ក្រុមហ៊ុនអាមេរិក បង្កើតប្រវត្តិសាស្រ្ត នាំយានអវកាសឯកជន ចុះចតលើឋានព្រះចន្ទ ដោយជោគជ័យ

តាមសេចក្តីរាយការណ៍របស់ Reuters និង AFP នៅថ្ងៃសុក្រទី២៣ខែកុម្ភៈ, យានអវកាសដែលផលិតនិងបាញ់បង្ហោះដោយក្រុមហ៊ុន Intuitive Machines បានទៅដល់ឋានព្រះចន្ទដោយជោគជ័យហើយ ដែលនេះគឺជាការចុះចតលើកដំបូងរបស់សហរដ្ឋអាមេរិកលើផ្ទៃព្រះចន្ទក្នុងរយៈពេលជាងកន្លះសតវត្សរ៍ និងជាការចុះចតលើកដំបូងក្នុងប្រវត្តិសាស្រ្តដោយក្រុមហ៊ុនឯកជនមួយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យានអវកាស បាននាំយកមនុស្សយន្តជើងប្រាំមួយឈ្មោះ Odysseus ទៅកាន់រណ្ដៅ Malapert A នៅជិតប៉ូលខាងត្បូងរបស់ឋានព្រះចន្ទ ហើយបេសកកម្មដែលមានការជួយជ្រោមជ្រែងដោយអង្គការណាសាមួយនេះ នឹងផ្តោតសំខាន់លើការប្រមូលទិន្នន័យស្តីពីអន្តរកម្មអាកាសធាតុក្នុងលំហជាមួយផ្ទៃព្រះចន្ទ តារាសាស្ត្រវិទ្យុ និងទិដ្ឋភាពផ្សេងទៀតនៃបរិយាកាសព្រះច័ន្ទសម្រាប់ជួយសម្រួលដល់ការសិក្សារបស់យានអវកាសដទៃនាពេលអនាគត។

ក្រុមហ៊ុននិយាយថា Odysseus នៅតែមានសភាពល្អ​ ពេលវាបន្តគោចរជុំវិញព្រះច័ន្ទ ដោយអាចបញ្ជូនទិន្នន័យហោះហើរ និងរូបភាពទៅកាន់មជ្ឈមណ្ឌលគ្រប់គ្រងបេសកកម្មរបស់ក្រុមហ៊ុន Intuitive Machines នៅទីក្រុង Houston។

សូមបញ្ជាក់ជាថ្មី Odysseus ត្រូវបានបាញ់បង្ហោះកាលពីថ្ងៃទី១៥ខែកុម្ភៈនៅលើរ៉ុកកែត SpaceX Falcon 9។ យានអវកាសនេះ មានបំពាក់ជាមួយប្រព័ន្ធអុកស៊ីសែនរាវសូពើខូល និង មេតានប្រូភូលសិនរាវ ប្រភេទថ្មីដែលអនុញ្ញាតឲ្យវារត់ឆ្លងកាត់អវកាសក្នុងពេលវេលាយ៉ាងរហ័ស។

បេសកកម្មក្រុមហ៊ុន Intuitive Machines គឺតំណាងជាការចុះចតលើផ្ទៃព្រះចន្ទលើកដំបូងដោយយានអវកាសអាមេរិក ចាប់តាំងពីយាន Apollo 17 ក្នុងឆ្នាំ១៩៧២។

មកទល់នឹងពេលនេះ មានយានអវកាសមកពីប្រទេសតែ៤ផ្សេងទៀតប៉ុណ្ណោះ ដែលបានចុះចតនៅលើឋានព្រះចន្ទដូចជាអតីតសហភាពសូវៀត ចិន ឥណ្ឌា និងជប៉ុន ខណៈសហរដ្ឋអាមេរិក គឺជាប្រទេសតែមួយគត់ដែលបានបញ្ជូនមនុស្សទៅកាន់ឋានព្រះចន្ទ៕

អត្ថបទ៖ សុខ សុវណ្ណ

ចុចអាន៖ យានអវកាសណាសា វិលមកផែនដីវិញ ជាមួយសំណាកអាចម៍ផ្កាយ ក្រោយរង់ចាំអស់រយៈពេល ៧ឆ្នាំ