មនុស្ស ៣០ នាក់ស្លាប់ក្នុងហេតុការណ៍ផ្ទុះ ២ លើកផ្សេងគ្នានៅ ប៉ាគីស្ថាន

យ៉ាងហោចណាស់មនុស្ស ៣០ នាក់បានស្លាប់ និង ៤០ នាក់ផ្សេងទៀតរងរបួសក្នុងការផ្ទុះចំនួន ២ ផ្សេងគ្នានៅខេត្ត Balochistan ប្រទេសប៉ាគីស្ថានកាលពីថ្ងៃពុធ ពោលមួយថ្ងៃមុនការបោះឆ្នោតរបស់ប្រទេសនេះ ។ នេះបើយោងតាមការចេញផ្សាយរបស់សារពត៌មាន CNN កាលពីថ្ងៃទី០៨​ ខែ​កុម្ភៈនេះ ។

ការបំផ្ទុះមួយបានកើតឡើងក្នុងស្រុក Killa Saifullah នៅខាងក្រៅការិយាល័យបោះឆ្នោតដែលមានមនុស្សចំនួន ១២ នាក់បានស្លាប់ និង ១៨ នាក់បានរងរបួស ខណៈការផ្ទុះដាច់ដោយឡែកមួយទៀត នៅក្នុងស្រុក Pishin បានសម្លាប់មនុស្ស ១៨ នាក់ និងរបួស ២៣ នាក់ ។

ការ​ផ្ទុះទាំង​នេះ​កើត​ឡើង ​ចំពេល​មាន​ភាព​តានតឹង​កើនឡើង​ក្នុង​ប្រទេស​ប៉ាគីស្ថាន​ មុន​ការ​បោះឆ្នោត​នៅ​ថ្ងៃ​ព្រហស្បតិ៍នេះ ស្របពេលក៏មានអំពើ​ហិង្សា​បាន​កើន​ឡើង​នៅ​ទូទាំង​ប្រទេស ក៏ដូចជាការបាញ់សម្លាប់បេក្ខជនបោះឆ្នោតផងដែរ​ អំឡុងពេល​កំពុង​ឃោសនា​បោះឆ្នោត ខណៈរដ្ឋាភិបាលខេត្ត Balochistan ក៏បានប្រកាសកាន់ទុក្ខរយៈពេល ៣ ថ្ងៃ ។

យោងតាមអ្នកនាំពាក្យការិយាល័យអង្គការសហប្រជាជាតិទទួលបន្ទុកសិទ្ធិមនុស្ស (OHCHR) បាននិយាយថា រហូតមកដល់ពេលនេះមានការរាយការណ៍យ៉ាងហោចណាស់ចំនួន ២៤ ករណីអំពីការវាយប្រហារដោយក្រុមប្រដាប់អាវុធប្រឆាំងនឹងសមាជិកនៃគណបក្សនយោបាយ ៕

អត្ថបទ ៖​​ ប៊ុន​ សុភាព