WHO ប្រកាសដំណឹងល្អអំពីជំងឺ កូវីដ១៩

អង្គការសុខភាពពិភពលោក (WHO) បាននិយាយថា ចំនួនករណីថ្មីនៃជំងឺកូវីដ១៩នៅទូទាំងពិភពលោក បានធ្លាក់ចុះ១៦ភាគរយកាលពីសប្តាហ៍មុនពោលគឺចុះ២.៧លានករណី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

WHO និយាយកាលពីថ្ងៃអង្គារទី១៦ខែកុម្ភៈថា ចំនួនអ្នកស្លាប់ថ្មីក៏បានថយចុះ១០ភាគរយផងដែរ ពោលគឺថយ៨១,០០០នាក់។

តំបន់ចំនួន៥ក្នុងចំណោម៦របស់ WHO បានរាយការណ៍ពីការធ្លាក់ចុះភាគរយពីរខ្ទង់នៅក្នុងករណីថ្មី ដោយមានតែតំបន់មេឌីទែរ៉ាណេខាងកើតប៉ុណ្ណោះដែលបង្ហាញពីការកើនឡើង៧ភាគរយ។

ករណីថ្មីបានធ្លាក់ចុះ២០ភាគរយកាលពីសប្តាហ៍មុន នៅទ្វីបអាហ្វ្រិកនិងនៅប៉ាស៊ីហ្វិកខាងលិច, ១៨ភាគរយនៅអឺរ៉ុប, ១៦ភាគរយនៅអាមេរិកនិង១៣ភាគរយនៅអាស៊ីអាគ្នេយ៍។

អគ្គនាយក WHO លោក Tedros Adhanom Ghebreyesus បាននិយាយកាលពីថ្ងៃចន្ទថា ចំនួនករណីថ្មីបានធ្លាក់ចុះក្នុងរយៈពេល៥សប្តាហ៍ជាប់ៗគ្នា ដោយធ្លាក់ចុះជិតពាក់កណ្តាលពីជាង៥លានករណីនៅក្នុងសប្តាហ៍ទី៤នៃខែមករា។

លោក Tedros និយាយថា “នេះបង្ហាញថា វិធានការសុខភាពសាធារណៈសាមញ្ញមានប្រសិទ្ធិភាព បើទោះបីជាមានវត្តមាននៃវីរុសបំប្លែងខ្លួនក៏ដោយ”។

លោកបន្តថា “អ្វីដែលសំខាន់នៅពេលនេះគឺថា តើយើងឆ្លើយតបនឹងនិន្នាការនេះយ៉ាងម៉េច។ ភ្លើងមិនទាន់រលត់ទេ ប៉ុន្តែយើងបានកាត់បន្ថយទំហំរបស់វា។ ប្រសិនបើយើងឈប់ប្រយុទ្ធ វានឹងវិលត្រឡប់មកវិញ”។

គួរបញ្ជាក់ថា គិតត្រឹមម៉ោង៨ព្រឹកថ្ងៃទី១៧ខែកុម្ភៈនេះ ពិភពលោកបានកត់ត្រាករណីជំងឺកូវីដ១៩សរុប១១០,០២០,៨៤៤ករណី, ស្លាប់២,៤២៨,២៦៤នាក់និងជាសះស្បើយ៨៤,៨៣៣,៥០២នាក់៕

ប្រែសម្រួលដោយ៖ Vann Vann

ប្រភព៖ CNA

ចុចអាន៖ ផ្ទុះវីរុសបំប្លែងខ្លួនថ្មីមួយទៀត ទោះវ៉ាក់សាំងក៏មិនខ្លាច

ចុចអាន៖ អាហ្រ្វិកខាងត្បូង ស្នើឲ្យឥណ្ឌា យកវ៉ាក់សាំងកូវីដ ១លានដូសទៅវិញ