាមញាប់ដៃញាប់ជើងបង្កើតមន្ទីរពេទ្យ ៣ បន្ថែមទៀត

ចុចអាន ៖ វៀតណាមនឹងចាប់ផ្ដើមសាកល្បងវ៉ាក់សាំងកូវីដទីពីរលើមនុស្សនៅខែក្រោយ