អាមេរិក ថា អំណោយដែលលោក ពូទីន ជូន គីម ជុងអ៊ុន គឺខុសច្បាប់

តាមការចុះផ្សាយរបស់សារព័ត៌មាន The Guardian, ក្រសួងការបរទេសអាមេរិកអះអាងថា រុស្ស៊ីបានធ្វើខុសច្បាប់ បំពានទណ្ឌកម្មអន្តរជាតិដែលដាក់លើកូរ៉េខាងជើង បន្ទាប់ពីប្រធានាធិបតី វ្ល៉ាឌីមៀរ ពូទីន ជូនអំណោយរថយន្តទំនើបមួយគ្រឿងដល់មេដឹកនាំ គីម ជុងអ៊ុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅពេលសួរអំពីរឿងនេះ ក្នុងអំឡុងសន្និសីទសារព័ត៌មានកាលពីថ្ងៃពុធទី២១ខែកុម្ភៈ អ្នកនាំពាក្យក្រសួងការបរទេសអាមេរិក​ លោក Matthew Miller បានអះអាងថា ការដែលលោក ពូទីន ជូនរថយន្ត Aurus ផលិតដោយរុស្ស៊ីទៅឲ្យលោក គីម គឺជាការប្រព្រឹត្តខុស រំលោភលើទណ្ឌកម្មដែលអង្គការសហប្រជាជាតិ ដាក់លើទីក្រុងព្យុងយ៉ាង។

លោកបន្តថា “សេចក្តីសម្រេចរបស់ក្រុមប្រឹក្សាសន្តិសុខ UN គឺតម្រូវឲ្យរដ្ឋជាសមាជិក UN ទាំងអស់ ហាមឃាត់ទាំងការផ្គត់ផ្គង់យានជំនិះ និងរថយន្តស៊េរីទំនើបដល់កូរ៉េខាងជើង ហើយ​ប្រសិន​បើ​នេះ​ជា​ការ​ពិតមែន នេះគឺបង្ហាញជាថ្មីម្តងទៀតថា ​រុស្ស៊ី​កំពុងរំលោភ​លើ​សេចក្តី​សម្រេច​ចិត្ត​របស់​ក្រុម​ប្រឹក្សា​សន្តិសុខ UN ដែល​ខ្លួន​​គាំទ្រ”។

យ៉ាងណា រុស្ស៊ីមិនទុកយូរឡើយ ដោយអ្នកនាំពាក្យក្រសួងការបរទេស លោកស្រី Maria Zakharova បានច្រានចោលការដាក់បន្ទុកនេះភ្លាមៗ ហើយឆ្លៀតឆ្លើយតបទៅការចោទប្រកាន់ស្រដៀងគ្នាពីមន្ត្រីកូរ៉េខាងត្បូងកាលពីថ្ងៃអង្គារថា “ប្រសិនបើទីក្រុងសេអ៊ូល មានសំណួរអំពីការអនុលោមតាមទណ្ឌកម្មរបស់ UN ប្រឆាំងនឹងកូរ៉េខាងជើង ពួកគេគួរតែទាក់ទងទៅគណៈកម្មាធិការដាក់ទណ្ឌកម្មរបស់ក្រុមប្រឹក្សាសន្តិសុខ UN ទៅ។ ទីក្រុងវ៉ាស៊ីនតោនកំពុងដាក់សម្ពាធលើទីក្រុងសេអ៊ូល ឲ្យបង្អាក់ទំនាក់ទំនងពាណិជ្ជកម្មស្របច្បាប់ជាមួយប្រទេសដទៃហើយ”។

សូមបញ្ជាក់ថា លោកពូទីនបានជូនរថយន្តទៅឲ្យលោក គីម តាំងពីសប្តាហ៍មុនមកម្ល៉េះ ប៉ុន្តែទើបតែធ្លាយព័ត៌មាននៅប៉ុន្មានថ្ងៃនេះប៉ុណ្ណោះ។

ប្អូនស្រីលោកគីម គឺអ្នកនាង Kim Yo-jong និងជាមន្ត្រីជាន់ខ្ពស់កូរ៉េខាងជើងដទៃទៀត បានហៅអំណោយនេះថាជា ការបង្ហាញយ៉ាងច្បាស់អំពីទំនាក់ទំនងផ្ទាល់ខ្លួនដ៏ពិសេសរវាងលោក គីម និងលោក ពូទីន។

លោក ពូទីន បានជួបជាមួយលោក គីម កាលពីខែកញ្ញាឆ្នាំមុន នៅតំបន់ចុងបូព៌ារុស្ស៊ី ដោយនៅទីនោះ មេដឹកនាំកូរ៉េខាងជើងបានទស្សនាទីតាំងយោធា និងស៊ីវិលជាច្រើនកន្លែង ហើយប្រមុខរដ្ឋទាំងពីរ ក៏បានទៅស្ថានីយបាញ់បង្ហោះផ្កាយរណប Vostochny ផងដែរ ដែលទីនោះហើយ លោកពូទីន បង្ហាញរថយន្តរដ្ឋម៉ាក Aurus ចំនួនពីរ ដល់លោក គីម៕

អត្ថបទ៖ សុខ សុវណ្ណ

ចុចអាន៖ តើរថយន្ត Aurus ដែលលោក ពូទីន ជូនមេដឹកនាំកូរ៉េខាងជើង ពិសេសយ៉ាងណាទៅ?