ឆេះយន្តហោះពេលកំពុងធ្វើដំណើរចេញពីខេត្តមួយរបស់ ថៃ ខណៈអ្នកជិះ ស្លន់ស្លោរកទឹកពន្លត់

យោងតាមការចុះផ្សាយសារព័ត៌មាន Daily News Online បានបញ្ចាក់ពីហេតុការណ៍ដ៏រន្ធត់មួយ បានកើតឡើងកាលពីថ្ងៃទី ២៤ ខែកុម្ភៈ ឆ្នាំ២០២៤ បណ្ដាលឲ្យអ្នកដំណើរលើយន្តហោះជាច្រើននាក់ភ័យស្លន់ស្លោ បន្ទាប់ពីមានផ្សែងហុយទ្រលោមចេញពី Power bank ដែលឆាបឆេះឡើងមក។​

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍​នេះបានកើតឡើងដោយសារតែអ្នកដំណើរម្នាក់បានថតដោយចៃដន្យ​ ហើយបង្ហោះលើទំព័រហ្វេសប៊ុកផ្ទាល់ខ្លួនរបស់គាត់ក្រោមឈ្មោះថា Stamp Pirachat Aryuyo តាមរយៈវីដេអូឃ្លិបនៃពេលវេលាដ៏គួរឲ្យភ័យខ្លាចបំផុតនៅពេលដែលផ្សែងហុយចេញ ជាមួយ​នឹង​ចំណង​ជើង​ខ្លី​មួយ​ថា «រៀបនឹងដេកលក់ហើយ បែរមកភ័យរឿងអគ្គិភ័យម្ដង»។

ក្នុងនោះផងដែរ ម្ចាស់​ហ្វេសប៊ុក​ដដែលបានផ្ដល់​បទសម្ភាសន៍​ដល់​អ្នក​សារព័ត៌មាន Daily News Online ដោយធ្វើការបញ្ជាក់​ថា ជើង​ហោះ​ហើរ​បាន​ចេញ​ដំណើរ​ពី​អាកាសយានដ្ឋាន​ដនមឿង ឆ្ពោះទៅខេត្តនគរស៊ីធម្មរាត។​ ប៉ុន្តែ​ក្នុង​ពេល​ធ្វើ​ដំណើរ​ ស្រាប់តែមាន​សំឡេងស្រែកស្លន់ស្លោពីសំណាក់ភ្ញៀវក្នុងយន្តហោះ​ នៅពេលពួកគេឃើញផ្កាភ្លើង និង​ផ្សែង​ចេញ​ពី​កន្លែងដាក់ឥវ៉ាន់​ជាន់ខាងលើ។ ភ្លាមៗនោះដែរ អ្នកចំណើរជាច្រើនបានសម្រុកនាំគ្នាជួយយកទឹកមកបាញ់ពន្លត់ ដូចបានបង្ហាញក្នុងឃ្លិបក្នុងហ្វេសប៊ុក។

មួយសន្ទុះក្រោយមក បុគ្គលិកលើយន្តហោះក៏បានយកបំពង់ពន្លត់អគ្គីភ័យមកជួយពន្លត់។ ចំណែក​ឯ​ការ​ហោះ​ហើរ​វិញ ការ​ចុះ​ចត​នឹង​បន្ត​ដំណើរ​ការ​ដូច​ធម្មតាដូចគ្មានរឿងហេតុកើតឡើងទាល់តែសោះ។ ​ ក្រោយពេលកើតហេតុ មិនមានការពន្យល់ ឬការជូនដំណឹងពីពីឡុតឬបុគ្គលិកម្នាក់ណាទាល់តែសោះ។ ស្របពេលដែល​អ្នកដំណើរ​ជាច្រើន បានជជែកគ្នា​និង​ប្រាប់ថា មូលហេតុ​មកពី power bank តែប៉ុណ្ណោះ៕

អត្ថបទ៖ សាង ស្រីល័ក្ខ

ចុចអាន៖​កូនក្រមុំចិនម្នាក់ត្រូវគេស្ងើចសរសើរ ក្រោយផ្លាស់ប្ដូរជីវិតពីកម្មកររោងចក្រ​ ក្លាយជា​សេដ្ឋីនី