លោក វ៉្លាឌីមៀ ពូទីន ជូនអំណោយរថយន្តប្រណីតមួយគ្រឿង ដល់លោក គីម ជុងអ៊ុន

ជារឿងដ៏គួរឱ្យចាប់អារម្មណ៍ខ្លាំងមួយ សម្រាប់ថ្ងៃទី២០ ខែកុម្ភៈ នេះ ដោយប្រព័ន្ធផ្សព្វផ្សាយរដ្ឋរបស់ទីក្រុងព្យុងយ៉ាងបាននិយាយថា ប្រធានាធិបតីរុស្ស៊ី លោក វ្ល៉ាឌីមៀ ពូទីន បានផ្តល់អំណោយរថយន្ត Aurus ដែលជារថយន្តប្រណិតផលិតដោយរុស្ស៊ី ដល់មេដឹកនាំកូរ៉េខាងជើង លោក គីម ជុងអ៊ុន ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាមួយគ្នានេះ អ្នកនាំពាក្យវិមានក្រឹមឡាំង លោក Dmitry Peskov បានបញ្ជាក់ពីអំណោយនេះ ដោយនិយាយថា វាគឺជារថយន្ត Aurus Senat ដែលជារថយន្តប្រណីតម៉ូឌែល Full Option ហើយលោកពូទីន ក៏ប្រើប្រាស់វាដូចគ្នាដែរ ។ នេះបើយោងតាមការផ្សាយរបស់សារព័ត៌មាន BBC នៅថ្ងៃច័ន្ទនេះ ។

លោក គីម ជុងអ៊ុន ត្រូវបានគេជឿថា ជាអ្នកចូលចិត្តរថយន្ត ហើយគេដឹងទៀតថា មេដឹកនាំផ្ដាច់ការរូបនេះ បានប្រមូលរថយន្តបរទេសប្រណីតៗជាច្រើនគ្រឿងទុកក្នុងវិមានរបស់លោកផងដែរ ។ ហើយបន្ទាប់ពីទទួលបានអំណោយរថយន្តថ្មី រថយន្តចាស់របស់លោកគីម ម៉ាក limousine ត្រូវបានប្រគល់ទៅឱ្យជំនួយការកំពូលរបស់គាត់ប្រើជំនួសវិញ ។

ទីភ្នាក់ងារសារព័ត៌មានរដ្ឋកូរ៉េខាងជើង KCNA បានចុះផ្សាយដោយលើកយកសម្ដីប្អូនស្រីរបស់លោក គីម ជុងអ៊ុន ឈ្មោះ គីម យូជុង ថា អំណោយបាននេះដើរតួជាការបង្ហាញយ៉ាងច្បាស់នៃទំនាក់ទំនងផ្ទាល់ខ្លួនពិសេសរវាងមេដឹកនាំកំពូល នៃប្រទេសទាំងពីរ ។

យ៉ាងណាមិញ សម្រាប់ក្រសួងការបរទេសកូរ៉េខាងត្បូងបាននិយាយថា អំណោយនេះបានរំលោភលើការដាក់ទណ្ឌកម្មរបស់ក្រុមប្រឹក្សាសន្តិសុខអង្គការសហប្រជាជាតិប្រឆាំងនឹងប្រទេសកូរ៉េខាងជើង ដែលហាមឃាត់ការផ្គត់ផ្គង់យានយន្តប្រភេទមួយចំនួន រួមទាំងរថយន្តទំនើបៗផងដែរ ។

គួរឱ្យដឹងដែរថា រថយន្ត Aurus ជារថយន្តប្រណីតផលិតដោយក្រុមហ៊ុន Aurus Motors របស់រុស្ស៊ីបានបង្កើតឡើងក្នុងឆ្នាំ ២០១៨ ។ រថយន្ត Aurus ត្រូវបានគេមើលឃើញថា ជារថយន្តដែលមានគ្រោងឆ្អឹងស្រដៀងគ្នាទៅនឹងរថយន្ត Rolls Royce ដែរ ។ ចំពោះរថយន្ត Aurus Senat គឺជារថយន្តដែលបានកំណែប្រែពីរថយន្ត limousine បំពាក់ដោយ ម៉ាស៊ីន V8 ចំណុះ ៤.៤ លីត្រ ហើយក៏មានជម្រើស ម៉ាស៊ីន V12 ចំណុះ ៦.៦ លីត្រ ផងដែរ ៕

ប្រែសម្រួលដោយ÷ ប៉ោ កុសល