មេទ័ពថ្មី អ៊ុយក្រែន សារភាពត្រង់ៗថា ស្ថានភាពច្បាំងនៅសមរភូមិជួរមុខ​ជាមួយ រុស្ស៊ី ពិតជាត្រដាបត្រដួស

ស្ថានភាពច្បាំងនៅសមរភូមិជួរមុខជាមួយនឹងកងកម្លាំងរុស្ស៊ីគឺ “ពិតជាត្រដាបត្រដួសណាស់” ស្របពេលដែលជំនួយយោធាពីសំណាក់សហរដ្ឋអាមេរិកផ្ដល់មកឲ្យអ៊ុយក្រែនក៏នៅនឹងថ្កល់ទៀត ។ នេះជាការលើកឡើងរបស់មេទ័ពថ្មីអ៊ុយក្រែន និងចុះផ្សាយដោយសារព័ត៌មានបារាំង Le Monde កាលពីថ្ងៃទី១៤ ខែកុម្ភៈកន្លងទៅ ។

សមរភូមិជួរមុខនៅតំបន់ Avdiivka និង Kupiansk ដែលមានចម្ងាយ ១,០០០ គីឡូម៉ែត្រភាគខាងកើតអ៊ុយក្រែន បានផ្លាស់ប្ដូរស្ទើរតែទាំងស្រុងក្នុងរយៈពេលជាង ១ ឆ្នាំមកនេះ ពោលកងកម្លាំងរបស់រដ្ឋាភិបាលទីក្រុងកៀវប្រែពីការវាយលុកមកការពារទឹកដីវិញ ក្រោយបាក់ស្បាតក្នុងប្រតិបត្តិការវាយបកកាលពីឆ្នាំមុន ស្របពេលដែលមេយោធាក៏ទទួលស្គាល់ដែរថា អ្នកចម្បាំងរុស្ស៊ីពិតជាខ្លាំងក្លា ។

លោក Oleksandr Syrsky អគ្គមេបញ្ជាការយោធាថ្មីរបស់អ៊ុយក្រែនបាននិយាយនៅលើប្រព័ន្ធផ្សព្វផ្សាយសង្គមថា ថា “ទាហានរបស់គាត់កំពុងស្ថិតក្នុងស្ថានភាពដ៏លំបាកក្នុងសមរភូមិប្រយុទ្ធជាមួយនឹងកងកម្លាំងរុស្ស៊ី ​ព្រោះទ័ព​រុស្ស៊ី​កំពុង​ប្រើ​ទាហានអ៊ុយក្រែន​ជា​ចំណី​កាណុង ដូច្នេះយើងមានតែពង្រឹងដែនសមត្ថភាពការពារជាតិមាតុភូមិរបស់យើង” ។

ការលើកឡើងរបស់លោក Syrsky កើតមានឡើងមិនដល់មួយសប្ដាហ៍ផង បន្ទាប់ពីលោកប្រធានាធិបតី Volodymyr Zelensky បានបង់ចិត្តបង់កាយ ក៏ដូចជាផ្ញើព្រេងវាសនាប្រទេសជាតិ និងផ្ដល់សេចក្ដីទុកចិត្តទាំងស្រុងលើមេទ័ពថ្មីរូបនេះថានឹងអាចជួយស្ដារមុខមាត់ស្ថានភាពសមរភូមិជួរមុខរបស់អ៊ុយក្រែនវិញបាន ។

ពាក់ព័ន្ធនឹងបញ្ហានេះដែរ ទីភ្នាក់ងារព័ត៌មាន Reuters បានរាយការណ៍កាលពីថ្ងៃអង្គារថា ប្រធានាធិបតីរុស្ស៊ី លោក វ្ល៉ាឌីមៀr ពូទីន ធ្លាប់បានបញ្ជូនសញ្ញាពីការពិចារណាបទឈប់បាញ់នៅអ៊ុយក្រែនទៅកាន់អាមេរិកតាំងតែពីឆ្នាំមុនមកម្ល៉េះ តាមរយៈអន្តរការី រួមទាំងបណ្តាប្រទេសអារ៉ាប់ ប៉ុន្តែទីក្រុងវ៉ាស៊ីនតោនបានទាត់ចោលកិច្ចចរចាសន្តិភាពមួយនេះ ។

គិតត្រឹមពេលនេះ ភ្លើងសង្គ្រាមរវាងរុស្ស៊ី និងអ៊ុយក្រែនបានចាយពេលជិត ២ ឆ្នាំហើយ បន្ទាប់ពីកងកម្លាំងរដ្ឋាភិបាលទីក្រុងមូស្គូលើកទ័ពចូលទីក្រុងកៀវកាលពីថ្ងៃទី២៤ ខែកុម្ភៈ ឆ្នាំ២០២២ ខណៈបច្ចុប្បន្នលោកប្រធានាធិបតី Zelensky នៅតែបន្តដើរសុំជំនួយ ក៏ដូចជាសព្វាវុធ និងកែនទាហានជាបន្តបន្ទាប់ពីសម្ព័ន្ធមិត្តសំខាន់ៗដូចជា អឺរ៉ុប និងអាមេរិកជាដើម ។

ទោះបីជាមិនមានព័ត៌មានច្បាស់លាស់អំពីចំនួនអ្នកស្លាប់ និងរបួសក៏ដោយ ប៉ុន្តែតាមការប៉ាន់ប្រមាណរបស់អង្គការសហប្រជាជាតិបានឲ្យដឹងថា ជនស៊ីវិលអ៊ុយក្រែនជាង ១០,០០០ នាក់ត្រូវបានសម្លាប់ ខណៈយោងតាមរបាយការណ៍របស់កាសែត New York Times វិញបានអះអាងថា រហូតមកដល់ពេលនេះទាំងទាហានអ៊ុយក្រែន និងរុស្ស៊ីសរុបចូលគ្នាគឺមានជាង ៥ លាននាក់បានស្លាប់បាត់បង់ជីវិត ៕

ដោយ ៖ សុខ ជីវ័ន្ត

ចុចអាន ៖ លោក Zelensky ផ្ញើព្រេងវាសនាប្រទេសជាតិលើមេទ័ពកំពូលថ្មី