អាមេរិក បើកការវាយប្រហារសងសឹក លើគោលដៅ មានទំនាក់ទំនងជាមួយ អ៊ីរ៉ង់

តាមសេចក្តីរាយការណ៍របស់ Reuters, សហរដ្ឋអាមេរិក បានបើកការវាយប្រហារផ្លូវអាកាសសងសឹកហើយ កាលពីថ្ងៃសុក្រទី២ខែកុម្ភៈ នៅក្នុងប្រទេសអ៊ីរ៉ាក់ និងស៊ីរី ទៅលើគោលដៅចំនួន៨៥ដែលមានទំនាក់ទំនងជាមួយកងឆ្មាំបដិវត្តអ៊ីរ៉ង់ និងកងជីវពលដែលពួកគេគាំទ្រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នេះជាដំណាក់កាលដំបូង នៃប្រតិបត្តិការសងសឹករបស់រដ្ឋបាលលោកប្រធានាធិបតី ចូ បៃដិន ដើម្បីឆ្លើយតបទៅនឹងការវាយប្រហារកាលពីចុងសប្តាហ៍មុន ដែលដ្រូនរបស់អ៊ីរ៉ង់ បាញ់សម្លាប់ទាហានអាមេរិក៣នាក់ និងរបួសជាង៤០នាក់ នៅមូលដ្ឋាន Tower 22 ក្នុងប្រទេសហ្ស៊កដានី។

ថ្វីបើការសងសឹករបស់អាមេរិក មិនបានកំណត់គោលដៅលើទីតាំងណាមួយនៅក្នុងប្រទេសអ៊ីរ៉ង់ក៏ដោយ ប៉ុន្តែទង្វើនេះ បង្កជាក្តីព្រួយបារម្ភបង្កើនភាពតានតឹងកាន់តែខ្លាំង នៅតំបន់មជ្ឈិមបូព៌ា បន្ថែមពីលើសង្គ្រាមអ៊ីស្រាអែល-ហាម៉ាស ដែលអូសបន្លាយពេលជាង៣ខែមកហើយ។

យោធាអាមេរិក បាននិយាយក្នុងសេចក្តីថ្លែងការណ៍មួយថា ប្រតិបត្តិការនេះ បានវាយប្រហារគោលដៅនានារួមមាន មជ្ឈមណ្ឌលបញ្ជាការ ឃ្លាំងរ៉ុកកែត មីស៊ីល និងដ្រូន ក៏ដូចជាទីតាំងដឹកជញ្ជូន និងបណ្តាញផ្គត់ផ្គង់គ្រាប់បែកផងដែរនៅក្នុងប្រទេសអ៊ីរ៉ាក់និងស៊ីរី។

ទោះបីជាយ៉ាងណាក៏ដោយ ក្រោយការវាយប្រហារ អ្នកនាំពាក្យយោធាអ៊ីរ៉ាក់ លោក Yahya Rasool បានចេញមុខប្រតិកម្មភ្លាមៗថា “ការវាយប្រហារតាមអាកាសទាំងនេះ គឺជាការរំលោភលើអធិបតេយ្យរបស់អ៊ីរ៉ាក់ ហើយបង្កការគំរាមកំហែង ដែលអាចនាំអ៊ីរ៉ាក់ និងតំបន់ទាំងមូល ឲ្យជួបផលវិបាកធ្ងន់ធ្ងរ”។

ការវាយប្រហារនេះកើតឡើងប៉ុន្មានម៉ោង បន្ទាប់ពីលោក បៃដិន ជួបជាមួយក្រុមគ្រួសារនៃកងទ័ពទាំងបីនាក់ដែលត្រូវសម្លាប់ មានឈ្មោះ William Jerome Rivers, Kennedy Sanders និង Breonna Moffett ខណៈលោកនិងភរិយា បានទៅមូលដ្ឋានទ័ពអាកាស Dover ក្នុងរដ្ឋ Delaware ដើម្បីគោរពដល់ទាហានក្នុងពេលសពដឹកមកដល់ប្រទេសវិញ។

រដ្ឋមន្ត្រីការពារជាតិអាមេរិក លោក Lloyd Austin និងប្រធានអគ្គសេនាធិការចម្រុះ លោក CQ Brown ក៏បានចូលរួមផងដែរ។

សូមបញ្ជាក់ថា Tower 22 នៅភាគឦសានប្រទេសហ្ស៊កដានី គឺជាទីបញ្ជាការកណ្តាលអាមេរិក ដែលរៀបចំប្រតិបត្តិការកម្ចាត់ក្រុមរដ្ឋឥស្លាម ហើយមានទ័ពអាមេរិកប្រមាណ៣៥០នាក់ ឈរជើងនៅទីនោះ។ ក្នុងចំណោមទាហានរបួសជាង៤០នាក់, មាន៣៤នាក់ ដែលក្រុមមន្ត្រីវាយតម្លៃថា អាចមានរបួសខួរក្បាលធ្ងន់ធ្ងរ៕

អត្ថបទ៖ សុខ សុវណ្ណ

ចុចអាន៖ អាមេរិក អនុម័តផែនការ សងសឹកអ៊ីរ៉ង់ នៅអ៊ីរ៉ាក់ និងស៊ីរី