មនុស្ស ២៨ នាក់ស្លាប់ក្នុងការវាយប្រហារលើទីក្រុងកាន់កាប់ដោយ រុស្ស៊ី នៅភាគខាងកើត អ៊ុយក្រែន

យ៉ាងហោចណាស់មនុស្ស ២៨ នាក់ត្រូវបានសម្លាប់នៅក្នុងការវាយប្រហារលើអគារមួយកន្លែងនៅក្នុងទីក្រុង Lysychansk ក្នុងតំបន់ Luhansk ដែលកាន់កាប់ដោយរុស្ស៊ីនៅភាគខាងកើតអ៊ុយក្រែន ។​ នេះបើយោងតាមការចេញផ្សាយរបស់សារព័ត៌មាន CNN កាលពីថ្ងៃទី០៤​ ខែកុម្ភៈកន្លងទៅ ។

លោក Leonid Pasechnik មេតំបន់ Luhansk បាននិយាយនៅក្នុងសេចក្តីថ្លែងការណ៍មួយនៅលើ Telegram ថា ទីភ្នាក់ងារសង្គ្រោះបន្ទាន់បានជួយសង្គ្រោះមនុស្សចំនួន ១០ នាក់ពីក្រោមគំនរបាក់បែក បន្ទាប់ពីការវាយប្រហាររបស់អ៊ុយក្រែនលើអគារលំនៅដ្ឋាន និង​ហាងនំប៉័ងកាលពីថ្ងៃសៅរ៍ ។

លោកក៏បានប្រកាសឲ្យមានការកាន់ទុក្ខចំពោះជនរងគ្រោះដែលបានបាត់បង់ជីវិតនៅក្នុងការវាយប្រហារនេះផងដែរ ។ ទីក្រុង Lysychansk​ ត្រូវបានកាន់កាប់ដោយកងកម្លាំងរុស្ស៊ីក្នុងខែកក្កដា ឆ្នាំ២០២២ ដែលបានក្លាយជាទីក្រុងចុងក្រោយក្នុងតំបន់ Luhansk នៅភាគខាងកើតអ៊ុយក្រែនដែលត្រូវដួលរលំ ។

គួរបញ្ជាក់ថា ការវាយប្រហារនេះក៏មិនខុសពីការវាយប្រហារកាល​ពី​ខែ​ធ្នូ ឆ្នាំ២០២៣ ដែរ ដោយអ៊ុយក្រែន​បាន​បើក​ការ​វាយ​ប្រហារ​លើ​ក្រុង Belgorod ជាប់​ព្រំដែន​រុស្ស៊ី សម្លាប់​មនុស្ស​យ៉ាង​តិច ២៤ ​នាក់ និង​របួស ១០៨​ នាក់ ៕

អត្ថបទ ៖ ប៊ុន សុភាព