កូរ៉េខាងជើង ហេកចូលអ៊ីមែលជំនួយការប្រធានាធិបតី កូរ៉េខាងត្បូង

ប្រទេសកូរ៉េខាងជើងបានហេកចូលអ៊ីមែលផ្ទាល់ខ្លួនរបស់ជំនួយការប្រធានាធិបតីកូរ៉េខាងត្បូង នៅពេលដែលលោកប្រធានាធិបតី Yoon Suk Yeol បំពេញទស្សនកិច្ចផ្លូវការទៅកាន់ចក្រភពអង់គ្លេស ។ នេះបើយោងតាមការចេញផ្សាយរបស់សារពត៌មាន BBC កាលពីថ្ងៃទី១៤​ ខែកុម្ភៈកន្លងទៅ ។

ករណីនេះបានកើតឡើងនៅក្នុងដំណើរបំពេញទស្សនកិច្ចផ្លូវការរបស់លោកប្រធានាធិបតី Yoon Suk Yeol ទៅកាន់ចក្រភពអង់គ្លេសរយៈពេល ៣ ថ្ងៃកាលពីខែវិច្ឆិកា ឆ្នាំ២០២៣ ក្នុងអំឡុងពេលដែលគាត់បានជួបព្រះអង្គម្ចាស់ Charles និងម្ចាស់ក្សត្រី Camilla ក៏ដូចជានាយករដ្ឋមន្រ្តី Rishi Sunak ដែលបានធ្វើឲ្យរដ្ឋាភិបាលកូរ៉េខាងត្បូងមានការតក់ស្លុតជាខ្លាំង ព្រោះវាអាចបង្កបញ្ហាដល់សុវត្ថិភាពរបស់លោក Yoon នៅបរទេស ។

កាសែត Kukmin Ilbo បានចុះផ្សាយដោយដកស្រង់ប្រភពពីរដ្ឋាភិបាលជាន់ខ្ពស់មួយថា ក្រុមអ្នកហេកបានលួចចូលមើលកាលវិភាគធ្វើដំណើររបស់លោក Yoon ហើយសារដែលផ្ញើដោយប្រធានាធិបតីក៏ត្រូវបានលួចផងដែរ ប៉ុន្តែ​ការិយាល័យ​ប្រធានាធិបតី​នឹង​មិន​បង្ហាញ​ថា​ព័ត៌មាន​ណា​ខ្លះ​ត្រូវ​បាន​គេ​លួចនោះទេ ។

នេះគឺជាករណីទី​មួយ​ហើយដែល​កូរ៉េ​ខាង​ជើង​បាន​លួច​ចូល​ដោយ​ជោគជ័យ​ ទៅកាន់ប្រភពជិតស្និត​របស់​ប្រធានាធិបតី​កូរ៉េ​ខាង​ត្បូង ខណៈមកដល់ពេលនេះកូរ៉េខាងត្បូងបានចាត់វិធានការដើម្បីពង្រឹងសន្តិសុខរបស់ខ្លួន រួមទាំងការលើកកម្ពស់ការយល់ដឹងក្នុងចំណោមបុគ្គលិករបស់ខ្លួន ដើម្បីការពារកុំឲ្យមានឧប្បត្តិហេតុបែបនេះកើតឡើងទៀត ។

គួរបញ្ជាក់ថា ប្រទេសកូរ៉េខាងជើងបានហេកចូលតាមអ៊ីនធឺណិតដើម្បីលួចទាំងលុយ និងព័ត៌មាន ហើយក្រុមអ្នកហេករបស់ទីក្រុងព្យុងយ៉ាងបានព្យាយាមលួចលុយយ៉ាងច្រើនដូចជា រូបិយប័ណ្ណគ្រីបតូ ដើម្បីគាំទ្រកម្មវិធីអាវុធនុយក្លេអ៊ែររបស់ខ្លួនដែលត្រូវបានគេប៉ាន់ប្រមាណថា មានរហូតដល់ទៅ ៣ ពាន់លានដុល្លារ ចាប់តាំងពីឆ្នាំ ២០១៦ មក ៕

អត្ថបទ៖ ប៊ុន សុភាព