ថៃ នឹងជួបអាកាសធាតុក្តៅខ្លាំង ចាប់ពីខែក្រោយទៅ

តាមការចុះផ្សាយរបស់កាសែត Bangkok Post កាលពីថ្ងៃចន្ទទី១៩ខែកុម្ភៈ នាយកដ្ឋានឧតុនិយមថៃ បានចេញការព្យាករអំពីអាកាសធាតុក្តៅខ្លាំងសម្រាប់ខែមីនានិងខែមេសា ដោយសីតុណ្ហភាពនឹងកើនឡើងចន្លោះពី ៤៣ ដល់ ៤៥ អង្សាសេនៅក្នុងខេត្តមួយចំនួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាយកដ្ឋានព្រមានថា នៅសប្តាហ៍នេះ សីតុណ្ហភាពនៅប៉ែកខាងលើនៃប្រទេស នឹងចាប់ផ្តើមហក់ឡើងជាបណ្តើរៗហើយ លើកលែងតែនៅតំបន់ភ្នំភាគខាងជើង និងឦសានប៉ុណ្ណោះ។

ទោះបីជាយ៉ាងណាក៏ដោយ តំបន់ទំនាបកណ្តាល រួមទាំងទីក្រុងបាងកក និងភាគខាងកើតផងដែរ នឹងត្រូវជួបប្រទះអាកាសធាតុក្តៅខ្លាំង ហើយប្រទេសថៃ​ នឹងឈានចូលរដូវក្តៅជាផ្លូវការនៅចុងខែកុម្ភៈនេះតែម្តង។

ស្របពេលជាមួយគ្នានោះដែរ នាយកដ្ឋានព្រមានទៀតថា ខែមីនានិងមេសាឆ្នាំនេះ ថៃ នឹងជួបប្រទះរលកកម្តៅក្តៅជាងឆ្នាំមុនប្រហែល ១ ទៅ ២ អង្សាសេ។

ព័ត៌មាននេះកើតឡើងចំពេលភាគខាងត្បូងប្រទេសវៀតណាម ក៏រងការវាយប្រហារដោយរលកកម្តៅដ៏ខ្លាំងផងដែរពេញមួយសប្តាហ៍ ហើយកម្តៅបែបនេះនឹងបន្តប៉ុន្មានថ្ងៃទៀត។

តាមការចុះផ្សាយរបស់ VN Express, មជ្ឈមណ្ឌលជាតិព្យាករអាកាសធាតុវៀតណាម បានចេញសេចក្តីជូនដំណឹងសម្រាប់សីតុណ្ហភាពហក់ឡើងខ្លាំងចាប់ពី ៣២ដល់៣៧អង្សារសេកាលពីថ្ងៃអាទិត្យ។

ដោយឡែកកាលពីថ្ងៃព្រហស្បតិ៍សប្តាហ៍មុន តំបន់ខ្លះបានជួបប្រទះសីតុណ្ហភាពលើស៣៧អង្សាសេទៅទៀត ដូចជានៅទីក្រុង Bien Hoa នៃខេត្ត Dong Nai ភាគអាគ្នេយ៍ប្រទេស ជាដើម។ ចំណែកនៅទីក្រុងហូជីមិញ សីតុណ្ហភាពខ្ពស់បំផុតនៅថ្ងៃដដែលនោះ គឺបានឈានដល់ ៣៦អង្សាសេ៕

អត្ថបទ៖ សុខ សុវណ្ណ

ចុចអាន៖ រលកកម្តៅ ចាប់ផ្តើមវាយប្រហារភាគខាងត្បូងប្រទេស វៀតណាម