ព័ត៌មានអន្ដរជាតិ

អ្នកដំណើរក្នុងយន្តហោះ Delta ភ័យស្លន់ស្លោ ក្រោយដង្កូវជាច្រើនធ្លាក់លើក្បាល ពេលកំពុងហោះហើរ

បានផុស

១ year មុន

នៅ

ថ្ងៃសុក្រ ១៦ កុម្ភៈ ២០២៤

ដោយ

កាលពីថ្ងៃទី ១៥ ខែកុម្ភៈ គេហទំព័រ NYPost បានរាយការណ៍អំពីឧប្បត្តិហេតុដ៏គួរឲ្យភ័យខ្លាចមួយលើជើងហោះហើរ ក្រុមហ៊ុនអាកាសចរណ៍ Delta បន្ទាប់ពីអ្នកដំណើរហោះហើរពីទីក្រុង Amsterdam ហូឡង់ ទៅ Detroit រដ្ឋ Michigan សហរដ្ឋអាមេរិក។

យោងតាមរបាយការណ៍បានឲ្យដឹងថា នៅពេលយន្តហោះកំពុងហោះចេញពីគោលដៅ រំពេចនោះស្រាប់តែមានដង្កូវជាច្រើនក្បាលបានធ្លាក់ពីលើកន្លែងផ្ទុកទំនិញ រហូតយន្តហោះត្រូវវិលត្រលប់ចុះចតនៅប្រទេសហូឡង់វិញភ្លាមៗ។ ចំពោះមូលហេតុដែលបណ្ដាលឲ្យមានដង្កូវធ្លាក់ចុះមកពេលយន្តហោះកំពុងហោរហើរ ដោយសារតែមានត្រីរលួយរុំនៅក្នុងក្រដាសកាសែតរបស់អ្នកដំណើរម្នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លើសពីនេះទៀតដែរ អ្នកដំណើរដែលត្រូវដង្កូវធ្លាក់លើបានស្ដីបន្ទោសទៅកាន់ម្ចាស់អីវ៉ាន់ថា គ្មានការទទួលខុសត្រូវ និងខ្ជះខ្ជាយពេលវេលារបស់អ្នកដទៃនៅលើយន្តហោះសឹងតែគ្រប់គ្នា។ ជាពិសេសដង្កូវទាំងនោះបានធ្វើឲ្យមនុស្សលើយន្តហោះមានការខ្ពើមរអើមជាខ្លាំងផងដែរ។

ទោះយ៉ាងណាក៏ដោយ ក្រោយមកឥវ៉ាន់ដែលមានសុទ្ធតែដង្កូវនោះត្រូវបានគេយកទៅដុតកម្ទេចចោល និងសម្អាតយន្តហោះយ៉ាងហ្មត់ចត់ ដើម្បីការពារមេរោគផ្សេងៗ ប្រការខ្លាចចម្លងទៅកាន់ភ្ញៀវ។ ស្របពេលដែលអ្នកដំណើរម្នាក់ទៀតបាននិយាយ ក្រុមហ៊ុនអាកាសចរណ៍បានផ្តល់សំណងជាមួយនឹងសំបុត្រហោះហើរញឹកញាប់ ៨,០០០ ម៉ាយ (១២៨៧៤គីឡូម៉ែត្រ) សំបុត្របន្ទប់សម្រាក និងអាហារដែលមានតម្លៃ៣០ ដុល្លារពួកគេម្នាក់ៗថែមទៀត៕