មហាសេដ្ឋីស្ថាបនិកហាងលក់បញ្ចុះតម្លៃល្បីបំផុតរបស់ ជប៉ុន ទទួល​មរណភាពក្នុងវ័យ ៨០ ឆ្នាំ

លោក Hirotake Yano មហាសេដ្ឋីស្ថាបនិក​​នៃ​ក្រុមហ៊ុន​លក់​រាយ​បញ្ចុះតម្លៃ​របស់​ជប៉ុន Daiso បានទទួលមរណភាព​ ដោយសារ​ជំងឺ​គាំងបេះដូង​ក្នុង​អាយុ ៨០ ឆ្នាំ ។ នេះបើយោងតាមការចេញផ្សាយរបស់សារពត៌មាន BBC នៅថ្ងៃទី ២០​ ខែកុម្ភៈនេះ ។

នៅក្នុងសេចក្តីថ្លែងការណ៍មួយដែលបានចេញផ្សាយកាលពីថ្ងៃចន្ទ ក្រុមហ៊ុន Daiso បាននិយាយថា លោក Hirotake Yano ជាមហាសេដ្ឋីស្ថាបនិកក្រុមហ៊ុន Daiso ដែលមានទ្រព្យសម្បត្តិសុទ្ធចំនួន ១.៩ ពាន់លានដុល្លារ បានទទួលមរណភាពកាលថ្ងៃទី១២ ខែកុម្ភៈ ។ ចំណែកពិធីបុណ្យសពឯកជនត្រូវបានប្រារព្ធឡើងដោយសមាជិកគ្រួសាររបស់លោករួចទៅហើយ ខណៈសេចក្តីប្រកាសព័ត៌មានបានបន្ថែមថា ការជួបជុំរំលឹកខួបនឹងត្រូវធ្វើឡើងនៅពេលខាងមុខ ។

បន្ទាប់ពីបញ្ចប់ការសិក្សាពីសកលវិទ្យាល័យ Chuo នៃទីក្រុងតូក្យូក្នុងឆ្នាំ ១៩៦៧ លោក Yano មានការងារផ្សេងៗគ្នាជាច្រើន រួមទាំងការបើកជំនួញនេសាទរបស់ឪពុកក្មេករបស់គាត់រហូតដល់ក្ស័យធន ។ នៅឆ្នាំ ១៩៧២ ក្នុងវ័យ ២៩ ឆ្នាំគាត់បានបង្កើតអាជីវកម្មដំបូងគឺហាងលក់ទំនិញតាមដងផ្លូវដែលមានឈ្មោះថា Yano Shoten ឬ Yano Store ។

៥ ឆ្នាំក្រោយមកគាត់បានប្តូរឈ្មោះក្រុមហ៊ុនទៅជា Daiso និងបាន​ក្លាយ​ជា​ហាងល្បី​សម្រាប់​គ្រប់​មុខ​ទំនិញ​ដែល​មាន​តម្លៃ ១០០ យ៉េន ក្រោយលោក និងប្រពន្ធរបស់លោកឈ្មោះ Katsuyo បានរកឃើញថា ការឲ្យតម្លៃផលិតផលខុសគ្នា គឺចំណាយពេលគិតលុយច្រើនពេក ដូច្នេះពួកគេសម្រេចចិត្តគិតថ្លៃ ១០០ យ៉េនសម្រាប់ទំនិញគ្រប់មុខ ហើយអាជីវកម្មបែបនេះកំពុងពេញនិយមទូទាំងពិភពលោក ។

គួរបញ្ជាក់ថា គិតត្រឹមដំណាច់ឆ្នាំ២០២៣ ក្រុមហ៊ុន Daiso មានហាងចំនួន ៤,៣៦០ នៅក្នុងប្រទេសកំណើតរបស់ខ្លួន និងមានហាងជិត ១,០០០ កន្លែងជុំវិញពិភពលោក រួមទាំងនៅទូទាំងអាស៊ី ក៏ដូចជានៅអាមេរិកខាងជើង និងមជ្ឈឹមបូព៌ាផងដែរ ។ វាមានទំនិញផ្សេងៗគ្នាជាង ៧០,០០០ មុខនៅក្នុងស្តុក និងបង្កើតផលិតផលថ្មីជាង ១,០០០ ក្នុងមួយខែ ហើយក្រុមហ៊ុន​នេះបានហៅ​ខ្លួន​ឯង​ថាជា អ្នក​ផ្គត់​ផ្គង់​សម្ភារៈ​រស់​នៅ​លេខ ១ របស់​ជប៉ុន ៕

អត្ថបទ ៖ ប៊ុន សុភាព