សីតុណ្ហភាព នៅភាគខាងលិចប្រទេសចិន ធ្លាក់ចុះដល់ -៥២.៣ អង្សាសេ

អាកាសធាតុក្នុងតំបន់ Xinjiang ចុងភាគខាងលិចប្រទេសចិន បានចុះត្រជាក់បំផុតមិនធ្លាប់មានក្នុងប្រវត្តិសាស្រ្តរយៈពេល៦៤ឆ្នាំ ពោលគឺសីតុណ្ហភាព បានធ្លាក់ដល់ -៥២.៣ អង្សាសេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមប្រព័ន្ធផ្សព្វផ្សាយរដ្ឋ, សីតុណ្ហភាពកាលពីថ្ងៃអាទិត្យទី១៨ខែកុម្ភៈនៅទីប្រជុំជន Tuerhong នៃស្រុក Fuyun គឺបានធ្លាក់ចុះដល់កម្រិតទាបបំផុត តាំងពីកំណត់ត្រាចាប់ផ្តើមក្នុងតំបន់ Xinjiang ពោលគឺបំបែកកំណត់ត្រាចាស់ -៥១.៥អង្សាសេនៅថ្ងៃទី២១ខែមករាឆ្នាំ១៩៦០។

ទូរទស្សន៍ CCTV ផ្សាយថា ដោយសារភាពត្រជាក់និងព្រឹលច្រើនថ្ងៃ, ផ្លូវប្រវែង៨៥៣គីឡូម៉ែត្រនៅក្នុងតំបន់ Altay ត្រូវរងផលប៉ះពាល់ ជាហេតុជំរុញឲ្យអាជ្ញាធរ បញ្ជូនរថយន្តចំនួន៤៧គ្រឿង និងអ្នកជួយសង្គ្រោះ៨៦នាក់ ទៅសម្អាតព្រឹលចេញពីផ្លូវទាំងយប់។

ចំណែកតួលេខរបស់ក្រសួងដឹកជញ្ជូនបានបង្ហាញថា តំបន់ Inner Mongolia និង Xinjiang រួមជាមួយខេត្ត Liaoning, Jilin និង Heilongjiang បានបិទផ្លូវចំនួន៤៣ខ្សែនិងស្ថានីយចំនួន៦២៣។

ស្របពេលជាមួយគ្នានោះ អាជ្ញាធរអាកាសធាតុជាតិ បានសម្រេចចិត្តចេញការព្រមានអំពីលក្ខខណ្ឌអាកាសធាតុត្រជាក់គ្រោះថ្នាក់ឡើងដល់កម្រិតខ្ពស់បំផុតទីពីរ ព្រោះថា អាកាសធាតុត្រជាក់ដល់ឆ្អឹងនេះ នឹងអូសបន្លាយដល់ថ្ងៃព្រហស្បតិ៍ឯណោះ។

សូមបញ្ជាក់ថា កាលពីឆ្នាំមុន ចិនបានជួបប្រទះព្រឹត្តិការណ៍អាកាសធាតុកាចសាហាវ ច្រើនសន្ធឹកដូចជាព្យុះខ្សាច់រហូតដល់ភ្លៀងធ្លាក់ខ្លាំង និងរលកកម្តៅបំបែកកំណត់ត្រា ក៏ដូចជាព្យុះទីហ្វុងជាបន្តបន្ទាប់ផងដែរ។

កាលពីចុងសប្តាហ៍កន្លងទៅនេះ ព្យុះខ្សាច់ធ្ងន់ធ្ងរ ក៏បានគ្របដណ្តប់ទីក្រុងជាច្រើននៅក្នុងតំបន់ Ningxia Hui ទៀតផង៕

អត្ថបទ៖ សុខ សុវណ្ណ

ចុចអាន៖ រលកកម្តៅ ចាប់ផ្តើមវាយប្រហារភាគខាងត្បូងប្រទេស វៀតណាម