ទីក្រុងឌូបៃ រងគ្រោះដោយជំនន់ទឹកភ្លៀង

តាមការចុះផ្សាយរបស់សារព័ត៌មាន Khaleej Times កាលពីថ្ងៃចន្ទទី១២ខែកុម្ភៈ, ដងផ្លូវនៃទីក្រុងឌូបៃក្នុងប្រទេសអារ៉ាប់រួម ត្រូវបានជន់លិចដោយជំនន់ទឹកភ្លៀង បន្ទាប់ពីទីក្រុងរងគ្រោះដោយ ព្យុះភ្លៀងធ្ងន់ធ្ងរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្តីរាយការណ៍បន្ថែមថា មជ្ឈមណ្ឌលជាតិឧតុនិយម (NCM) បានចេញសេចក្តីប្រកាសអាសន្នពណ៌ក្រហមនិងពណ៌លឿង ដោយព្រមានអំពីអាកាសធាតុមិនធម្មតាជាបន្តបន្ទាប់។

ក្រៅពីឌូបៃ ដងផ្លូវនៃទីក្រុង Abu Dhabi, Ras Al Khaimah និង Fujairah ក៏ត្រូវបានគេរាយការណ៍អំពី ជំនន់ទឹកភ្លៀងវាយប្រហារផងដែរ ក្រោយជួបអាកាសធាតុកាចសាហាវ។

តាមរូបភាពដែលបង្ហោះលើបណ្តាញសង្គម គេបានឃើញផ្លូវត្រូវទឹកលិច មានកន្លែងខ្លះជ្រៅកន្លែងខ្លះរាក់ ហើយរថយន្តមួយចំនួន ត្រូវជាប់គាំងមិនអាចបើកទៅមុខបាន ខណៈប្រព័ន្ធលូ មិនអាចជួយឲ្យទឹកហូរលឿនឆាប់អស់បានទេ។

មន្ត្រីរាជការនៅទីក្រុងឌូបៃ ត្រូវបានស្នើសុំឲ្យធ្វើការពីផ្ទះប៉ុន្មានថ្ងៃ ខណៈស្ថាប័នអប់រំរបស់អារ៉ាប់រួម ក៏ប្រកាសឲ្យសាលារដ្ឋ បន្តរៀនតាមអនឡាញផងដែរ។

មិនត្រឹមប៉ុណ្ណឹង នាយកដ្ឋានសេវាផ្លូវថ្នល់និងសាធារណៈនៅទូទាំងប្រទេស ថែមទាំងចេញសេចក្តីណែនាំអំពីសុវត្ថិភាពសម្រាប់អ្នកបើកបរយានយន្ត ដែលធ្វើដំណើរក្នុងតំបន់ដែលរងផលប៉ះពាល់ដោយទឹកភ្លៀងទៀតផង ហើយគេក៏ឃើញមានរន្ទះបាញ់ លើសំណង់ខ្ពស់ជាងគេបំផុតរបស់ពិភពលោក Burj Khalifa ផងដែរ៕

អត្ថបទ៖ សុខ សុវណ្ណ

ចុចអាន៖ ឌូបៃ អាចចាប់ផ្តើមសេវាកម្មតាក់ស៊ីហោះ នៅឆ្នាំ ២០២៦