រដ្ឋមន្ត្រីការពារជាតិអាមេរិក ត្រូវបញ្ជូនចូលមន្ទីរពេទ្យសាជាថ្មី

តាមសេចក្តីរាយការណ៍របស់ FOX News នៅថ្ងៃចន្ទទី១២ខែកុម្ភៈ, រដ្ឋមន្ត្រីការពារជាតិអាមេរិក លោក Lloyd Austin ត្រូវបានបញ្ជូនចូលមន្ទីរពេទ្យសាជាថ្មី ព្រោះបញ្ហាប្លោកនោម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្ទីរបញ្ចកោណនិយាយថា សេតវិមាន ត្រូវបានជូនដំណឹងរួចហើយ ហើយលោក Austin នឹងបន្តបំពេញភារកិច្ចតាមធម្មតា។

រឿងនេះកើតឡើងបន្ទាប់ពី ផ្ទុះភាពចម្រូងចម្រាស ព្រោះថា កាលពីខែធ្នូឆ្នាំ២០២៣ លោក Austin ក៏ចូលសម្រាកព្យាបាលជំងឺមហារីកក្រពេញប្រូស្តាត ក្នុងមន្ទីរពេទ្យផងដែរ ប៉ុន្តែបែរជាមិនជូនដំណឹងរឿងនេះ ដល់ថ្នាក់លើសោះ។

ក្រោយមក គាត់ត្រូវបានបញ្ជូនចូលមន្ទីរពេទ្យម្តងទៀត នៅថ្ងៃចូលឆ្នាំសកល ដោយសារតែជំងឺធ្វើទុក្ខ ហើយក៏សម្រាកព្យាបាលនៅពេទ្យរយៈពេលជាងពីរសប្តាហ៍។

ទោះបីជាយ៉ាងណាក៏ដោយ មន្ត្រីការពារជាតិជាន់ខ្ពស់និងរដ្ឋបាលលោក ចូ បៃដិន មិនដឹងថា លោក Austin ធ្លាក់ខ្លួនឈឺធ្ងន់ទេ ទើបតែចូលខែមករាប៉ុន្មានថ្ងៃទើបធ្លាយដំណឹង។

រឿងរ៉ាវនេះ បង្កជាក្តីព្រួយបារម្ភលើទាំងតម្លាភាពនិងសុវត្ថិភាព ហើយជំរុញឲ្យមានការស៊ើបអង្កេតចំនួនបី ដាច់ដោយឡែកពីគ្នាទាក់ទិនការព្យាបាលជំងឺរបស់លោក Austin និងការស្នាក់នៅក្នុងមន្ទីរពេទ្យ។

នៅថ្ងៃ១៤ខែកុម្ភៈខាងមុខ គាត់នឹងត្រូវបានគេកោះហៅឲ្យទៅធ្វើសក្ខីកម្មនៅចំពោះមុខគណៈកម្មាធិការសភា ចំពោះការដែលគាត់មិនព្រមជូនដំណឹងដល់លោក បៃដិន និងមន្រ្តីកំពូលផ្សេងទៀត៕

អត្ថបទ៖ សុខ សុវណ្ណ

ចុចអាន៖ រដ្ឋមន្ត្រីការពារជាតិអាមេរិក Lloyd Austin កើតជំងឺមហារីក