លោក Biden អញ្ជើញជួបប្រពន្ធកូនមេបក្សប្រឆាំង រុស្ស៊ី Navalny និង​ប្ដេជ្ញាដាក់ទោសទណ្ឌលើលោក Putin

ប្រធានាធិបតីសហរដ្ឋអាមេរិកលោក Joe Biden កាលពីថ្ងៃព្រហស្បតិ៍បានអញ្ជើញជួបភរិយា និងកូនស្រីលោក Alexei Navalny មេបក្សប្រឆាំងរុស្ស៊ីដែលទទួលមរណភាពនៅក្នុងមន្ទីរឃុំឃាំងកាលពីសប្តាហ៍មុន ហើយលោកប្រធានាធិបតីថែមទាំងហៅបុរសហ៊ានរិះគន់មិនសំចៃមាត់លើលោក Putin រូបនេះថាជា “មនុស្សអង់អាចក្លាហានគួរឲ្យស្ញប់ស្ញែង” ។ នេះបើយោងតាមការចេញផ្សាយដោយទីភ្នាក់ងារព័ត៌មាន Reuter កាលពីថ្ងៃទី២២ ខែកុម្ភៈកន្លងទៅ ។

ស្របពេលជាមួយគ្នានេះ លោកប្រធានាធិបតីអាមេរិកក៏បានប្រាប់ភរិយាលោក Navalny គឺលោកស្រី Yulia និងកូនស្រីឈ្មោះ Dasha ដែរថា “លោក Navalny គឺជាបុរសដែលមានភាពអង់អាចក្លាហានមិនគួរឲ្យជឿ ហើយវាពិតជាអស្ចារ្យខ្លាំងមែនទែនដែលប្រពន្ធ និងកូនស្រីរបស់គាត់កំពុងដើរតាមគន្លងប្ដីរបស់ខ្លួន” ។

ទន្ទឹមនោះ ក្នុងអំឡុងពេលថ្លែងទៅកាន់អ្នកសារព័ត៌មាននៅរដ្ឋកាលីហ្វ័រញ៉ា លោក Biden ក៏បានបញ្ជាក់ច្បាស់ៗផងដែរថា រដ្ឋាភិបាលទីក្រុងវ៉ាស៊ីនតោនក៏គ្រោងនឹងដាក់ទណ្ឌកម្មទ្រង់ទ្រាយធំទៅលើប្រទេសរុស្ស៊ី និងប្រធានាធិបតី Vladimir Putin ក្រោយរឿងហេតុដ៏សោកសង្រេងជាពន់ពេកនៃមរណភាពរបស់លោក Navalny កាលពីថ្ងសុក្រសប្ដាហ៍មុន ។

ដោយឡែក ក្រៅពីជំនួបនោះហើយ លោកប្រធានាធិបតី Joe Biden ក៏បានចេញសេចក្ដីថ្លែងការណ៍មួយបង្ហាញពីការចួលរួមរំលែកទុក្ខដ៏ក្រៀមក្រំទៅកាន់គ្រួសារនៃសពរបស់លោក Navalny ផងដែរ ដោយបង្កបនូវអត្ថន័យយ៉ាងជ្រាលជ្រៅថា “ភាពអង់អាចក្លាហានមិនធម្មតា និងកេរ្តិ៍ឈ្មោះរបស់គាត់ក្នុងការប្រយុទ្ធប្រឆាំងអំពើពុករលួយសម្រាប់ប្រជាធិបតេយ្យរុស្ស៊ី គឺមានចំពោះមនុស្សគ្រប់ៗគ្នា” ។

យោងតាមសេចក្ដីរាយការណ៍ពីទីភ្នាក់ងារព័ត៌មាន AP បានឲ្យដឹងថា លោក Navalny បានស្លាប់ភ្លាមៗ ក្រោយបាត់បង់ស្មារតី ហើយដួលទៅនឹងដី ខណៈដែលលោកកំពុងតែដើរធម្មតា ។ ភ្លាមៗនោះក្រុមគ្រូពេទ្យក៏បានមកដល់កន្លែងកើតហេតុក្នុងបន្ទប់ឃុំឃាំងរបស់គាត់នៅតំបន់ Arctic Circle និងបញ្ជូនទៅកាន់មន្ទីរពេទ្យផងដែរ ប៉ុន្តែវាហួសពេលទៅហើយ ខណៈទាក់ទងនឹងមូលហេតុនៃការស្លាប់របស់ទណ្ឌិតរូបនេះក៏មិនទាន់បានបង្ហាញដូចគ្នា ។

គួរបញ្ជាក់ថា លោក Navalny មានឈ្មោះបោះសំឡេង និងទទួលភាពល្បីល្បាញតាមរយៈការលាតត្រដាងការពិត និងនិយាយមិនសំចៃមាត់ប្រឆាំងនឹងអំពើពុករលួយនៅក្នុងជួររដ្ឋាភិបាលរបស់លោក ពូទីន ។ នៅឆ្នាំ ២០២០ មេបក្សប្រឆាំងរូបនេះត្រូវបានគេបំពុល ហើយបានចាយពេលរាប់ខែដើម្បីព្យាបាលនៅក្នុងប្រទេសអាល្លឺម៉ង់ ខណៈនៅពេលត្រឡប់មកទឹកដីរុស្ស៊ីវិញ គាត់ត្រូវបានចាប់ខ្លួនភ្លាមៗពីបទចោទប្រកាន់ជាប់ទាក់ទិននឹងហេតុផលនយោបាយ ៕

ដោយ ៖ សុខ ជីវ័ន្ត

ចុចអាន ៖ មេដឹកនាំពិភពលោកដាក់បន្ទុកលោក ពូទីន ចំពោះករណីស្លាប់មេបក្សប្រឆាំង ខណៈ រុស្ស៊ី ក៏ចេញបកស្រាយ