ព័ត៌មានអន្ដរជាតិ

ការសិក្សា ៖ ឡាវ ជាប្រទេសជាប់អត្រាអ្នកមានផ្ទៃពោះទាំងនៅវ័យក្មេង ខ្ពស់ជាងគេនៅ អាស៊ាន

បានផុស

១១ ខែ មុន

នៅ

ថ្ងៃសុក្រ ១៦ កុម្ភៈ ២០២៤

ដោយ

ការសិក្សាថ្មីៗនៅប្រទេសឡាវបានបង្ហាញសារជាថ្មីម្តងទៀតថា ប្រទេសនេះមានអត្រាមានផ្ទៃពោះទាំងនៅវ័យក្មេងខ្ពស់ជាងគេនៅក្នុងចំណោមបណ្តាប្រទេសអាស៊ានទាំងអស់ ។ នេះបើតាមការចុះផ្សាយរបស់សារព័ត៌មាន Laotian Times ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការសិក្សាធ្វើឡើងដោយមន្ត្រីនៅវិទ្យាស្ថានស្រាវជ្រាវវេជ្ជសាស្រ្តអូស្រ្តាលី Burnet ដោយផ្តោតការស្រាវជ្រាវនៅក្នុងប្រទេសឡាវ បានបង្ហាញនូវកត្តាសំខាន់ៗដែលចូលរួមចំណែកក្នុងបញ្ហាខាងលើ ។ ក្នុងនោះមាន ការព្រមព្រៀងរៀបការទាំងនៅវ័យក្មេង, ចំណេះដឹងផ្នែកសុខភាពផ្លូវភេទនៅមានកម្រិត និងកង្វះស្វ័យភាពក្នុងការសម្រេចចិត្តរបស់យុវតីឡាវ ដែលទាំងអស់នេះជាមុខចំណុចសំខាន់ៗរួមចំណែកឲ្យអត្រាយុវតីវ័យជំទង់នៅឡាវមានផ្ទៃពោះនៅក្រោមអាយុ ១៨ ឆ្នាំច្រើន ។

បន្ថែមពីនោះ អត្រាផ្ទៃពោះទាំងនៅវ័យក្មេងរបស់យុវតីភាគច្រើនកើតមាននៅតំបន់ដាច់ស្រយ៉ាលក្នុងប្រទេសឡាវ ។ នេះបើតាមការឲ្យដឹងពីមន្ត្រីសហព័ន្ធយុវជនឡាវម្នាក់ដែលសូមមិនបង្ហាញឈ្មោះ ។

តាមការលើកឡើងរបស់មន្ត្រីសហព័ន្ធយុវជនឡាវបានឲ្យដឹងថា “មានផ្ទៃពោះទាំងនៅវ័យក្មេង សឹងក្លាយជារឿងធម្មតាទៅហើយក្នុងតំបន់ជនបទ។ ពិសេសនោះគឺក្មេងៗយុវតីនៃជនជាតិដើមភាគតិច។ គូស្រករទាំងនៅវ័យក្មេងខ្លះមានកូន ដោយគិតថាជាចំណែកមួយសម្រាប់បង្កើតកម្លាំងពលកម្មបន្ថែមសម្រាប់គ្រួសារ ក៏ដូចជាមានទស្សនៈផ្សេងទៀតថា ឆាប់រៀបការគឺជាប្រពៃណីរបស់ពួកគេ” ។

***យុវតីក្មេងៗជនជាតិដើមភាគតិចនៅឡាវ (រូបតំណាង)***

ដោយឡែក មន្ត្រីផ្នែកប្រឹក្សានៃអង្គការមជ្ឈមណ្ឌលស្ត្រី ការអភិវឌ្ឍ និងសុខភាពយុវជននៅរដ្ឋធានីវៀងចន្ទន៍បានលើកឡើងថា ករណីយុវតីឡាវមានផ្ទៃពោះនៅមុនអាយុ១៨ឆ្នាំ ភាគច្រើនជាករណីដែលមានកខ្វះចំណេះដឹងផ្នែកសុខភាពផ្លូវភេទ ហើយពិសេសនោះគឺពួកគេមានបញ្ហាប្រឈមនឹងការលំបាកក្នុងការស្វែងរកការណែនាំអំពីការរៀបចំផែនការគ្រួសារ។ ករណីភាគច្រើនបន្ថែមទៅទៀតនោះ គឺការចាត់ចែងឲ្យក្មេងៗរៀបការមុនអាយុ ដើម្បីបញ្ជៀសពីបញ្ហានិន្ទាពីសង្គមទៅលើការមានផ្ទៃពោះមុនរៀបការជាដើម ។

ចំណុចទាំងនេះបានក្លាយជាបញ្ហាសំខាន់របស់ប្រទេសឡាវដែលមានអត្រាកំណើនអ្នកមានផ្ទៃពោះទាំងនៅវ័យក្មេងខ្ពស់ជាងគេក្នុងតំបន់អាស៊ាន ប៉ុន្តែទន្ទឹមនឹងឫសគល់បញ្ហាដែលកើតមានខាងលើនេះ ទាំងអង្គការសង្គមស៊ីវិល និងអង្គការអន្តរជាតិនានាក៏កំពុងខ្នះខ្នែងចូលរួមពិសេសក្នុងការអប់រំយុវជនឡាវឲ្យបានយល់ដឹងពីបញ្ហានេះ ក៏ដូចជានីតិវិធីមួយចំនួនអនុវត្តឲ្យបានប្រសើរឡើងវិញនៅទូទាំងប្រទេសឡាវ ដើម្បីបន្ថយអត្រាមានផ្ទៃពោះវ័យក្មេងក្នុងកម្រិតខ្ពស់ជាងគេនេះ ៕

ដោយ៖ មាន រតនា