កិច្ចចរចាបទឈប់បាញ់ កើតឡើងម្ដងទៀត ក្រោយការវាយប្រហាររបស់អ៊ីស្រាអែល នៅក្រុង Rafah

ប្រព័ន្ធផ្សព្វផ្សាយអេហ្ស៊ីបនិយាយថា ការចរចាសម្រាប់បទឈប់បាញ់គ្នារវាងអ៊ីស្រាអែល និងក្រុមហាម៉ាសនៅតំបន់ហ្កាហ្សាបានចាប់ផ្តើមឡើងវិញ នៅទីក្រុងគែរ រដ្ឋធានីប្រទេសអេហ្ស៊ីប បើទោះជាភាគី អ៊ីស្រាអែល បានបដិសេធមិនចរចាបទឈប់បាញ់ កាលពីសប្ដាហ៍មុនយ៉ាងណាក៏ដោយ ។

យោងតាមការចុះផ្សាយពីទីភ្នាក់ងារសារព័ត៌មាន Reuter នៅថ្ងៃទី១៣ ខែកុម្ភៈ នេះបានឱ្យដឹងថា មន្ត្រីជាន់ខ្ពស់មកពីសហរដ្ឋអាមេរិក អ៊ីស្រាអែល អេហ្ស៊ីប និងកាតា បានជួបប្រជុំគ្នា ខណៈដែលអ៊ីស្រាអែលប្រឈមមុខនឹងសម្ពាធអន្តរជាតិយ៉ាងខ្លាំង ដើម្បីបញ្ឈប់ការទម្លាក់គ្រាប់បែករបស់ខ្លួនទៅលើទីក្រុង Rafah ភាគខាងត្បូងតំបន់ Gaza។

ការពិភាក្សានៅទីក្រុងគែរ បាន និងកំពុងបន្ត បើទោះបីជាអ៊ីស្រាអែលធ្លាប់បដិសេធ លក្ខខណ្ឌរបស់ក្រុមហាម៉ាសក៏ដោយ។

ជាមួយគ្នានេះ លោកប្រធានាធិបតីអ៊ីស្រាអែល Benjamin Netanyahu ក៏បានបញ្ជូនប្រធានស៊ើបការណ៍សម្ងាត់របស់លោក គឺលោក David Barnea ទៅកាន់កិច្ចពិភាក្សាដើម្បីព្យាយាមធ្វើឱ្យមានការរីកចម្រើនបន្ថែមទៀតនៅក្នុងកិច្ចចរចានេះ។  

ប្រភពបានឱ្យដឹងទៀតថា នឹងមានក្របខ័ណ្ឌសម្រាប់បទឈប់បាញ់រវាងអ៊ីស្រាអែល និងហាម៉ាស់ បណ្តោះអាសន្ន ក៏ដូចជាការដោះលែងចំណាប់ខ្មាំងអ៊ីស្រាអែលជាថ្នូរនឹងអ្នកទោសប៉ាឡេស្ទីនផងដែរ។

សូមបញ្ជាក់ថា ភាគីជួយជ្រោមជ្រែង នៅក្នុងកិច្ចចរចាស្វែងរកបទឈប់បាញ់លើកនេះ មានដូចជា ប្រទេសកាតា អេហ្ស៊ីប ព្រមទាំងមានការគាំទ្រពីសហរដ្ឋអាមេរិក ទៀតផង ៕

ប្រែសម្រួលដោយ÷ ប៉ោ កុសល