ផ្កាយរណបអឺរ៉ុបមួយគ្រឿង នឹងផ្ទុះធ្លាក់មកផែនដី នៅសប្តាហ៍ក្រោយ

តាមការចុះផ្សាយរបស់ Daily Mail, ផ្កាយរណបបាញ់បង្ហោះដោយទីភ្នាក់ងារអវកាសអឺរ៉ុប (ESA) ដែលបណ្តែតខ្លួនលើភពផែនដីអស់រយៈពេលជិត៣០ឆ្នាំមកហើយនោះ ទីបំផុតត្រូវដល់អាយុកាលធ្លាក់មកផែនដីវិញហើយ នៅសប្តាហ៍ក្រោយ ប៉ុន្តែគេមិនដឹងថា វាធ្លាក់មកចំកន្លែងណាឲ្យប្រាកដនោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ផ្កាយរណប ERS-2 មានទម្ងន់ជាង២តោន ត្រូវបានបាញ់បង្ហោះចេញពីដែនដី French Guiana ក្នុងឆ្នាំ១៩៩៥ ដើម្បីសិក្សាលើផ្ទៃផែនដី មហាសមុទ្រ និងតំបន់ប៉ូល។ នៅពេលនោះ វាគឺជាយានសង្កេតភពផែនដីទំនើបបំផុត ដែលអឺរ៉ុបមិនធ្លាប់បង្កើតឡើង និងបាញ់បង្ហោះទាល់តែសោះ។

ក្រោយចាយពេល១៥ឆ្នាំ, ESA ប្រកាសថា បេសកកម្មបានបញ្ចប់ក្នុងឆ្នាំ២០១១ ប៉ុន្តែទុកឲ្យផ្កាយរណបនេះ ហោះបណ្តែតខ្លួនជាង១០ឆ្នាំទៀត។ លុះពេលឥន្ធនៈរបស់ផ្កាយរណបចាប់ផ្តើមខើចទៅៗ អ្នកជំនាញគ្រប់គ្រងនៅលើគោក ក៏ចាប់ផ្តើមបន្ទាបខ្លួនវា ពីកម្ពស់ប្រហែល៧៨៥គីឡូម៉ែត្រ មកនៅត្រឹម៥៧៣គីឡូម៉ែត្រ។

ទីភ្នាក់ងារខាងលើរំពឹងថា ផ្កាយរណបនេះ ទំនងជាផ្ទុះធ្លាក់ចូលទៅក្នុងមហាសមុទ្រ ហើយហានិភ័យដែលមនុស្សត្រូវរងគ្រោះដោយសារកម្ទេចកម្ទីរបស់វា គឺសឹងតែគ្មាន។

តាមអ្នកវិភាគ វានឹងធ្លាក់មកផែនដីនៅថ្ងៃទី១៩ខែកុម្ភៈ ប៉ុន្តែទោះបីជាយ៉ាងណាក៏ដោយ ESA ថា ខ្លួនកំពុងតាមដានផ្កាយរណបនេះយ៉ាងដិតដល់បំផុត រួមជាមួយដៃគូអន្តរជាតិ ហើយនឹងផ្តល់ព័ត៌មានអាប់ដេតជាប្រចាំ៕

អត្ថបទ៖ សុខ សុវណ្ណ

ចុចអាន៖ ឆ្នាំក្រោយ វៀតណាម បាញ់បង្ហោះផ្កាយរណបរ៉ាដា ចូលទៅក្នុងតារាវិថី