មេ Amazon លក់ភាគហ៊ុនតម្លៃជាង ៤ ពាន់លានដុល្លារ

មហាសេដ្ឋី Jeff Bezos បានលក់ភាគហ៊ុនរបស់គាត់កាន់តែច្រើននៅក្នុងក្រុមហ៊ុន Amazon ដែលនាំឲ្យតម្លៃសរុបនៃការលក់ក្នុងរយៈពេលប៉ុន្មានថ្ងៃថ្មីៗនេះឡើងដល់ជាង ៤ ពាន់លានដុល្លារ ។ នេះបើយោងតាមការចេញផ្សាយរបស់សារពត៌មាន BBC កាលពីថ្ងៃទី១៤ ខែកុម្ភៈ ។

ប្រធានក្រុមហ៊ុនបច្ចេកវិទ្យាយក្សដែលបង្កើតក្នុងឆ្នាំ ១៩៩៤ បាននិយាយថា លោកបានលក់ហ៊ុន Amazon ចំនួន ២៤ លានហ៊ុនក្នុងខែនេះ ហើយលោកក៏គ្រោងនឹងលក់ភាគហ៊ុនចំនួន ៥០ លានទៀតនៅឆ្នាំក្រោយ ដែលមានតម្លៃប្រហែល ៨.៤ ពាន់លានដុល្លារក្នុងតម្លៃបច្ចុប្បន្ន ខណៈការលក់ដំបូងចំនួន ១២ លានហ៊ុនត្រូវបានប្រកាសនៅក្នុងឯកសារច្បាប់មួយកាលពីថ្ងៃសុក្រសប្ដាហ៍មុន បន្ទាប់មកមានការប្រកាសការលក់ភាគហ៊ុនចំនួន ១២ លានហ៊ុនផ្សេងទៀតកាលពីថ្ងៃអង្គារ ។

លោក Bezos បានផ្លាស់ពីតំបន់ Seattle ក្នុងទីក្រុង Washington ទៅរស់នៅទីក្រុង Miami រដ្ឋ Florida កាលពីឆ្នាំមុន បន្ទាប់ពីមានការរឹតបន្តឹងការបង់ពន្ធនៅទីក្រុង Washington ខណៈការផ្លាស់ទីនេះលោកអាចសន្សំបានប្រហែល ២៨០ លានដុល្លារ នៅក្នុងពន្ធលើភាគហ៊ុនដែលមានតម្លៃ ៤ ពាន់លានដុល្លារដែលលោកបានលក់ ។

ប្រសិនបើការលក់នៅក្នុងរដ្ឋ Washington ទទួលបានលើសពី ២៥០,០០០ ពីការលក់ភាគហ៊ុន ឬការវិនិយោគរយៈពេលវែងផ្សេងទៀតនោះនឹងត្រូវបានបង់ពន្ធចំនួន ៧ ភាគរយ ខណៈរដ្ឋផ្លរីដាមិនមានពន្ធរដ្ឋលើប្រាក់ចំណូល ឬការកើនឡើងដើមទុនទេ ។ ទោះយ៉ាងណាក៏ដោយ លោកនឹងនៅតែទទួលខុសត្រូវលើពន្ធសហព័ន្ធពីការលក់ភាគហ៊ុនដដែល ។

គួរបញ្ជាក់ថា បើទោះបីលោក Bezos លក់ភាគហ៊ុនជារឿយៗក៏ដោយ ក៏លោកនៅតែជាម្ចាស់ភាគហ៊ុនធំជាងគេរបស់ Amazon និងជាមហាសេដ្ឋីម្នាក់ក្នុងចំណោមអ្នកមានបំផុតនៅលើពិភពលោក ជាមួយនឹងទ្រព្យសម្បត្តិប្រមាណជាង ១៩០ ពាន់លានដុល្លារ ៕

អត្ថបទ ៖ ប៊ុន សុភាព