UN ព្រមានថា ប្រតិបត្តិការវាយលុកទីក្រុង Rafah នឹងក្លាយជា ការសម្លាប់មនុស្សដ៏រង្គាល

ប្រធានផ្នែកមនុស្សធម៌អង្គការសហប្រជាជាតិ លោក Martin Griffiths ចេញមុខព្រមានខ្លាំងៗថា ការវាយលុករបស់អ៊ីស្រាអែលលើទីក្រុង Rafah ភាគខាងត្បូងតំបន់ហ្គាហ្សា អាចឈានទៅដល់ “ការសម្លាប់មនុស្សដ៏រង្គាល”។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកនិយាយថា តំបន់ហ្គាហ្សា បានទទួលរងការវាយលុកយ៉ាងធ្ងន់ធ្ងរ និងឃោរឃៅ ដែលគ្មានអ្វីប្រៀបផ្ទឹមបានហើយ ផលវិបាកនៃការលុកលុយនៅ Rafah នឹងក្លាយជា “មហន្តរាយ”។

នៅក្នុងសេចក្តីថ្លែងការណ៍ប្រើពាក្យសម្តីខ្លាំងៗ លោក Griffiths សង្កត់ធ្ងន់ថា មនុស្សជាងមួយលាននាក់ ត្រូវគេខ្ទប់ជាប់នៅ Rafah ដោយមើលឃើញសេចក្តីស្លាប់នៅនឹងមុខ។ ជន​ស៊ីវិល​នៅទីនោះ ​មាន​អាហារ​តិច​តួចណាស់ ហើយសឹងតែគ្មាន​ថ្នាំ​សង្កូវ។ ពួកគេគ្មានកន្លែងសុវត្ថិភាពណា ដែលអាចទៅបាននោះទេ។ ដូច្នេះហើយ ការលុកលុយរបស់អ៊ីស្រាអែលលើទីក្រុងនេះ ​នឹងបណ្តាលឲ្យប្រតិបត្តិការមនុស្សធម៌ដែលផុយស្រួយរួចទៅហើយនោះ ធ្លាក់ចូលមាត់ទ្វារមរណៈ។

ការព្រមានរបស់លោក Griffiths កើតឡើងបន្ទាប់ពី នាយករដ្ឋមន្ត្រី​អ៊ីស្រាអែល Benjamin Netanyahu ​ប្តេជ្ញា​កម្ចាត់​ខ្មាន់កាំភ្លើង​ក្រុមហាម៉ាស ដែល​លោកអះអាងថា កំពុងសំងំ​លាក់ខ្លួន​នៅក្នុង​ទីក្រុងនេះ។

Rafah គឺជាទីក្រុងតូចមួយនៅភាគខាងត្បូងជ្រោយហ្គាហ្សា ជាប់ព្រំដែនជាមួយប្រទេសអេហ្ស៊ីប។ មុនពេលសង្រ្គាមផ្ទុះឡើង ទីនោះមានមនុស្សរស់នៅប្រហែល២៥០០០០នាក់ ប៉ុន្តែចាប់តាំងពីអ៊ីស្រាអែល បញ្ជាឲ្យជនស៊ីវិលជម្លៀសទៅភាគខាងត្បូងមក ចំនួនប្រជាជនរបស់ខ្លួនបានកើនឡើងដល់១.៥លាននាក់។

មនុស្សជាច្រើនកំពុងរស់នៅក្នុងតង់ជាមួយភាពអស់សង្ឃឹម ហើយនិយាយថា ពួកគេមិនដឹងថាទៅកន្លែងណាទៀតទេ។

ទីក្រុង Rafah បានស្ថិតរងការវាយប្រហារតាមអាកាសយ៉ាងធ្ងន់ធ្ងរពីសំណាក់អ៊ីស្រាអែល ក្នុងរយៈពេលប៉ុន្មានថ្ងៃចុងក្រោយ ហើយបើយោងតាមក្រសួងសុខាភិបាលដែលគ្រប់គ្រងដោយក្រុមហាម៉ាស បានឲ្យដឹងថា មនុស្ស៦៧នាក់ ត្រូវសម្លាប់នៅទីនោះ កាលពីថ្ងៃចន្ទទី១២ខែកុម្ភៈ៕

អត្ថបទ៖ សុខ សុវណ្ណ

ចុចអាន៖ កិច្ចចរចាបទឈប់បាញ់ កើតឡើងម្ដងទៀត ក្រោយការវាយប្រហាររបស់អ៊ីស្រាអែល នៅក្រុង Rafah