ផ្ទុះជំងឺអាសន្នរោគលើនាវាទេសចរណ៍មួយគ្រឿង ប៉ះពាល់អ្នកដំណើរជាង ២២០០នាក់

អ្នកដំណើរប្រមាណ២២០០នាក់ ត្រូវជាប់នៅលើនាវាទេសចរណ៍ Norwegian Dawn ដោយសារតែការផ្ទុះឡើងនូវជំងឺអាសន្នរោគ។ នេះបើតាមសេចក្តីរាយការណ៍របស់ Daily Mail កាលពីថ្ងៃចន្ទទី២៦ខែកុម្ភៈ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាវាទេសចរណ៍ធ្វើដំណើរកម្សាន្តរយៈពេល១២ថ្ងៃមួយគ្រឿងនេះ បានចាកចេញពីតំបន់អាហ្រ្វិកខាងត្បូងឆ្លងកាត់តាម ម៉ូសំប៊ិក ហើយគ្រោងចូលចតក្នុងទីក្រុង Port Louis នៃប្រទេសម៉ូរីតានីនៅថ្ងៃចន្ទ ប៉ុន្តែបានទៅដល់ទីនោះមុនមួយថ្ងៃ ក្រោយពួកគេត្រូវបដិសេធសំណើឈប់ចតនៅកោះ Reunion។

ត្បិតក្រុមហ៊ុន Norwegian Cruise Line និយាយថា ភ្ញៀវមួយចំនួនពិតជាជួបបញ្ហារាគរូសមែននោះ ប៉ុន្តែក្រុមហ៊ុនមិនបានបញ្ជាក់ ឬបង្ហាញព័ស្តុតាងនៃជំងឺអាសន្នរោគនៅលើនាវាទេ។

ទេសចរជនជាតិអង់គ្លេសម្នាក់ ប្រាប់ MailOnline ថា គាត់នឹងលុបចោលការធ្វើដំណើរនេះ ហើយសុខចិត្តទិញសំបុត្រយន្តហោះថ្លៃ ឲ្យតែបានវិលត្រលប់ទៅស្រុកកំណើតវិញ ព្រោះគាត់ខ្លាចជំងឺរាលដាលពេញនាវា បង្កទៅជាភាពវឹកវរ។

ចំណែកទេសចរម្នាក់ទៀតគឺអ្នកស្រី Verdaas បានប្រាប់ថា “យើងចាប់ផ្តើមវេទនា ពេលអាជ្ញាធរនៅកោះ Réunion មិនអនុញ្ញាតឲ្យយើងចូលចតនៅទីនោះ។ យើងគិតថា យើងច្បាស់ជាត្រូវអណ្តែតតែលតោលលើមហាសាគរហើយ”។

ក្រៅពីភ្ញៀវ នាវានេះមានផ្ទុកនាវិកប្រហែល១០០០នាក់ ហើយក្នុងចំណោមទេសចររាប់ពាន់នាក់ មានមនុស្ស១៥នាក់ ត្រូវគេដាក់ឲ្យធ្វើចត្តាឡីស័កដោយសារចេញរោគសញ្ញាក្អួតនិងរាគ។

សូមបញ្ជាក់ ថ្វីបើជំងឺអាសន្នរោគមិនមែនជារឿងធម្មតានៅក្នុងប្រទេសនានា ដូចជាអង់គ្លេស និងសហរដ្ឋអាមេរិកក៏ដោយ ប៉ុន្តែប៉ុន្មានខែចុងក្រោយនេះ តំបន់អាហ្វ្រិកខាងត្បូង មានការផ្ទុះជំងឺអាសន្នរោគយ៉ាងខ្លាំង ដោយករណីចំនួន១៨៨០០០ ត្រូវបានកត់ត្រានៅទូទាំងប្រទេសចំនួន៧ចាប់តាំងពីខែមករាឆ្នាំ២០២៣មក និងមានមនុស្សស្លាប់ជាង៣០០០នាក់៕

អត្ថបទ៖ សុខ សុវណ្ណ

ចុចអាន៖ នាវាយក្សដឹកទេសចរជាង ៥០០ នាក់ចូលចត​នៅកំពង់ផែ​ក្រុងព្រះសីហនុ