ថៃ ចាប់ផ្តើម “សមយុទ្ធពស់វែកមាស” ចូលរួមដោយយោធាជិត ១ម៉ឺននាក់ មកពី៣០ប្រទេស

តាមការចុះផ្សាយរបស់ Bangkok Post, មន្ត្រីយោធាជិត១០០០០នាក់ មកពី៣០ប្រទេស បានចូលរួមក្នុងសមយុទ្ធពស់វែកមាស ដែលនឹងប្រព្រឹត្តឡើងចាប់ពីថ្ងៃទី២៦ខែកុម្ភៈ ដល់ថ្ងៃទី៨ខែមីនា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Jirayu Huangsap អ្នកនាំពាក្យក្រសួងការពារជាតិថៃ បាននិយាយកាលពីថ្ងៃអាទិត្យថាមន្ត្រីយោធាចំនួន៩៥៩០នាក់ នឹងចូលរួមក្នុងសមយុទ្ធរយៈពេល១២ថ្ងៃ ខណៈឆ្នាំនេះ សមយុទ្ធត្រូវបានរៀបចំឡើងជាទ្រង់ទ្រាយធំលើកដំបូង ចាប់តាំងពីវិបត្តិជំងឺរាតត្បាតកូវីដ១៩។

ស្របពេលជាមួយគ្នានោះ លោក Nopasit Chakpitak មន្ត្រីផ្នែកអាកាសចរណ៍ថៃ បានគូសបញ្ជាក់ថា សមយុទ្ធពស់វែកមាសលើកទី៤៣នេះ នឹងចាប់ផ្តើមពីម៉ោង៨ព្រឹកដល់ម៉ោង៩យប់ ហើយក្នុងអំឡុងពេលនោះ ដែនអាកាសនឹងត្រូវបិទនៅតំបន់មួយចំនួននៃភាគឦសាន ខាងជើង បូព៌ា និងខាងត្បូង ដើម្បីសម្រួលដល់សមយុទ្ធយោធា ដូចនេះហើយជើងហោះហើរ អាចត្រូវពន្យារពេលបន្តិច។

ងាកទៅលោក Jirayu Huangsub ឯណោះវិញ, អ្នកនាំពាក្យរូបនេះក៏បានបញ្ជាក់ពីការដាក់បញ្ចូលក្បាច់គុន Muay Thai ទៅក្នុងសមយុទ្ធពស់វែកមាសឆ្នាំ២០២៤នេះដែរ ព្រោះ​រដ្ឋាភិបាល​រំពឹង​ថា ទ័ព​ចូល​រួម​នឹង​ជួយ​លើក​កម្ពស់​កីឡា​នៅ​បរទេស​នា​ពេល​អនាគត។

សូមបញ្ជាក់ ពស់វែកមាស គឺជាសមយុទ្ធដែលកងទ័ពថៃ និងទីបញ្ជាការដ្ឋានឥណ្ឌូប៉ាស៊ីហ្វិកសហរដ្ឋអាមេរិក សហការគ្នារៀបចំឡើង។

សមយុទ្ធពស់វែកមាស ដែលបង្កើតឡើងដំបូងតាំងពីឆ្នាំ១៩៨២ គឺជាសមយុទ្ធយោធាពហុភាគីដ៏ចំណាស់បំផុតមួយរបស់ពិភពលោក និងធំជាងគេ​បង្អស់​ប្រចាំនៅតំបន់អាស៊ីអាគ្នេយ៍។

ព្រឹត្តិការណ៍​នេះ​នឹងមាន​ប្រទេស​ចំនួន​ប្រាំពីរ​មកចូលរួមក្នុង​សម​យុទ្ធ​សង្គ្រាម​ធំដូចជា​ថៃ សហរដ្ឋអាមេរិក សិង្ហបុរី ជប៉ុន ឥណ្ឌូណេស៊ី កូរ៉េខាងត្បូង និង​ម៉ាឡេស៊ី ខណៈចិន អូស្ត្រាលី និងឥណ្ឌា នឹងចូលរួមក្នុងសមយុទ្ធជំនួយមនុស្សធម៌ ចំណែកប្រទេសឯទៀត ត្រូវចូលរួមក្នុងសកម្មភាពផ្សេងៗ៕

អត្ថបទ៖ សុខ សុវណ្ណ

ចុចអាន៖ ឆ្នាំនេះ ថៃ ដាក់បញ្ចូល Muay Thai ក្នុងសមយុទ្ធ “ពស់វែកមាស”