កូរ៉េខាងជើង លុបចោលទំនុកច្រៀងមានឃ្លាឧបទ្វីបកូរ៉េក្នុងបទគោរពទង់ជាតិ

ប្រទេសកូរ៉េខាងជើងបានកែកុន ក៏ដូចជាជួសទំនុកច្រៀងនៅក្នុងបទគោរពទង់ជាតិរបស់ខ្លួន ពោលរដ្ឋាភិបាលទីក្រុងព្យុងយ៉ាងបានលុបចេញនូវពាក្យដែលទាក់ទងទៅនឹងឧបទ្វីបកូរ៉េទាំងអស់ ។ នេះបើយោងតាមការចេញផ្សាយដោយសារព័ត៌មានកូរ៉េខាងជើង NK News កាលពីថ្ងៃទី១៦ ខែកុម្ភៈកន្លងទៅ ។

យោងតាមគេហទំព័ររបស់ក្រសួងការបរទេសកូរ៉េខាងជើងបានឲ្យដឹងថា ពាក្យពេចន៍ក្នុងបទស្នេហាជាតិកូរ៉េខាងជើងនៅត្រង់ឃ្លា “Three Thousand Ri” មានន័យថា “ចម្ងាយជាង ១,០០០ គីឡូម៉ែត្រ” ត្រូវបានលុបចោលពីខ្លឹមសារដើមដែលមានន័យពេញថា “មាតុភូមិដ៏ស្រស់ស្អាតរបស់ខ្ញុំមានចម្ងាយជាង ១,០០០ គីឡូម៉ែត្រ” និងដាក់ជំនួសមកវិញនូវពាក្យ “ពិភពលោកនេះ” មានន័យថា “មាតុភូមិដ៏ស្រស់ស្អាតរបស់ខ្ញុំនៃពិភពលោកនេះ” ។

កូរ៉េខាងជើងចាត់ទុកពាក្យពេចន៍ “ចម្ងាយជាង ១,០០០ គីឡូម៉ែត្រ” ថាតំណាងឲ្យឧបទ្វីបកូរ៉េដែលលាតសន្ធឹងចម្ងាយប្រហែល ១,០០០ គីឡូម៉ែត្រពីកូរ៉េខាងជើងទៅកូរ៉េខាងត្បូង ។ ប៉ុន្តែទោះជាយ៉ាងណា រដ្ឋាភិបាលទីក្រុងព្យុងយ៉ាង​មិន​បាន​លើក​ឡើង​ពីឫសគល់​នៅ​ពី​ក្រោយ​ការកែ ឬលុបពាក្យពេចន៍ទាំង​នោះនៅឡើយ​ទេ ។

ទន្ទឹមនោះ ចំណាត់ការនេះកើតមានឡើង បន្ទាប់ពីមេដឹកនាំកូរ៉េខាងជើងលោក គីម ជុងអ៊ុន បានប្រកាសក្តែងៗកាលពីខែមុនថា ប្រទេសកូរ៉េខាងត្បូងគឺជាសត្រូវធំបំផុតរបស់ទីក្រុងព្យុងយ៉ាង ហើយលោកថែមទាំងព្រមានទៀតថា កូរ៉េខាងជើងគ្មានចេតនាបញ្ចៀសសង្គ្រាមណាមួយឡើយ ហើយប្រទេសនេះក៏មិនស្ទាក់ស្ទើរក្នុងការប្រើគ្រប់មធ្យោបាយ និងកម្លាំងទាំងអស់កម្ទេចកូរ៉េខាងត្បូងនោះដែរ ។

ស្របពេលជាមួយគ្នានេះ លោក គីម ជុនអ៊ុន ក៏បានប្រាប់ប្រជាជនកូរ៉េខាងជើងទាំងអស់កុំឲ្យប្រើពាក្យ ឬការបញ្ចេញមតិណាមួយដែលបង្ហាញថា ប្រជាជនកូរ៉េខាងជើង និងកូរ៉េខាងត្បូងគឺជាពូជសាសន៍តែមួយ ហើយចាប់តាំងពីខែមករាមក ទីក្រុងព្យុងយ៉ាងបានបិទទីភ្នាក់ងារដែលគ្រប់គ្រងកិច្ចការអន្តរកូរ៉េ បិទគេហទំព័រ និងកាត់ផ្តាច់សេវាវិទ្យុទាំងអស់ដែលបង្កើតឡើងដើម្បីផ្សព្វផ្សាយការឃោសនាទៅកាន់កូរ៉េខាងត្បូង ៕

ដោយ ៖ សុខ ជីវ័ន្ត

ចុចអាន ៖ នាយករដ្ឋមន្ត្រី ថៃ បញ្ជាក់ច្បាស់ៗពីថ្ងៃដោះលែងលោក ថាក់ស៊ីន ឲ្យមាន​សេរីភាព